İLK ZƏNG SƏSLƏNİR...

Bu gün ümumtəhsil, orta ixtisas və ali məktəblərdə yeni dərs ili başlayır

Ölkəmizdə təhsilin inkişafına və tərəqqisinə prezident İlham Əliyev tərəfindən xüsusi diqqət və önəm verilir. Təsadüfi deyil ki, son on ildə məmləkətimizdə müasir tələblərə cavab verən yüzlərlə yeni məktəb binaları tikilib və bir o qədər də köhnə məktəblər əsası təmir edilərək istifadəyə verilib. Təbii ki, bu da təhsilin inkişafına çox böyük təkan verir.

Bu mənada Sabunçu rayonundakı 271 nömrəli tam orta məktəb də inkişafdan kənarda qalmayıb. Belə ki, məktəb əsaslı surətdə yenidən təmir edilib və ən müasir texniki avadanlıqlarla təchiz olunub. Şübhəsiz ki, müasir tələblərə cavab verən təhsil ocağında şagirdlərə elmi biliklər aşılamaq və onları vətənpərvərlik ruhunda tərbiyə etmək daha məqsədəuyğundur. Onu da qeyd edək ki, bu təhsil müəssisəsində 1780 şagird oxuyur və onların təlim-tərbiyəsi ilə 170 müəllim məşğuldur.

271 nömrəli tam orta məktəb Sabunçu rayonunun ən qabaqcıl təhsil ocaqlarındandır. Hər il bu məktəbi bitirən və ali təhsil ocaqlarına yüksək balla qəbul olan məzunlar rayon icra hakimiyyətinin başçısı Adil Vəliyev tərəfindən qəbul edilir və onlara qiymətli hədiyyələr verilir. Bu il də 600-dən çox bal toplamış 9 məzun icra başçısı tərəfindən qəbul edilərək mükafatlandırılıb və onların qazandığı uğurlar xüsusilə vurğulanıb. İcra başçısı Adil Vəliyev bildirib ki, rayonda bütün abadlıq və quruculuq işləri prezident İlham Əliyevin diqqət və qayğısı nəticəsində həyata keçirilib. Və biz də prezidentin yeritdiyi siyasəti müdafiə edərək təhsilə də xüsusi önəm veririk. İstedadlı şagirdlərimizi həmişə qiymətləndirməyə çalışırıq və onları ruhlandırmaq istəyirik. Bu gənclər bizim gələcəyimizidir.

Məktəbin direktoru tanınmış ziyalı, şair-publisist Səməndər Məmmədov bildirir ki, bu il orta məktəbi bitirmiş məzunların 66 faizi tələbə adına layiq görülüb. Onlardan 9 nəfər 600-dən yuxarı, digər 9 nəfər isə 590-dan yuxarı bal toplayıblar. Bu isə o deməkdir ki, müəllimlərimizin çəkdiyi zəhmət hədər getməyib və onlar öz əziyyətlərinin bəhrələrini görüblər. Ümumiyyətlə, müəllim onda sevinir ki, şagirdi onun etimadını doğruldur və tələbə adını qazanır. Mən bir faktı da qeyd etmək istəyirəm ki, təhsilə ölkə prezidenti cənab İlham Əliyev tərəfindən, o cümlədən təhsil naziri Mikayıl Cabbarov və rayon icra hakimiyyətinin başçısı Adil Vəliyev tərəfindən xüsusi diqqət yetirilir. Məhz bunun nəticəsidir ki, şagirdlərimiz çox böyük uğurlara imza atırlar.

Məktəbin direktor müavini Rüxsarə Əlizadənin də şagirdlərin qazandığı uğurlarda çox böyük zəhməti var. Belə ki, o, 600-dən yuxarı bal toplayan məzunlara riyaziyyat fənnindən dərs deyib. Məktəbin məzunlarından Ləman Əsədli 664 bal toplayaraq Azərbaycan Diplomatiya Akademiyasının biznesin idarəedilməsi fakültəsinə, Həsən Əliyev 661 bal yığaraq Tibb Universitetinin stomotologiya fakültəsinə, Taleh Dadaşov 649 bal toplayaraq BDU-nun hüquq fakültəsinə, Zöhr Babazadə 647 bal toplayaraq İqtisadiyyat Universitetinin iqtisadiyyatın idarəedilməsi fakültəsinə daxil olublar. 7 nəfər bir sinifdən yüksək bal toplayaraq ali məktəbin tələbəsi adını qazanıb. Həmin sinifin rəhbəri Sevda Əliyevadır. Aydındır ki, bu cür əziyyətlər gec-tez özünün bəhrəsini verir. Bir faktı da qeyd edək ki, həm Zöhr, həm Həsən, həm də Taleh respublika olimpiyadalarında yüksək yer tutublar.

Bayaq dedik ki, bu məktəb qabaqcıl təhsil ocaqlarından sayılır. Bu həqiqətən də belədir. Belə ki, məktəbin müəllimi Təranə Məhəmmədova "İlin müəllimi" adına layiq görülüb. Digər müəllimlər Nazilə Abdulhəsənova, Bəsirə Xudayarova, Mətanət İbrahimova da bir pedaqoq kimi həmişə fərqlənir və şagirdlərinin yaddaşlarında xoş izlər qoyublar. Onlar bu gün çox böyük qürur hissi keçirirlər ki, bu il məktəbi bitirən məzunlar müəllimlərinə böyük sevinc bəxş ediblər.

Məktəbdə müxtəlif müsabiqələrdə uğur qazanan, fərqlənən şagirdlər də var. Məsələn, Nazilə Hüseynovanın rəhbərliyi ilə keçirilən "Gənc fiziklər" müsabiqəsində 8-ci sinif şagirdi Pəri Vəliyeva, 9-cu sinif şagirdi Murad İnsanov, 10-cu sinif şagirdi Nigar Bayramova bu müsabiqədə 2-ci yeri tutaraq fərqlənmə diplomu ilə təltif olunublar. Məktəbin 7-ci sinif şagirdi Elton Məmmədov isə Almaniyada keçirilən dzü-do üzrə çempionatlda erməni idmançısını məğlub edərək qızıl medala layiq görülüb.

Bu gün müəllimlərin, şagirdlərin çox sevincli anlarıdı. Onların çöhrəsində bir sevinc, bir fərəh hiss olunur. Çünki yeni dərs ilinin ilk günüdür. 271 nömrəli tam orta məktəbdə də "Bilik günü" böyük sevincə səbəb olub. Bu gün həmin məktəbə 179 şagird ilk dəfə qədəm basır və onlar ilk zəngin səsini eşitməmişdən öncə məktəbin direktoru Səməndər Məmmədovun xeyir-duasını alırlar. Səməndər müəllimlə yanaşı, tədbirdə iştirak edən digər ziyalılar, qonaqlar və nümayəndələr də şagirdləri salamlayır və onlara yeni dərs ilində uğurlar arzulayırlar. Səməndər Məmmədov sonda ürək sözərini ifadə edərək bildirir k, bu günün 1-ciləri sabahın 11-ciləridir. Onlar da bizi nə vaxtsa sevindirəcək və yeni bir şərəfli tarix yazacaqlar.

Ədalət.-2016.-15 sentyabr.-S.3.