Rəşid Faxralı Ana itirmişik...

Ünlü kardeoloq, Tofiq Tagı oğlu Tağıyevə

səmimiyyətlə

Bir vaxtlar mənim də anam varıydı,

Bir vaxtlar sənin də anan varıydı...

Saçını dan yeri daraqlayanda,

Könlünü göy üzü varaqlayanda,

Gözündən beş addım uzaq düşəndə

Qohumdan-qonşudan soraqlayanda,

Elə bilirdin ki, dünya sənindi;

Ana itirmisən ana yaşında...

Ana itirmişik...

Bu ağır itki

Ağır yük olubdu ürəyimizə.

Anasız açılan səhərlərimiz,

Qəhər gətiribdi hər birimizə.

Bir ömür verərək hər ötən ilə

Ana ömürünə gərək olardın.

Qüdrətin çatsaydı, bu sevgin ilə

Ana ürəyinə ürək olardın.

Səni kövrək görən, qəhərli görən

Göygözlü göylərin gözləri doldu.

Belə oğuluydun, ana sevgisi

Sənin həyatının işığı oldu.

Sən ana itirdin...

Anasızlığa

Həkim olmağınla üsyan elədin.

Ana sevgisini anasızlığın

Ağrı-acısına dərman elədin...

Analar yaşayır...

Bu müqəddəs ad

Ruhu rəvanların çatır dadına.

Ana sevgin ilə elə o vaxtdan

Bir heykəl qoyubsan ana adına!

Ədalət 2019.- 28 fevral.- S.8.