Ordumuzun aprel zəfəri

Yenə də cəbhə bölgəsinə ezamiyyətə gedirəm. Amma bu gediş əvvəlki gedişlərdən tamam fərqlidi. Hərbi səhra paltarını da əynimə xoş ovqatla geyinirəm. Bir neçə gündür ordumuzun hissələri bütün cəbhə boyu zəfər yürüşünə başlayıb. Atəşkəs rejimini pozan ermənilər neçə müddətdir həm mövqelərimizi, həm də yaşayış məntəqələrini atəşə tuturlar. Mülki adamlar arasında ölən və yaralananlar var. Düşməni susdurub mülki vətəndaşların həyatını xilas etmək üçün ordumuzun hissələri əks-həmlə ilə qəsbkarları geri oturdublar. Tərtər rayonunun bəzi kəndləri, həmçinin Füzuli rayonunun ərazisindəki Lələtəpə yüksəkliyi erməni işğalçılarından azad edilib. Çoxdan bəri gözlədiyimiz, həsədində olduğumuz günlər həyatımıza qədəm qoyub. Erməni qəsbklarları ordumuzun gücü, qüdrəti qarşısında duruş gətirə bilməyərək yüzdən çox canlı qüvvəsini, artilleriya qurğularını, zirehli texnikalarını itirərək geri çəkilməyə, daha doğrusu biabırcasına qaçmağa məcbur olublar. Ordumuz gücünü, qüdrətini bir daha düşmənə göstərib.

İllərdən bəri sıralarında xidmət etdiyim doğma ordumuzun zəfər yürüşü ürəyimi sevinclə doldurub. Qürurla, fərəh hissləri ilə torpaqlarımızı erməni işğalçılarından azad etmiş zabit və əsgərlərlə görüşmək üçün yola çıxıram.

Qatarın yola düşməsinə bir saat qalmış evdən çıxdım. Həm avtobusda, həm də metroda sərnişinlər daha çox ordumuzun uğurlarından danışırdı. Hamının üzündə sevinc, gözündə fərəh var idi. Hiss edirdim ki, Silahlı Qüvvələrimizin uğurlarından danışan bu insanların ürəkləri ön xətdə vuruşan zabit və əsgərlərimizin yanında döyünür. Ordumuzun aprel zəfərindən ruhlanan şəhər sakinləri ətrafında olan zabit və əsgərlərə daha böyük diqqət və qayğı ilə baxırlar.

"Yenə də döyüşə hazıram"

Qatarda hərbçilər çox idi. Hamı ön xəttə, zabit və əsgərlərin yanına tələsir. Kupelərdə söhbət ancaq ordumuzun uğurlarından gedir. Adamlar zəng vurur, Silahlı Qüvvələrin apardığı uğurlu döyüş əməliyyatları barədə bir-birilərinə məlumat verib sevinirdilər. Kupe yoldaşımız Nazim Əhmədov keçmiş hərbçidir. Bir neçə il əvvəl təqaüdə çıxıb. Qarabağ müharibəsində yaxından iştirak edib. Ağdamda, Ağdərdə vuruşub. Ordumuzun uğurlarından söz açan Nazim dedi ki, Silahlı Qüvvələrimizin işğalçıların tapdağı altında olan bir neçə kəndi və yüksəklikləri azad etməsini eşidəndə çox sevindim. Axı, mən özüm də bir vaxtlar zabit kimi bu ordunun sıralarında xidmət etmişəm. Eşitdiyim qələbə xəbəri məni göylərə qaldırdı. İnanırdım ki, gündən-günə güclənən ordumuz mütləq günlərin birində düşmən üzərində qələbə qazanacaq. Budur, o günləri gördük, qələbə sevincini yaşadıq. Artıq ordumuzun zəfər yürüşləri başlanıb. Bu xəbərə, bu zəfərə indi hamı sevinir. Xalq öz ordusunu sevir, ona inanır. Bu gün hamı bir nəfər kimi Silahlı Qüvvələrimizə dəstək durur. Yaşım çox olsa da, özümü güclü, qüvvətli hiss edirəm. Qələbəmizin davamlı olması üçün artilleriyaçı kimi həmişə döyüşə hazıram. Erməni qəsbkarları torpaqlarımızı tərk etməyincə, son nəfərinə kimi məhv edilməlidir.

Toplar gurlayır,

quşlar nəğmə oxuyur

Səhərin ala-toranında cəbhə bölgəsində yerləşən dəmiryol stansiyasında qatardan düşəndə top atəşləri eşitdim. Güclü gurultu yeri-göyü titrədirdi. Hiss olunurdu ki, ön xətdə gərgin döyüşlər gedir. Ordumuzun hissələri atəşkəs rejimini pozmuş düşməni susdurmağa çalışır. Bizi hərbi hissəyə aparan taksi sürücüsü dedi ki, dünən top səsləri daha güclü idi. Görünür ki, düşmən zəifləyib geri çəkilir, ordumuzun əks-həmləsi qarşısında duruş gətirə bilmir.

Elə ilk addımda hərbi hissədə böyük canlanma olduğunu hiss etdik. Hamı ayaq üstədir. Rabitə qurğuları bir an olsun belə susmur. Ön xətdən yeni məlumatlar daxil olur, yeni tapşırıqlar verilir.

Vaxt, zaman ötüb keçir. Yavaş-yavaş göyün üzündən qaranlıq çəkilir. Bayaqdan səmanın ənginliklərində sayrışan ulduzlar bir-bir görünməz olub, "yoxa" çıxır. Səhər gözlərini açıb işıqlaşan kimi quşlar cəh-cəh vurub nəğmə oxuyur. Havadan yaz qoxusu, bahar ətri gəlir. Ağ çiçəyə bürünmüş ağaclar təbiətə xüsusi yaraşıq verir. Bu gözəlliyə aşiq olan quşlar həzin-həzin nəğmə oxuyur. Quşların cəh-cəhi, topların gurultusu bir-birinə qarışır, təbiətin harmoniyası pozulur.

Səhər ertədən Müdafiə Nazirliyi Mənəvi-Psixoloji və İctimaiyyətlə Əlaqələr İdarəsinin rəisi general-mayor Rasim Əliyev bizimlə görüşür və müvafiq tapşırıqlar verir. Vaxt itirmədən müxtəlif istiqamətlərə yollanırıq.

Qələbə naminə hamı əlindən gələni etməlidir

Yolüstü "N" hərbi hissəsinə baş çəkib zabit və əsgərlərlə görüşdük. Hərbçilərin ovqatı yüksəkdir, onların gözlərindən od parlayır. Ordumuzun uğurlu əməliyyatlarına, zəfər yürüşlərinə hamı sevinir. Şəxsi heyətlə söhbət edərəkən öyrəndim ki, hər üç mobil operator - həm Azercell, həm Bakcell, həm də Nar mobil cəbhə bölgəsində xidmət edən hərbçilərə pulsuz dəqiqələr hədiyyə edib. Düşünürəm ki, bu, çox alqışlanmalı addımdır.

Bir azdan hərbi hissənin nəzarət-buraxılış məntəqəsinin qarşısında mülki avtomobil dayanır. Məlum olur ki, sürücü hərbçilərə siqaret gətirib. Adını öyrənməyə çalışırıq. Amma o adının haradasa yazılmasını istəməyərək "Qələbə naminə hamı əlindən gələni etməlidir", - deyir.

Şükürlər olsun ki,

qələbə sevincini də yaşadıq

İrəli getdikcə yollarımız qısalır. Qarşıdakı döngəni keçib ön xətdə yerləşən hərbi hissəyə yaxınlaşırıq. Topların gurultusu burada daha hündürdən eşidilir. Yaxınlıqda yaşayan sakinlər hündür təpəliklərin üstünə çıxaraq atəş səsləri gələn istiqamətlərə boylanırlar. Onlar cəbhədən uğurlu xəbərlər gözləyirlər.

Budur, düşməni diz çökdürüb Talış kəndini, həmçinin bir neçə strateji yüksəkliyi qəsbkarlardan azad edən şəxsi heyətin yanına gəlib çatırıq. Onlar döyüşdən yenicə çıxıblar. Ürəyim atlanır, gözümdən sevinc parlayır. Qarşımda ordumuzun ilk zəfər yürüşünü həyata keçirən, qələbəni bizə dadızdıran, xalqımıza sevinc bəxş edən Azərbaycan zabiti, Azərbaycan əsgəri dayanıb. Ürəyim fərəh hissi ilə dolur. Şükürlər olsun ki, qələbə sevincini də yaşadıq, bu anları gördük.

Döyüşdən yenicə çıxmış əsgərlərin çöhrəsindən yorğunluq sezilsə də, üzlərində təbəssüm, gözlərində bir dünya sevinc var. Bu cəsur oğullar xalqımıza qələbə sevinci bəxş ediblər, gözəl anlar, xoş günlər yaşadıblar. Cəsarət və hünərləri ilə Azərbaycan ordusunun zəfər tarixini yazıblar. Elə bir tarix ki, həmişə şərəflə xatırlanacaq.

Azərbaycan əsgəri qüdrətlidir, məğlubedilməzdir

Çöhrəsindən cəsurluq yağan bir zabitlə üzbəüz oturmuşam. Bu, baş leytenant Nihad Bayramovdur. O da son əməliyyatda hünər və igidlik göstərib. Savaşın həlledici anında yaralansa da döyüş yerini tərk etməyib. Uğrunda mübarizə apardığı mövqeyi axıradək qoruyub.

Baş leytenant son döyüşdən ətraflı danışdı:

- Neçə müddət idi erməni qəsbkarları həm yerləşdiyimiz bölgənin yaşayış məntəqələrini, həm də postlarımızı atəşə tuturdular. Aprel ayının 1-də xəbər yayıldı ki, düşmən postlarımıza hücum edib. Hücumun qarşısını almaq üçün silaha sarılıb döyüşə atıldıq. Elə ilk həmlədən qəsbkarları geri çəkilməyə məcbur etdik. Bir azdan ermənilər silah-sursatlarını da atıb qaçmağa üz qoydular. Arxalarınca düşüb onları təqib etdik. Düşməni geri qova-qova bir neçə mövqeyi ələ keçirdik. Burada xeyli silah-sursat atılıb qalmışdı. Postlarda vizual görüntü üçün kameralar quraşdırılmışdı. Qəsbkarlar bizim belə güclü əks-həmləmizi gözləmirdilər. Qısa müddətdə ermənilərin dörd postunu aldıq. Sonuncu mövqedə möhkəmlənib dayandıq. Gecəni burada qaldıq. Səhər tezdən hava işıqlaşan kimi düşmən üzərimizə hücuma keçdi. Gərgin döyüş başlandı. Bir addım da olsun geri çəkilmədən vuruşurduq. İşğalçıların müqaviməti yavaş-yavaş qırılırdı. Mövqeyimi dəyişmək istəyəndə böyrümdən güllə dəydi. Yaralansam da geri çəkilməyib döyüşü davam etdirdim. Tutduğumuz postları sonadək qoruyub saxladıq. Bir addımda da olsun düşmən irəliliəyə bilmədi. Ara sakitləşəndə döyüşçü yoldaşlarım məni hospitala çatdırdılar. Müayinə zamanı məlum oldu ki, güllə böyrümü dəlib keçib. Xoşbəxtlikdən yaram yüngül idi. Hospitalda çox ləngimədim, elə ertəsi gün əsgərlərimin yanına döndüm. Düşmən bir neçə dəfə cəhd etsə də, heç nəyə nail olmadı, itki verib geri çəkildi. Ümumiyyətlə, qəsbkarlar bu istiqamətdə ağır məğlubiyyətə düçar oldular. Həm xeyli canlı qüvvə, həm də texnika itirdilər. İşğalçılara yaxşıca məğlubiyyət dərsi verdik. Zabit və əsgərlərimiz əməliyyatlar zamanı üzərlərinə düşən döyüş tapşırıqlarının öhdəsindən bacarıqla gəldilər. Onlar düşmənə göstərdilər ki, Azərbaycan əsgəri çox güclü və məğlubedilməzdir. Döyüşdə fərqlənən əsgərlərdən Ramal Abbasov, İsmət Fətiyev, Tarverdi Abbasov və başqalarının adlarını çəkmək istərdim.

Düşməndən götürülmüş

silahlar

Döyüşçülərlə söhbət edərkən öyrəndim ki, Talış kəndi uğrunda gedən döyüşlərdə ermənilər silah-sursatlarını da atıb qaçıblar. Əsgərlərimiz bu silahları qənimət kimi götürüb hərbi hissəyə gətiriblər. Bir vaxtlar düşmənlərin əlində olan silahlar indi səliqə ilə taborun həyətində torpağın üstünə düzülmüşdü.

Baş leytenant Nihad Bayramovla söhbətdən sonra həmin silahlara yaxından baxdıq. Bir neçə qumbaraatan, avtomat silahları idi. Kiçik yeşiklərdə isə xeyli sayda əl qumbaraları, patronlar var idi. Yeşiklərdəki erməni dilində olan kitabçalar da diqqətimizi cəlb etdi. Dəftərlərin birində nəsə bir siyahı da var idi.

Bir vaxtlar düşmənin əlində olan silahlar qarşımızda yerə düzülüb. Daha atəş açıb gurlamır, susub. İnanıram ki, bir gün düşmənlər özləri də silahları kimi qarşımızda boynubükük, məğlub görkəmdə dayanacaqlar...

Silahlar təmizlənib

döyüşə hazırlanır

Döyüşdən yenicə qayıtmış əsgərlər taborun həyətində silahlarını təmizləyirlər. Silahın təmiz olması başlıca şərtdir. Zabitin, əsgərin silahı hər an atəş açmağa hazır olmalıdır. Ona görə də əsgərlər yorğun olsalar da, ilk növbədə silahlara əl gəzdirib təmizləyirlər. Yağlayırlar, sazlayırlar. Bu səhnəyə tamaşa etdikcə sevimli şairimiz Səməd Vurğunun bu misrası yada düşür: "Silahını təmiz saxla, atını da tumarla". Bəli, silahlar hər an döyüşə hazır olmalıdır.

Nə qədər çətin olsa da, şəxsi heyət qarşıya qoyulan döyüş tapşırıqlarını yerinə yetirmişdi. Son döyüşlərdə zabit və əsgərlərimiz böyük hünər və rəşadət göstərərək işğalçılara sarsıdıcı zərbələr vumuşdular. Qazanılan uğurlar bir daha sübut etdi ki, Azərbaycan əsgəri güclü və qüdrətlidir. Düşmənə qalib gəlib torpaqlarımızı azad etmək gücündədir. İnanırıq ki, bu qələbələr davamlı olacaq. Mərhələ-mərhələ torpaqlarımız erməni işğalçılarından azad olunacaq. Deməli, Azərbaycan əsgərini hələ qarşıda neçə-neçə uğurlu döyüşlər gözləyir.

Ədalət.-2016.-12 aprel.-S.4.