BAĞA BAXARSAN BAĞ OLAR

Ölkəmizdə neftdən asılılığı aradan qaldırmaq üçün dövlət səviyyəsində çox böyük layihələr və proqramlar gerçəkləşdirməyə başlanılıb. Təbii ki, uzun illər məmləkətimizin iqtisadiyyatında bir çox sahələrə bir o qədər də önəm və diqqət yetirilməyib. Ancaq son vaxtlar dünyanı bürüyən iqtisadi böhrandan sonra bizim ölkəmizdə də yeni inkişaf yolları və çıxış məqamları axtarılmaqdadır. Və nə yaxşı ki, bununla bağlı tez bir vaxtda hökumət tərəfindən ciddi addım atılıb.

Sirr deyil ki, uzun illər ayrı-ayrı fermerlərə və insanlara məxsus torpaq sahələri əkilməyib. Daha doğrusu, bəziləri digər sahədə yaşayış və dolanışıq olduğu üçün torpağı əkib-becərməyib. Və nəticədə isə müəyyən məhsulların qıtlığı və bahalığı yaranıb.

Fərəhlə deyə bilərik ki, Füzuli rayonunda da son vaxtlar ölkə prezidentinin qarşıya qoyduğu vəzifələr diqqət mərkəzinə çəkilib. Yəni ilk növbədə kənd təsərrüfatının - taxılçılığın, maldarlığın, tərəvəzçiliyin, üzümçülüyün, pambıqçılığın inkişaf etdirilməsi üçün çox böyük işlər həyata keçirilir. Bununla yanaşı, ayrı-ayrı şəxslərə məxsus olan həyətyanı sahələrin əkilməsinə, becərilməsinə və məhsulun yetişdirilməsinə rayon icra hakimiyyəti tərəfindən çox böyük qayğı göstərilir.

Bu məqsədlə rayon icra hakimiyyətinin başçısı Alı Alıyev digər icra qurumlarının nümayənədələri ilə birlikdə bütün kəndlərdə, yaşayış məntəqələrində camaatla görüşlər keçirib, onların arzu və təkliflərini dinləyib, kənd təsərrüfatının inkişaf etdirilməsi üçün onlara böyük dəstək olduqlarını bildirib. Hamıya yaxşı bəllidir ki, Füzuli rayonunun torpağı daha bərəkətli və daha məhsuldardır. Təkcə bir faktı qeyd edək ki, ötən il rayonda rekord miqdarda taxıl istehsal olunub. Elə bunun özü bir daha təsdiq edir ki, bu torpaq nə əksən, onu da yetişdirəcək və bol məhsul verəcək.

Rayon icra hakimiyyətinin başçısı Alı Alıyev kəndlərdə camaatla görüşü zamanı insanlarla sıx ünsiyyət yaranmasından və sahibkarlara lazımi şəraitin yüksək səviyyədə təşkil edilməsində heç bir problemin olmayacağını bir daha onların nəzərinə çatdırıb. Və bildirib ki, hər bir insan özünə məxsus olduğu torpaq sahəsini əkməli, becərməli və orda istənilən məhsulu yetişdirməlidir. Hökumət və dövlət də bu məqsədlə rayona çox böyük köməklik göstərir.

Aydındır ki, Füzuli cəbhə bölgəsi olduğu üçün prezident İlham Əliyev həmişə bu bölgəyə maddi və mənəvi cəhətdən böyük dəstək olub. Rayon icra başçısı da camaatla görüşündə bir fikri xüsusilə vurğulayıb ki, ölkə prezidentinin həyata keçirdiyi iqtisadi siyasət nəticəsində biz yaranmış iqtisadi böhrandan tez bir zamanda çıxış yolu tapacağıq. Bunun üçün hər kəs özünə məxsus torpaq sahəsini əkməli və becərməlidir. Məhz bolluğu da bu cür yaratmaq olar. Alı müəllim bizimlə söhbətində bir hadisəni xüsusilə xatırlatdı. O dedi ki, kəndlərdə görüşüm zamanı gördüm ki, bir qadının əlində "Fanta" var. Soruşdum ki, sənin həyətində ərik, şaftalı, alça, gilas, gilənar ağacları varmı? Qadın isə utana-utana dilləndi:

-Qağa, hər cür ağacımız var.

- Bəs onda niyə özünüz həmin ağacların meyvəsindən kampot bişirmirsiniz?

Həmin xanım güldü və yenidən dilləndi:

-Düz deyirsən, heç ağlımıza gəlmir. İndən sonra Allah qoysa, yay gələndə elə bağımızın meyvəsindən kamport bişirəcəyik. Tutdan doşab bişiririk, ancaq bir az tənbəllik edib kampot bişirməyə fikir vermirik.

Bu cür səmimi söhbətlər insanlar arasında daha normal qarşılanır. Əlbəttə, başçı xalqa yaxın olanda, insanlarla sıx ünsiyyət yaradanda camaat da ruhlanır və ürəkdən bu torpağa, bu yurda bağlanır.

Öyrəndik ki, rayon icra hakimiyyəti hər həftə kəndlərdə gedən əkin, təsərrüfat işləri ilə maraqlanır. Hətta bu məqsədlə rayon icra hakimiyyətinin əməkdaşları hər gün kəndləri gəzir, əkilən və boş qalan torpaqlar barəsində başçıya məlumat verir. Təbii ki, bu da onunla bağlıdır ki, hər bir kənd adamı əkib-becərdiyi məhsuldan həm özü bəhrələnsin, həm də onu bazara çıxarsın. Yəni torpağın məhsuldar becərilməsi insanları müəyyən asılılıqdan və ələbaxımlılıqdan azad edəcək. Üstəlik də bu həm də işsizliyi, bekarçılığı aradan qaldıracaq.

Gözlənilir ki, bu il Füzulidə əvvəlki illərlə müqayisədə dəfələrlə çox kənd təsərrüfatı məhsulları - kartof, soğan, üzüm, mer-meyvə, bostan-tərəvəz məhsulları istehsal ediləcək. Bu bolluğun yaradılması həm də ucuzluğa gətirib çıxaracaq. Həmin məqsədlə rayonun yeni salınmış iki qəsəbəsində - "Qayıdış" və "Cobucuq" qəsəbələrində yeni bazar açılacaq. Bunun üçün bir çox işlər artıq gerçəkləşdirilib.

Yaxın gələcəkdə isə Füzulidə kompleks sənaye müəssisəsi tikiləcək. Bu sənaye müəssisəsində həm kənd təsərrüfatı məhsulları fermerlərdən və sahibkarlardan alınacaq, həm də orda emal olunacaq. Nə az, nə çox həmin sənaye müəssisəsində yeddi minə yaxın insan işlə təmin olunacaq. Bu isə o deməkdir ki, kəndli əvvəllər olduğu kimi əkib-becərdiyi məhsulu bazara çıxarmaqda və satmaqda çətinlik çəkməyəcəkdir.

Bu gün Füzulidə çox yüksək ovqat və aura var. Çünki insanlar ölkə prezidenti cənab İlham Əliyevə və onun rayonundakı səlahiyyətli nümayəndəsi Alı Alıyevə böyük ümidlər bəsləyirlər. Belə ki, ölkə prezidentinin qarşıya qoyduğu vəzifələr bu gün Füzulidə çox yüksək səviyyədə həyata keçirilir. Alı Alıyev bizimlə söhbətində onu da qeyd etdi ki, yaxın günlərdə onlar Fransanın Altgir şəhərinə səfər edəcəklər. Həmin şəhərlə Horadiz şəhəri qardaşlaşacaq. Çünki Fransanın o şəhəri də İkinci Dünya Müharibəsində alman faşistləri tərəfindən yandırılıb və darmadağın edilib. Horadiz isə erməni qəsbkarları tərəfindən yandırılaraq külə döndərilib. İndi hər iki şəhər tanınmaz dərəcədə yenidən tikilib və abadlaşıb. Erməni lobbisinin çox güclü nüfuzu olduğu bu yerdə əlaqələr qurmaq və dostlaşmaq Fransa-Azərbaycan münasibətində çox böyük önəm kəsb edəcək. Hər halda bu il ölkəmizdə "Multikulturalizm ili" kimi qeyd edilir. Ona görə də Fransanın şəhəri ilə Horadizin qardaşlaşması bir daha Azərbaycanda multikulturalizmin necə yüksək səviyyədə inkişafını əks etdirir.

Bu yaz günündə rayonda hara baxırsan orda bir yaşıllıq, bir gözəllik və bir işıq var. Atalar çox gözəl deyib, "bağa baxarsan bağ olar, baxmazsan dağ". Deməli, torpağı əkib-becərirsənsə, onu qoruyursansa və orda həmişə həyat var, yaşıllıq var, gözəllik var...

Ədalət.-2016.-30 mart.-S.3.