BƏŞƏRİ CİNAYƏT

Bu gün ölkəmizin hər yerində insanlığa və deməli, həm də bəşəriyyətə qarşı törədilmiş ən qatı cinayətlərdən biri olan Xocalı faciəsi ilə bağlı tədbirlər keçirilir. Bu tədbirlər sırasında elmi konfranslardan tutmuş beynəlxalq tədbirlərə qədər, eləcə də rəsm sərgiləri, ədəbiyyat nümunələrinin təqdimatı, kinolentlərin göstərilməsi yer alıbdı. Həmin tədbirlərdən biri Bakı şəhər Binəqədi rayonu ərazisində keçirilibdi.

İki gün öncə Binəqədi rayonundakı Gənclər evində Xocalı faciəsi ilə bağlı yaddaqalan bir tədbir gerçəkləşdi. Tədbirin təşkilatçısı Binəqədi rayon İcra Hakimiyyəti yanında İctimai Şura idi. Elə tədbiri də həmin Şuranın rəhbəri Aslan Mehdiyev açdı. Yeri gəlmişkən, xatırladım ki, Aslan Mehdiyev təkcə qarabağlı, Füzuli rayonundan olub Qarabağ hadisələrinin şahidi kimi deyil, həm də bilavasitə həmin ağır zamanlarda Füzuli rayon İcra Hakimiyyətinə başçılıq etmiş şəxs olduğunda o, birbaşa proseslərin hər bir anından xəbərdar olmuşdu. Dəfələrlə Xankəndində olan Aslan Mehdiyev Dağlıq Qarabağda baş verən hadisələrin bütün məqamlarından xəbərdardı.

Elə tədbir iştirakçılarına Xocalı hadisələri lə bağlı danışan Aslan müəllim çıxışı zamanı Qarabağ bölgəsinin yaşantılarını diqqətə təqdim etmiş və proseslərin inkişafına Ümummilli Liderimizin hakimiyyətə ikinci dəfə qayıdışından sonra etdiyi güclü təsiri, baş verən cinayətin dünya arenasına çıxarılmasındakı xidmətlərini, eləcə də Azərbaycan Prezidenti cənab İlham Əliyevin, ölkənin birinci vitse-prezidenti Mehriban xanım Əliyevanın, həmçinin Heydər Əliyev Fondunun, eləcə də Fondun layiqli təmsilçisi Leyla Əliyevanın Xocalı həqiqətləri ilə bağlı bütün dünyada gerçəkləşdirdikləri tədbirlərdən, keçirdikləri görüşlərdən danışdı. Aslan Mehdiyev vurğuladı ki, Xocalı faciəsini dünyaya çatdırmaq, Xocalı qurbanlarını dünyaya tanıtdırmaq üçün ölkə rəhbərliyi böyük işlər görür. Bununla yanaşı, təkcə Xocalıdan olan soydaşlarımızın deyil, eləcə də ölkənin bütün şəhid, əlil, qaçqın, köçkün ailələrinə daimi diqqət və qayğı göstərilir. Azərbaycanda hər bir şəxs özünə prezident qayğısını açıq şəkildə hiss edir. Bu, xalqın prezidentə, prezidentin xalqa güvəninin bariz nümunəsi deməkdir.

Gənclər evində keçirilən tədbirdə çıxış edən Xocalı Soyqırımını Tanıtma İctimai Birliyinin Binəqədi rayon şöbəsinin rəhbəri Ayna Novruzova, Qarabağ Müharibəsi əlillərinin, veteran və şəhid ailələri rayon şöbəsinin rəhbəri İlham Qayıbzadə, eləcə də Ədalət Məhərrəmov, Zahid Quliyev, Aydın Alıyev və digərləri törədilmiş qətliamla bağlı fikirlərini söyləməklə yanaşı, müəyyən problemlərə də diqqəti çəkdilər. Həmin tədbirlərdə iştirak edən Binəqədi rayon İcra Hakimiyyəti Humanitar şöbəsinin müdir müavini Şəmsi Gülverdiyev də ölkə rəhbərliyinin şəhid ailələrinə, veteranlara, bütövlükdə hər bir vətəndaşlarımıza göstərdiyi diqqət və qayğıdan söhbət açaraq vurğuladı ki, Binəqədi rayon İcra Hakimiyyətinin başçısı və onun komandası da barəsində söhbət gedən məsələ ilə bağlı mütəmadi işlər görürlər və bundan sonra da bu istiqamətdə zəruri addımlar atılacaqdır. Bu həm bir vəzifə borcudu, həm də ölkə prezidentinin dövlət qurumları qarşısında qoyduğu başlıca məsələlərdən biridi.

Bəli, iki gün öncə Binəqədi rayonundakı Gənclər evində tədbirə yekun vuran Aslan Mehdiyev bir daha vurğuladı ki, ölkənin hər bir vətəndaşının borcu Vətənlə, torpaqlarımızın azadlığı ilə bağlı olan bütün məsələlərdə fəal olmaq və şəhidlərimizin müqəddəs ruhunun qisasının alınması üçün bir yumuruq kimi birləşməlidir. Bizim borcumuz Ali Baş Komandanın tapşırıqlarını yerinə yetirməyə hər an hazır olmalıyıq.

Ə.MƏDƏTOĞLU

Ədalət 2019.-22 fevral.- S.5.