Bir ömrün səhifələri

Yaşadığı Şahağacı kəndi Xəzərin sahilində yerləşir. O, hər səhər dəniz sahilinə çıxır. Dəniz həsrətilə yaşayan nəğməkar qağayıları süzür, saatlarla xatirələr "dənizində" üzür. Xəzər ona doğmadır. Qəlbinə, istəyinə hakim kəsilib. Sevincini onunla bölüşür.

Həyatda şirinli, acılı nə varsa Xəzərdə ov edən cəsur balıqçılarla bağlıdır. Ona görə də hər səhər dəniz sahilinə gedir, dalğalanan ləpələri eləcə də mavi suların qoynunda bərq vuran göyərçinləri sehr etdikdən sonra iş yerinə yollanır.

Söhbət ömrünün 65-ci ilini yaşayan veteran polis polkovnik leytenantı Canaşir Xəlil oğlu Novruzovdan gedir. O, 1954-cü ildə Astara rayonun Şahağacı kəndində dünyaya göz açıb.

1970-ci ildə Şahağacı kənd orta məktəbini bitirib. Elə həmin il Bakı Dövlət Universitetinin tarix fakültəsinə daxil olub.

Öz arzusu ilə sənədlərini alıb hüquq fakültəsinin əyani şöbəsinə verir. Lakin atası ticarətdə məsul vəzifədə işlədiyi üçün onun hüquq fakültəsində təhsil almasına icazə verilməyib. Elə həmin ildə sənədlərini Bakı şəhəri Nərimanov rayonunda yerləşən 1 saylı texniki peşə məktəbinə vermişdi. Peşə məktəbini 1972-ci ildə fərqlənmə diplomu ilə bitirmişdi. Bir neçə il Keşlə maşınqayırma zavodunda ixtisası üzrə işləmişdi.

1972-75-ci illərdə Ukrayna Respublikasının Xarkov şəhərində hərbi xidmətdə olmuşdu. Hərbi xidmətini başa vurduqdan sonra 1975-ci ildə Universitetin Hazırlıq fakültəsinə daxil olmuşdur. Bir müddət sonra Bakı şəhərində yerləşən kitab ticarəti idarəsində ekspeditel işləmişdir. İşlədiyi illərdə Xalq şair mərhum Zəlimxan Yaqubla tanış olmuşdu. Onların dostluğu Zəlimxan müəllim dünyasını dəyişənədək davam etmişdir. Sonra Azərbaycan Dövlət Universitetinin hüquq şöbəsinin əyani fakültəsində təhsil almışdı.

Təhsilini 1982-ci ildə başa vurduqdan sonra Şirvan şəhər polis şöbəsində müstəntiq vəzifəsinə təyin olunmuşdu.

Sonralar Zərdab rayon polis şöbəsinə baş müstəntiq vəzifəsinə təyinat almışdır. O, Ucar rayon polis şöbəsində müstəntiq işləyib. 1993-cü ilin aprel ayında Lənkəran ŞRP şöbəsinə baş müstəntiq təyin olunmuşdu. 2000-ci ildən 2012-ci ilədək polis şöbəsində rəis müavini vəzifəsində çalışmışdır. Təqaüdə çıxandan sonra 2014-cü ildən Lənkəran Dövlət Universitetində Konstitusiya hüququ və hüququn əsaslarından mühazirə seminar dərslərini keçir.

2017-ci ildən LDU-nin hüquqşünas vəzifəsində çalışır, YAP-nın üzvüdür. 2 oğul övladı var. O, övladlarına da ali təhsil vermiş, valideynlik borcunu yerinə yetirmişdir.

Cavanşir Novruzov işlədiyi illər ərzində vəzifə borcunu layiqincə yerinə yetirdiyinə və işində həmişə fəallıq göstərdiyinə görə əməyi yüksək qiymətləndirilmişdir. DİN-nin rəhbərliyi tərəfindən "Polis əlaçısı" döş nişanına, fəxri fərman eləcə də bir neçə dəfə pul mükafatına layiq görülmüşdür. Hər il polis günü münasibətilə keçirilən yığıncaqda iştirak edərək bu günkü gənc polislərə bir ağsaqqal kimi tövsiyyələr edir. Onlara çətin və şərəfli peşələrində uğurlar arzulayır.

Biz də ömrünün 25-ildən çoxunu xalqın asayişi keşiyində durmaqla şərəfli polis peşəsinə həsr edən veteran polis polkovnik leytenantı Cavanşir Novruzovu anadan olmasının 65-illiyi münasibətilə səmimi qəlbdən təbrik edir, ona həyatda uzun ömür, möhkəm can sağlığı arzulayırıq.

Azad Zülaloğlu

Jurnalist "Qızıl qələm"

mükafatı laureatı

Ədalət 2019.- 19 fevral.- S.8.