Fikrət Sadıq: “Kitabı ver oxuyana, birini də üstəlik"

"Kitabı ver oxuyana, birini də üstəlik...” Bu deyim qocaman şair, əməkdar mədəniyyət işçisi, Dövlət mükafatı laureatı Fikrət Sadığın misralarındandır. Şairin məşhur atalar misalındakı "çörək” sözünü kitabla əvəzləməyi əslində təsadüfi deyil, çörək cismin qidasısa, kitab ruhun qidasıdır. Ömrünü kitaba, ədəbiyyata adayan qələm adamı isə kitaba hətta çörəkdən artıq dəyər verər.

Şair həmçinin kitabın bu qədər yüksək dəyəyrlindirilməli olduğu halda günümüzdə ona olan münasibətdən də gileylidir. "Kitab oxuyandan çox, kitab yazan var”, - deyərək hər əlinə qələm alanla, əsl qələm adamının qarışdığı bu dönəmdən narazıdır. Poeziyanın, ədəbiyyatın süzgəçdən keçdiyi günümüzdə oxucuda bəzən əsl şeirlə qafiyə toplusu arasında müəyyən dolaşıq fikirlər yaranır. Amma imzasını təsdiqləmiş, şeirləri bir neçə nəsil oxucuların hələ də dilində gəzən şairlər də var ki, onların yaradıcılığını Azərbaycan poeziyasının sütunu hesab eləmək olar. Belə şairlərimizdən biri olan Fikrət Sadıq oxucuları, qələm dostları ilə birlikdə Azərbaycan Yazıçılar Birliyində (AYB) 85 illiyik yubileyini qeyd etdi.

Tədbiri giriş sözü ilə açan AYB sədri, xalq yazıçısı Anar Fikrət Sadığı istedadlı poeziya ustalarından biri, həyatının müdrik və təravətli dövrünü yaşayan şair kimi dəyərləndirdi: "Ədəbiyyatımızın iki Fikrəti var: Fikrət Qoca və Fikrət Sadıq. Hər ikisinin də Azərbaycan ədəbiyyatında böyük xidməti var. Biri poeziyanın qocalmayan, digəri isə sadiq qələmidir”.

Tədbirdə çıxış edən xalq şairi Sabir Rüstəmxanlı qeyd etdi ki, Fikrət Sadığın bənzərsiz, özünəməxsus şeirləri var: "Biz tələbə olarkən Fikrət Sadığın "İşıq” adlı şeirlər kitabı çıxmışdı. Tələbələrin çox təqdir etdiyi, ədəbi dərnəklərdə dönə-dönə müraciət etdiyi kitab idi. Bu kitabı o zamankı poeziya üçün yenilik hesab etmək olardı. Topluda ənənələrə həm sadiq, həm də o zamanadək heç rastlaşmadığımız şeir növlərinə rast gəlinirdi. Onun şeirləri az sözlə böyük mənalar ifadə etmək məziyyətləri ilə fərqlənirdi. Dəfələrlə yazılmış, mədh olunmuş mövzulara Fikrət Sadıq tamamilə başqa cür yanaşırdı. Onun şeirlərində həqiqət işığı vardı, poeziyanı başqa bucaqdan işıqlandırırdı. Fikrət Sadıq ardıcıl olaraq yazan, ədəbiyyatdan usanmayan, ilhamı qocalmayan, cavanlıq ruhunu qoruyan şeirləri ilə həmişə oxucunu sevindirib”.

Xalq şairi Fikrət Qoca, xalq yazıçısı Çingiz Abdullayev, filologiya üzrə fəlsəfə doktoru Vaqif Yusifli və digər natiqlər şairin poeziya çalarlarından söz açıblar. Bildirilib ki, Şirvan ədəbi məktəbinin layiqli davamçısı olan Fikrət Sadıq gözəl klassik şeirlər müəllifi olduğu kimi, heca vəznində və sərbəst üslubda da uğur qazanıb.

Tədbirdə yeni yaranmış "Ədəbiyyatın dostları” cəmiyyətinin rəhbəri, yazıçı-publisist Pərvin Nurəliyeva və qurumun üzvləri yubilyarı təbrik edib, onun poeziyasından nümunələr səsləndiriblər.

AYB sədri Anar Fikrət Sadıqa xatirə hədiyyəsi və Birliyin Fəxri fərmanını təqdim edib.

Sonda qocaman şair qısa şeir nümunələri səsləndirib və yubiley mərasiminin təşkilatçılarına təşəkkür edib.

Şəfiqə ŞƏFA

Ədalət.-2015.-21 noyabr.-S.9.