YAZIÇI-JURNALİST RAFİQ HACIYEVİN 65 İLLİK YUBİLEYİ QEYD OLUNDU

Azərbaycan Mətbuat Şurası Ahıl Jurnalistlər Məclisinin "Keçmişə ehtiramla, gələcəyə inamla!" layihəsi çərçivəsində növbəti tədbiri keçirilib. Bu dəfəki tədbir tanınmış yazıçı-jurnalist Rafiq Hacıyevin 65 illi yubileyinə həsr olunub.

Aprelin 30-da Beynəlxalq Mətbuat Mərkəzində baş tutan tədbirdə millət vəkilləri, tanınmış ictimaiyyət nümayəndələri, jurnalistlər, sənət adamları və yubliyarın qələm dostları iştirak ediblər.

Mərasimdə çıxış edən Azərbaycan Mətbuat Şurası Ahıl Jurnalistlər Məclisinin Məzahir Süleymanzadə lahiyə haqqında geniş məlumat verib. Daha sonra Rafiq Hacıyevin həyat və yaradıcılığından danışarkən onu Azərbaycan jurnalistikasında özünəməxsus dəsti-xətti, yazı duyumu olan qələm sahibi kimi dəyərləndirib.

Qeyd edib ki, Rafiq Hacıyevin yeniyetmə dövründən rəssamlığa, musiqiyə, incəsənətə və jurnalistikaya çox böyük həvəsi olub və ilk rəsm əsərləri "Azərbaycan pioneri", ilk məqalələri isə rayon qəzetlərində çap olunub. O, 1975-1980-cı illərdə indiki Bakı Dövlət Universitetinin Jurnalistika fakültəsində təhsil alıb. Tələbə ikən nüfuzlu "Kommunist" qəzetində çalışan R.Hacıyevin imzası da məhz burada tanınmağa başlayıb. Uzun illər qəzetdə müxbir, baş müxbir, məsul katib müavini və məsul katib vəzifələrində çalışıb. Eini zamanda bu nəşrə əlavə çıxan "Səhər" qəzetin də məsul katibi olub.

1986-cı ildə "Kommunist"in müxbiri kimi "Laçın" rayon qəzeti redaksiyasında uzun müddət yaradıcılıq ezamiyyətində olub, qəzetin forma və məzmununun daha da yaxşılaşdırılmasında kollektivə yaxından praktiki əməli kömək göstərib. 1991-1993-cü illərdə "Azərbaycan", "Həyat" (keçmiş "Sovet kəndi") qəzetlərində məsul katib, Xaricdəki Həmvətənlərlə Azərbaycan Mədəni Əlaqələr Cəmiyyətinin - "Vətən" Cəmiyyətinin orqanı olan "Odlar Yurdu" qəzetinin Baş redaktoru vəzifələrində çalışıb.

1993-95-ci illərdə Azərbaycan Dövlət İnformasiya Agentliyinin - AZƏRTAC-ın müxbiri və buraxılış redaktoru işləyərkən Azərbaycan Respublikasının Prezidenti cənab Heydər Əliyevin iştirak etdiyi dövlət tədbirlərinin, qəbulların, müşavirə və iclasların işıqlandırılmasında peşəkar jurnalist kimi çox yaxından iştirak edib.

Azərbaycan Respublikası Baş Prokurorluğu Mətbuat Mərkəzinin məsul əməkdaşı olarkən isə bu orqandakı səmərəli fəaliyyəti və qüsursuz fəaliyyəti zamanı prokurorluğun 80 illik yubileyinə və ən maraqlı cinayət işlərinin istintaqına həsr edilmiş geniş həcmli "İstintaqı peşəkarlar aparır" bədii-sənədli kitabı nəfis tərtibatla, kütləvi tirajla çap olunub.

Rafiq Hacıyev illərdən bəri jurnalistika və publisistika sahəsində yorulmadan çalışdığını deyən M.Süleymanzadə onun portret yazılarını xüsusi vurğulayıb. Qeyd edib ki, yubliyar publisistik və ədəbi-bədii yazılarına görə "Həsən bəy Zərdabi" Media, "Cəfər Cabbarlı", "Rəsul Rza" ədəbi mükafatlarına layiq görülüb.

Mətbuat Şurasının sədri, millət vəkili Əflatun Amaşov çıxışında Rfiq Hacıyevin yaradıcılığı haqqında fikirlərini bölüşüb. R.Hacıyevi ən məhsuldar jurnalistlərdən biri kimi dəyərləndirən Ə.Amaşovun çıxışından sonra yubliyara "Azərbaycan mətbuatının inkişafında xidmətlərinə görə və 65 illik yubileyi münasibətilə" Mətbuat Şurasının xüsusi diplomu və qiymətli hədiyyəsi təqdim olunub.

Millət vəkili Çingiz Qənizadə deyib ki, Rafiq Hacıyev istedadı, peşəkarlığı ilə yanaşı, zəhmətkeçliyinə görə də seçilir. Onun Vətənə, millətə, milli-mənəvi dəyərlərə, muğama, musiqimizə sevgisi, diqqəti hər zaman gənclərə örnək olmalıdır.

Millət vəkili, yazıçı Aqil Abbas çıxışında Rafiq Hacıyevin muğama, musiqiyə sevgisindən danışaraq bildirib ki, onun yazılarında muğamın ecazkar səsi, azərbaycan musiqisin gözəlliyi eşidilir. Aqil Abbas çıxışında yubliyara Azərbaycan milli mətbuatının inkişafındakı xidmətlərinə görə "Əməkdar jurnalist" fəxri adının verilməsini təklif edib.

Azərbaycan Aşıqlar Birliyinin sədri, Dövlət mükafatı laureatı, əməkdar elm xadimi, professor Məhərrəm Qasımlı çıxışında tanınmış publisist və jurnalist Rafiq Hacıyevi yubleyi münasibətilə təbrik edib və onun dərin təhlil gücü ilə səciyyələnən rəngarəng, canlı və dolğun yazılarında poetik təsvirlərin, cəlbedici təhkiyənin, ana dilinin bədii imkanlarından ustalıqla faydalanmaq məharətinin həmişə xüsusi diqqəti çəkdiyini vurğulayıb.

Xalq artsti, Dövlət mükafatı laureatı, professor, tarzən Ramiz Quliyev Rafiq Hacıyevin yüksək jurnalist peşəkarlığından, publisistikanın qiymətli nümunələri olan əsərlərindəki mükəmməl ədəbi dilin şirinliyindən və əsrarəngiz gözəlliyindən, heç zaman dəyişməyən obyektiv mövqeyindən, qələmə aldığı hər bir mövzuya səriştəli, ədalətli baxışından, yazıçının yüksək vətəndaşlıq mövqeyindən söz açıb.

Rafiq Hacıyevi jurnalistikanın "təmiz nəfəsi" adlandıran Bakı Dövlət Universitetinin professoru, filologiya elmlər doktoru Qulu Məhərrəmli çıxıçında onun yaradıcılığını sistemli şəkildə oxuduğunu deyib: "hərdən Rafiq Hacıyevin yazılarını toplayıb birdən oxuyuram. Onun publisistik yazılarını bu cür sistemli şəkildə oxuyanda sanki bir roman, iri həcmli bədii əsər oxuyursan. Onun yazılarının özünəməxsus dili var. Bu cür bədii, obrazlı dil jurnalistikamızın uğurudur".

Daha sonra qonaqlardan Əməkdar jurnalist Şəmsiyyə Kərimova, jurnalist İlqar Həsənov, Əməkdar müəllim, şair Oqtay Rza, Əməkdar jurnalist Adil Cəmil, şair Maşallah Məftun, prokurorluğun fəxri işçisi, baş ədliyyə müşaviri ilham Abbasov, şair Ramiq Muxtar, Şahid Abbasov, jurnalist Əhməd Məmmədov, qabaqcıl maarif xadimi Tofiq Kərimov, Əməkdar jurnalist Tahir Aydınoğlu və başqaları çıxış edərək Rafiq Hacıyevin yaradıcılığı, şəxsiyyəti haqqında xoş sözlərini çatdırıb, onu yubiley münasibətilə təbrik ediblər.

Sonda söz alan Rafiq Hacıyev ona göstərilən bu diqqətə görə Azərbaycan Mətbuat Şurasına, şuranın Ahıl Jurnalistlər Məclisinə, tədbirdə iştirak və çıxış edənlərə təşəkkürünü bildirib.

Şamxal

Ədalət.-2019.-3 may.-S.6.