Sənin alın yazındı bu Vətən...

Hər bir yeni kitab bir işıqdır, bir nurdur. Və yer üzünü, insanların qəlbini , ürəyini işıqlandırır! Adam var ki, bir gün kitab oxumasa, ürəyi partlayar. Bu mənada kitab bizə hava, su, çörək kimi çox lazımdır.

"Sənin alın yazındı bu Vətən... " kitabı da belə dəyərli, unikal bir kitabdır. Bu kitab Azərbaycan Aşıqlar Birliyinin sədri, Əməkdar elm xadimi, Dövlət Mükafatı laureatı, " Şöhrət" ordenli, professor Məhərrəm Qasımlıya həsr olunmuş elmi məqalələr, filoloji dəyərləndirmələr, publisist yazılar, müsahibələr, müəllifə həsr olunmuş şeirlər və təbriklər toplusudur.

Topludakı yazılar təqribən son qırx ildə Məhərrəm Qasımlı- Orxan Paşa haqqında mətbuatda gedən , ekran- efirdə yer alan materialların seçilmiş örnəkləridir. Bu kitab görkəmli alim və şairin ömür yolu, elm və sənət axtarışlarının əsas istiqamətləri , folklora, ozan- aşıq mədəniyyətinə qeyrətkeş və qədirşünas münasibəti barədə dəyərli bir qaynaqdır.Onun da qeyd edək ki, kitabda bu yazının müəllifinin də professor Məhərrəm Qasımlı barədə beş məqaləsi çap olunub.

Kitabı hazırlayan Əməkdar mədəniyyət işçisi Musa Nəbioğlu, elmi redaktorları filologiya elmləri üzrə fəlsəfə doktoru, dosent Aynur Xəlilova, filologiya elmləri üzrə fəlsəfə doktoru, dosent Altay Məmmədlidir. Yazımızı professor Məhərrəm Qasımlının ( Orxan Paşanın) bu fikirləri ilə tamamlayırıq:" Əsl ziyalılıq odur ki, sən dərbəndli olmadan tutduğun əməllər, hərəkət və davranışlarını görən Dərbənd camaatı elə bilsin sən də Dərbəndlisən , lənkəranlı sən Lənkərandan, gəncəli səni Gəncədən, naxçıvanlı səni Naxçıvandan, qarabağlı Qarabağdan, təbrizli Təbrizdən, urmiyalı Urmiyadan , zəncanlı Zəncandan, borçalı Borçalıdan, göyçəli Göyçədən, şirvanlı Şirvandan bilsin.

Sevginlə , əməlinlə Vətən boyda görünəsən , Vətənin hər yerindən görünəsən ".

Emil Faiqoğlu

Ədalət. - 2025.- 19 sentyabr (№35).- S.6.