"XARIBÜLBÜL NƏĞMƏLƏRİ"

Bu günlərdə "Azərnəşr" tərəfindən unudulmaz və söz-şeir dünyamızda öz dəsti-xəttini, öz izini, öz möhürünü hopdurub Tanrı dərgahında yer tutmuş Şahmar Əkbərzadənin kitabı işıq üzü görüb. Həmin kitabın nəşrinə Anar Eldaroğlu dəstək verib. Kitabın ön sözünün müəllifi və naşiri isə dəyərli Əlövsət Ağalarovdu. Yüksək poliqrafiya nümunəsi kimi işıq üzü görmüş bu kitab Şahmar Əkbərzadə poeziyasının vurğunları üçün, onun sözünün sorağında olanlar üçün çox böyük bir hədiyyədir.

Əlövsət Ağalarovun "Çılğın şairin müdrik poeziyası" adlı ön sözündə vurğulandığı kimi, "Şahmar nurlu bu kitabı əziz balanız kim əzizləyə-əzizləyə oxumağınızı istərdim. Düşünürəm ki, ürəyinizcə olacaq və demək ki, Şahmarın narahat ruhu bir azca rahatlanacaq!". Elə həmin fikirlərə qoşularaq mən də vurğulamaq istərdim ki, şəxsən tanıdığım, həyatımda önəmli yeri olan, xeyir-duasını dinlədiyim, poeziyasını sevə-sevə ruhuma hopdurduğum Şahmar Əkbərzadənin bu kitabı əsl stolüstü kitaba çevriləcək. Buna mən əminəm. Ona görə də kitabın bizlərə hədiyyə olunmasında xidməti olan hər kəsə öz oxucu təşəkkürümü çatdırıram. Və "Ədalət"in oxucularını Şahmar Əkbərzadənin cismən bizlə olmadığı bu gündə görüşümüzə gələn "Xarıbülbül"ün nəğmələrini soraqlamağa, axtarıb, tapıb oxumağa səsləyirəm.

Əbülfət MƏDƏTOĞLU

Ədalət 2018.- 25 oktyabr.- S.12.