SƏNİ SEVMƏK GÜNAHIMDIR

Bağçamızda güllər əkə bilmirəm

 

Ötən il Təbrizə səfərimin ən yadda qalan anı toya dəvət olunmağım, o toydakı sözlə musiqinin yaratdığı ecazkar mənzərə, Səttar, Cəfər Əhmədinin məlahətli səsi, Babək Qoca Zadənin aparıcılıq məharəti, oxuduğu şeirlərin içindəki yanıqlı Vətən duyğuları, Hacı Məmmədin sadə və qonaqpərvər ailəsinin səmimiliyi, təbrizli gənclərin quzey həsrətli baxışları və o baxışlardan boylanan qürurverici dəyanəti, qanı qanımızdan, canı canımızdan olan mahnı və rəqsləri ifa edən mahir çalğıçıların ustalığı məni valeh etdi... Toydan sonra Hacı Məmməd, Səttar Mahmudoğlu Babək Qoca Zadə məni uzun illər həsrətində olduğum "canım-gözüm" Təbrizimi gəzdirdilər. Gəzinti zamanı Babək mənə öz şeirlərini oxudu...

Şeir oxuduqca Babəkin səsində nəfəsinda uzun illər xəyallarımda yaratdığım yaşatdığım Təbrizin möhtəşəm tablosı canlanır, özüm həmin an o tablonun canlı bir parçası olmağımdan qürur duyurdum. Canlı Təbriz tablosunun bir naxışı kimi Babək mənə çox doğma idi o doğmalığın içindən bir bütövlük işarırdı... O doğmalığı Şuşada da yaşamağı arzuladıq.

Babəkin oxuduğu şeirlərdən bir neçəsini dəyərli "Ədalət" qəzeti vasitəsi ilə oxuculara təqdim edirəm.

 

Ramiz Qusarçaylı

Babək

Qoca Zadə

 

 

Qarabağım yenə ürək dağlayır

 

Qayıtmadı yenə bu gün qardaşım,

Cəbhələrə sarı gedir yoldaşım,

Anam deyir mənə: - sən ol sirdaşım

Yazıq anam zülüm-zülüm ağlayır

Qarabağım yenə ürək dağlayır ...

 

Savaşla dünyaya açıldı gözüm,

Tükəndi taqətim, qurtardı dözüm,

Yadları qorxudar hər an hər sözüm

Yazıq anam zülüm-zülüm ağlayır

Qarabağım yenə ürək dağlayır...

 

Bir elin nisgilin çəkə bilmirəm,

Bağçamızda güllər əkə bilmirəm,

Düşmən sinəsini sökə bilmirəm

Yazıq anam zülüm-zülüm ağlayır

Qarabağım yenə ürək dağlayır...

 

Bürünsəm mən bir gün bir kəfənə,

Ağlamayın, anam ağlayar mənə

Bir canım var oda qurban Vətənə

Yazıq anam zülüm-zülüm ağlayır

Qarabağım yenə ürək dağlayır ...

 

***

Düşman tökür bombaları

Ağlar qoyur anaları,

Kəsib - qırır balaları,

Yerdən - göydən zülüm yağır

Nədən dünya səssiz baxır...

 

Qol bir yana, qıç bir yana,

Canlar oda yana-yana,

Üzün tutub sorur sana

Yerdən - göydən zülüm yağır,

Nədən dünya səssiz baxır...

 

Heyvanlara ofis açır,

Insanlara güllə saçır,

Vurub yıxır, döyüb qaçır,

Yerdən-göydən zülüm yağır

Nədən dünya səssiz baxır...

 

Dünən İraq, bu gün Qəzzə,

Insanlığı əzə-əzə,

Haqqam! - deyə girir gözə...

Yerdən-göydən zülüm yağır,

Nədən dünya səssiz baxır...

 

Bacı qardaş qolundadı,

Ata evin yolundadı,

Ana soyuq salondadı

Yerdən-göydən zülüm yağır,

Nədən dünya səssiz baxır.

 

Yetər həsrət, yetər zülüm,

Solub getdi qönçə gülüm,

Düşmənə çox azdı ölüm

Yerdən - göydən zülüm yağır,

Nədən dünya səssiz baxır...

 

***

bütün divarlara elan vurublar,

bütün sitələrdə şəklin asılıb.

gəzetlər hamısı səndən yazırlar,

xəbərlər hamısı səndən deyirlər,

insanlar hamısı səni gəzirlər,

quşlar da, itlər , lap polislər

hamı səni gəzir, səni axtarır.

hamı səndən deyir, səndən danışır,-

deyirlər şəhərdə bir qız itibdir...

Adamlar bilsin,

quşlar bilsin,-

sən mənim,

sən mənim ürəyimdəsən...

Səni sevmək

günahımdır

 

Biri qatil, biri oğru

Kimin xoş deyil uğuru,

Sözlərim olsa da doğru,

Səni sevmək günahımdır.

 

İçimdə qıy vurur şeytan,

Hər nəyim var bezib ondan,

Bu gen dünya olub zindan

Səni sevmək günahımdır.

 

Qara gözlər əlacımdır,

Sənə çatmaq amacımdır,

O saçlar dar ağacımdır

Səni sevmək günahımdır ...

 

 

Adam vurulanda

yuxusu qaçır

 

Adam vurulanda yuxusu qaçır,

Günəşlə, gündüzlə arası olmur.

Çalışır tez yata hər gecə, ancaq

Bircə an gözünə yuxu da dolmur.

 

Darıxır, darıxır, ötür saatlar,

Qəfildən göylərdə Günəşı doğur.

Hamını yuxudan oyadan səslər

Sevənin qəlbini daraldır, boğur.

 

Hər şey bu dünyada tərsinə gedir,

Qaranlıq gündə sevilir ancaq.

Sevənlər azaddır,- deyirik, nədən

Azadə yerlərdə xoş yanır ocaq.

 

Məncə beləsi daha gözəldir,

Sevənə lazim gül, sona.

Bir cüt göz vurğunu bu dunya boyda

qədər ömrü var yetərdi ona !...

 

 

Qayıt mənə

 

Neçə gündur küsülüsən,

Bilirəm ki, üzülüsən,

Sən ömrümün özülüsən

Qayıt gülüm, qayıt mənə.

 

Hərə birin sevib seçir,

Mənim günüm sənsiz keçir,

Ürəyimi kədər biçir

Qayıt gülüm, qayıt mənə.

 

Tək gəzirəm küçələri,

Atma atır neçələri,

Yatanmıram gecələri

Qayıt gülüm, qayıt mənə.

 

Qoşa gəzir oğlan-qızlar,

Sankı yerdə ay ulduzlar,

Ürək sənsiz hər an sızlar

Qayıt gülüm, qayıt mənə.

 

Arabalar ötüşür hey,

Fəvvarələr atışır hey,

Könlüm qopur, bitişir hey

Qayıt gülüm, qayıt mənə.

 

Çiçəkləri üzüm-üzüm,

Sən ötüşən yola düzüm,

Başqasını tutmur gözüm

Qayıt gülüm, qayıt mənə

 

 

Bu qız məni ağladacaq

 

Eşq oduna yana-yana,

Vurulmuşam bir ceyrana,

Baxmır ada, baxmır sana

Hələ ürək dağladacaq,-

Bu qız məni ağladacaq.

 

Gözü qara, üzü göyçək,

Örtüb başa güllü örtək,

Vurğunuyam çiçək - çiçək

Hələ ürək dağladacaq ,-

Bu qız məni ağladacaq.

 

Bilərziklər qolundadır,

Tər qönçə gül kolundadır,

İnaddı, öz yolundadır

Hələ ürək dağladacaq,-

Bu qız məni ağladacaq.

 

Saçı uzun, boyu bəstə,

O bir həkim, mən bir xəstə,

Hər desə gözüm üstə

Hələ ürək dağladacaq,-

Bu qız məni ağladacaq.

 

El - obamın etibarı,

Son yazımın ilk nübarı,

Türk elimin şux nigarı

Hələ ürək dağladacaq,-

Bu qız məni ağladacaq.

 

 

Çağır məni, çağır gəlim

 

Darıxmışam bu gün sənə,

Sankı ürək batıb çənə,

Bal da şirin gəlmir mənə

Çağır məni, çağır gəlim.

 

Sizdən bizə əsir yellər,

Şeirə dönür qara tellər,

Mən ağlasam coşar sellər

Çağır məni, çağır gəlim.

 

Bu sevginin bağbanıyam,

O gözlərin qurbanıyam,

Sənsizliyin hər anıyam,

Çağır məni, çağır gəlim.

 

Gözüm yolda, qulaq səsdə,

Döyünürəm dar qəfəsdə,

İstərsə lap son nəfəsdə

Çağır məni, çağır gəlim.

 

Ədalət.-2015.-5 iyun.-S.7.