BU GÜNDƏN SABAHA... ƏBƏDİYYƏTƏ"

Əjdər Qiyaslının yeni kitabı

Mənə elə gəlir ki, Azərbaycanın söz məkanında ən mülayim, ən səmimi və həm də ən çox diqqət göstərən müəlliflərdən, yazarlardan biri, bəlkə də birincisi Əjdər Qiyaslıdı. Ona tanıdığım gündən birmənalı şəkildə dərk etmişəm ki, bu insan hər kəsə müsbət enerji ötürür, ətrafında həmişə səmimi bir aura olur və uzun müddət də səni tərk etmir.

Doğrusunu deyim ki, bunun səbəbinin, hardan qaynaqlandığını uzun-uzadı düşünəndən sonra özüm üçün müəyyənləşdirdim və bu qərara gəldim ki, Əjdər müəllimin ruhundakı, varlığındakı bütün bu müsbət çalarlar iki reallıqdan bəhrələnir. Onun birincisi Əjdər Qiyaslının tanınmış bir elm adamı, pedaqoq olmasıdı. Yəni bu insan peşə baxımından seçdiyi müəllimliyi şərəfləndirən və bu şərəfi də ziyalılıqla birləşdirən elm adamıdı. İkincisi, təbii ki, onun kövrək duyğularıdı, onun şairliyidi. Bax, bu iki reallıq onu bütöv bir enerji mənbəyinə çeviribdi. Və mən də bu insanı tanıdığıma, onunla həm mətbuat səhifələrində, həm həyatda görüşlərimdən çox məmnunam.

Bir müddət bundan öncə, daha dəqiq desəm, düz bir ay bundan öncə Əjdər müəllim bizim redaksiyamıza gəlmişdi. Çox səmimi bir avtoqraf yazdığı yeni kitabını o mənə hədiyyə etdi. Elə yanındaca kitabı vərəqlədim, onun kövrək misralarına görə xoş olduğumu və diqqətinə görə ona ehtiramımı bildirdim. Aradan keçən bu zaman kəsiyində vaxt tapıb Əjdər müəllimin kitabını bir oxucu diqqəti ilə gözdən keçirdim. Gördüm ki, qocaman şairimiz bu kitabını ömrünün çiçəkləyən zamanında dünyasını dəyişmiş qızı Nabit xanımın əziz və unudulmaz xatirəsinə ithaf edib. Və bu kitabda onun poemaları və şeirləri toplanıbdı. Şairin kitabın ilk səhifəsindəki oxuculara ünvanlanan misraları özü-özlüyündə kitabın ovqatını yaradır. Bilirsən ki, burada hansı auranın qoynunda olacaqsan. Beləcə:

Sahilə çırpılıb yetəndə kaman,

Dalğalar gücünü dəryadan alır.

Dəyərli şeirlə nurlanır səma,

Yaradan yaşayır, yaranan qalır.

Həyatdan silinmir nə vaxt, nə vədə;

Yaxşılar yaddaşda dərin kök salır.

Necə ki, həyat var... hər bir ölkədə,

Yaradan yaşayır, yaranan qalır.

Bəli, Əjdər müəllimin dediyi kimi, həqiqətən yaranan qalırsa, böyük anlamda desək, izin, əməlin qalırsa, deməli, onu yaradan, yəni sən də qalırsan, sən də yaşayırsan.

Oxuduğum bu kitabda Əjdər müəllimin vətən sevdalı, vətən həsrətli şeirləri çoxluq təşkil edir. O şeirlər Şuşaya, Ağdama, bütövlükdə Qarabağa, işğal olunmuş torpaqlarımıza, şəhidlərimizə, əsgərlərimizə ittihaf olunub. Qocaman şairimiz öz hisslərini bir-birindən kövrək misralarla oxucuya çatdırır. Məsələn:

Çəməndə qönçəli tər gülü dərdim,

Sandım ki, qəbahət eyləmişəm mən.

Gördüm tez saraldı... çoxaldı dərdim,

Gül məndən incidi, yoxsa çəməndən.

Və yaxud:

Sızıldayır həzin-həzin

Ürəyimdə yaram dərin.

El-obanı gedin, gəzin,

Çarəsini tez göndərin.

Və yaxud:

Qarabağ, ay Qarabağ,

Gəl qəlbimi ara, bax.

Canım sənə qurbandı,

Yolum düşsə hara, bax.

Mən Əjdər müəllimin bu təzə kitabını onun növbəti poetik uğuru kimi qiymətləndirir və bundan sonra da öz ilhamının ifadəçisi kimi oxucularını al-əlvan söz çiçəkləri ilə sevindirməyi arzu edirəm. Və bilirəm ki, həmişə baş verən hadisələrə şair həssaslığı ilə yanaşan, müəllim müdrikliyi ilə qiymət verən Əjdər Qiyaslı hələ bizi və bütövlükdə ouxucularını çox sevindirəcək.

Əbülfət MƏDƏTOĞLU

Ədalət.-2016.- 29 iyul.- S.4.