Dəhşətli qanlı gecə!

1992-ci il fevralın 25-dən 26-na keçən gecə "Soyqırım gecəsi" keçmiş Sovet ordusunun Xankəndi şəhərindəki 366-cı alayı ermənilər tərəfindən ələ keçirilərək Xocalı şəhərində qanlı terror keçirtdi, 613 nəfər qadın, uşaq və körpələri, kişiləri, qocaları qətlə yetirdi, 1275 nəfəri əsir götürdü. O qanlı qətl gecəsindən düz 27 il keçir. Bu qədər vaxt keçməsinə baxmayaraq, cinayətkar hələ də öz layiqli cəzasını almamışdır. Xocalılar hələ də Dünyadan və hökumətdən ədalət gözləyir. Mən o dəhşətli gecədə anamı və ağsaqqal atamı itirmişəm.

92-ci ilin bir qış gecəsi,

Şaxtalı, boranlı fevral gecəsi,

Tanklar nərildədi, toplar gurladı

Körpə balaların bağrı çatladı.

Dəhşətdən caşların yoldu analar,

Qorxunu içində boğdu babalar.

Yağı caynağına keçməmək üçün,

Bir qətrə zəhər də içdi sonalar...

Topların atəşi, tank nəriltisi,

Yazıq anaların ahı, naləsi

Dəyib bir-birinə çiliklənirdi,

Körpələr beşikdə inildəyirdi!

Mənim xəstə anam, nurani atam

O gecə Allahdan can diləyirdi.

Göydən başımıza mərmi yağırdı,

Xocalı od tutub alovlanırdı...

Gülüzlü sonalar qızlar, analar

Körpə balaları bağrına basıb

Zülmət meşələrə üz tuturdular...

Yağı ermənilər vahimələmişdi.

Ələ keçənləri güllələyirdi,

Bəyaz qan üstünə qan çilənirdi.

O gecə qan içdi, qudurdu düşmən,

Aldı başımızın üstünü birdən!..

Göydən başımıza odlar yağırdı,

Mənzillər od tutub alovlanırdı...

Vətənin general oğulları da

Büllur saraylarda xumarlanırdı.

***

Erməni-rus o gecə

Yurduma qəsd etdilər

Beşikdə körpələri

Süngüyə keçirtdilər!

İqtidar qocaları,

Ağbirçək nənələri

Qana qəltan etdilər,

Pratez dişlərini

Kəlbətinlə çəkdilər.

Ya Rəbbim sən hardaydın

Yatmışdınmı o gecə?

Qızıl qana dönmüşdü,

Qar-qar çayı o gecə...

27 il öncə itirdim Xocalımı,

İtirdim Xocalıda şəhid ata-anamı

Bir gecənin içində əldən getdi varımız...

Yağıya qismət oldu, talandı yurd-yuvamız...

Babaların məzarın dağıdıbdı yağılar

Mənim şəhid anamın sümüyünü tapdayırğ

Səhər-axşam dığalar...

3. 27 il öncə gəlib keçdi ömürdən,

Xocalı soyqırımı ömrümüzə saldı çən.

Yeri-göyü titrətdi o qanlı faciəmiz,

İllər keçsə də belə, o dəhşətli gecəni

Unuda bilmərik biz!..

27 il beləcə ömürdən, gündən keçdi

Arzumuz daşa dəydi, bəxtimiz gendən keçdi

Xocalı yoxdur artıq, xəyallara dönübdü.

Yağıların əliylə işığımız sönübdür!..

Möhtəşəm evlərimiz yağıya qismət olub,

Atamın cənazısi gorsuz, kəfənsiz qalıb.

Yüz illik yurd-yuvamız düşmənə qismət olub,

Məktəbli balalarım meşələrdə çürüyüb,

vəhşilərə yem olub!

Nə etməli a dostlar,

Mənim salamatlığım

Bir alın yazısıymış

Yurdumu oda yaxmaq,

Düşmənlərin əzəldən

Niyyəti arzusuymuş!..

Bu gün məni yaşadan

Nə sudur, nə də çörək

Xocalıya bir zaman

Qayıtmaq ümidiylə

Sinəmdə vurur ürək!

Necə unudum, necə

Mən o qanlı çağları?

Yurdumuza vurulan

Çalın-çarpaz dağları?

Ümid edirəm ki mən,

Bu dərd çox uzun çəkməz

Arxalı köpəklərə, acgöz siçovullara

Bizdən çatar biz əvəz.

Qalxın, ayağa durun,

Ey vətən oğulları!

Sizdən xilas gözləyir

Xocalı torpaqları,

Qarabağ torpaqları!

18 gün əsirlik həyatı yaşamış

Cəfər XOCALI

Mingəçevir şəhəri, Yeni həyat qəsəbəsi

Ədalət $g 2019.- 1 mart.- S.7.