Əjdər Həmidov: "Film tariximizdə ən yüksək qonorarı mən almışam"

Akademik Milli Dram Teatrının tanınmış aktyoru, Xalq artisti Əjdər Həmidov "Ədalət" qəzetinin suallarını cavablandırıb.

- Əjdər müəllim, istərdim ki. müsahibəmizə sizi təbrik etməklə başlayım. Bildiyim qədər b yaxınlarda Prezident İlham Əliyev sizə mənzil hədiyyə edib.

- Təbrik üçün təşəkkür edirəm. Mənzil mənə Prezidentin mədəniyyət və incəsənət xadimləri ilə görüşü ərəfəsində hədiyyə edilmişdi.

- Prezidentin mədəniyyət və incəsənət xadimləri ilə görüşündə iştirak edirdiniz

- Xeyr, iştirak etmirdim. Amma həmin görüşün sənət üçün çox böyük faydası oldu. Həm sənət adamalrının məvacibləri artırıldı, həm də bir neçə sənət adamına, o cümlədən mənə mənzil hədiyyə edildi.

- Mənzillə bağlı müraciət etmişdiniz?

- Xeyr, müraciət etməmişdim. Prezident özü kimi məsləhət bilibsə, onlara Novruz hədiyyəsi etdi.

- Bundan böyük Novruz hədiyyəsi almışdınızmı?

- Heç vaxt bundan böyük hədiyyə almamışam. Həyatda ən böyük hədiyyəm bu olub. Yeddi ayın içərisində həm Xalq artisti fəxri adına layiq görüldüm, həm də mənzillə təmin edildim.

- Hər kəs bilir ki, sənət aləmində qalmaqalsız insanlardan birisiniz. Amma buna rəğmən hər zaman qiymətləndirilirsiniz. Ancaq bəzi gənc həmkarlarınıza elə gəlir ki, nə qədər çox qalmaqal etsələr, daha tez uğur qazanacaqlar. Bu mənada gənclərə tövsiyyələriniz maraqlıdır.

- Gənclərə tövsiyyəm budur ki, qalmaqallardan uzaq olsunlar, başlarını aşağı salıb işlərini görsünlər. İş görmək, sənət yaratmaq, işgüzar, zəhmətkeş olmaq lazımdır. Bu mənim qırx illik əməyimin bəhrəsidir. Qırx ildir bu sənətdəyəm, otuza yaxın filmə çəkilmişəm. Həm Sumqayıt dövlət Dram Teatrında, həm də "Azdrama"da onlarla rollar oynamışam. Bu uğurları qazanmaq üçün gecə-gündüz işləmişəm, zəhmət çəkmişəm. Gənclər sənətlə məşğul olsalar, fəxri ad və digər məsələlər özü gələcək.

- Yəqin ki, sizi də nə vaxtsa qalmaqala çəkmək istəyənlər olub...

- Qətiyyən qoşulmamışam. Öz dünyam, öz aləmim var. Həmişə öz fikrimlə hərəkət etmişəm və yekunda məlum olub ki, doğru mövqedəyəm. Heç vaxt uduzmamışam.

- Hazırda filmə, seriala çəkilirsinizmi?

- İki seriala dəvət almışam. Allah qoysa bayramdan sonra çəkilişlərə başlayacağıq.

- İstərdim ki, bir az da gənc aktyorların problemlərindən danışaq. "Azdrama"da gənc aktyorların hansı problemləri var?

- Bütün teatrlarda olduğu kimi, bizim teatrın da problemləri var. İlk növbədə məvacib problemi idi ki, bu, müəyyən qədər həllini tapdı. Gənc aktyorların digər problemi mənzil şəraitləri ilə bağlıdır. Bir çox aktyorlarımız hələ də kirayədə yaşayırlar. Cənab Prezident də həmin görüşdə bu məsələyə də toxundu. Sevindirici haldır ki, aktyorların məvacibləri əlli faiz artırıldı və ümid edirəm ki, yenidən artım olacaq. Ümid edirəm ki, gənc atkyorlar üçün bina tikiləcək və onlar da öz arzularına çatacaqlar.

- Son illər dövlət tərəfindən filmlərə, seriallara xeyli vəsait ayrıldı. Amma bəzi sənətkarlar, məsələn, Afaq Bəşirqızı müsahibəsində bildirmişdi ki, həmin vəsait daha çox bəzi rejissorların varlanmasına, evlərini, avtomobillərini yeniləməsinə xidmət etdi...

- Belə xətalar baş verib. Amma bu bir az qaranlıq məsələdir, aydınlıq gətirmək mümkün deyil. Çox istərdim ki, ayrılan vəsaitdən səmərəli istifadə edilsin. Ayrılan vəsait sənətə xidmət etməlidir, şəxslərə yox. Sözün əsl mənasında filmlər çəkilməlidir, Azərbaycan kinosunun şöhrətini, tarixini qaytarmaq lazımdır. Prezidentin etdiklərinin qarşılığında bizdən yaxşı filmlər çəkmək, tamaşalar qoymaq tələb olunur. Sənət yaratmaq lazımdır. Bu iş bizim üzərimizə düşür.

- Çəkildiyiniz filmlərdən, seriallardan aldığınız qonorar sizi qane edirmi?

- Qətiyyən qane etmir. O seriallardan aldığımız qonorar, qonorar deyil, qəpik-quruşdur. Biz həmin məbləğin bir neçə qatını almalıyıq. Aktyora normal pul vermək lazımdır. Məsələn, bizdə seriallar çəkiləndə rejissor oturur pulun üstündə. Ayrılan pulu cibinə qoyur, aktyorlara qəpik-quruş paylayır. Belə olmaz!

- Hətta bildiyim qədər aktyorlarla müqavilə də imzalanmır...

- Bəli, elə aktyorlar var ki, pulsuz çəkilirlər. O aktyorlara üzümü tutub deyirəm ki, çəkilməyin, özünüzə qiymət verin. Pulsuz, təmənnasız çəkilməyin. Ucuz ətin şorbası olar? Aktyor öz dəyərini bilməsə, onu heç kim qiymətləndirməyəcək.

- Yəqin ki, sizə də qonorarsız çəkilmək təkliflər olub.

- Əlbəttə, olub. Əgər qonorarsız çəkilsəm, gərək bütün seriallara çəkiləm.

- Sizə elə gəlmirmi ki, bu məsələdə bəzi təcrübəli aktyorların da təqsiri var. Çünki onların da bəziləri efirdə görünmək xatirinə pulsuz çəkilirlər.

- Əlbəttə, onların da təqsiri var. Aktyorluğu hörmətdən salırlar. Ekranda görünmək, gündəmdə olmaq xatirinə seriala, filmə çəkilməzlər. Mənim ilk filmim "Kişi sözü" olub. O filmdən də necə lazımdırsa qonorarımı almışam. Ondan sonra da otuza yaxın filmə çəkilmişəm. Çünki sənətlə, filmlə uğur qazanmışam, başqa yollarla yox.

- İndiyə qədər ən yüksək qonorarı hansı filmdən almısınız?

- Ən yüksək qonorarı "Yoxlama" filmindən almışam. Qonorarımı dollarla verdilər. Hətta ola bilər ki, film tariximizdə, müəyyən aktyorlar belə qonorar ala biliblər.

- Söhbət hansı məbləğdən gedir?

- Məbləği açıqlamaq istəmirəm.

- Yəqin ki, söhbət 30-40 min dollardan gedir.

- Bəli, təxminən. Bizim film tarixində on min manatdan yuxarı qonorar alan olmayıb. Olsa da cəmi bir neçə aktyor belə qonorar alıb. Sadəcə onu deyə bilərəm ki, 1987-ci ildən bu günə qədər çəkildiyim filmlərdə ən yüksək qonorarı "Yoxlama"da almışam.

İntiqam VALEHOĞLU

Ədalət 2019.- 19 mart.- S.8.