Ümumrespublika müşavirəsi keçirildi

M. F. Axundov adına Milli Kitabxanada Mədəniyyət və Turizm Nazirliyinin təşkilatçılığı ilə Azərbaycanda fəaliyyət göstərən nəşriyyat və poliqrafiya müəssisələri rəhbərlərinin ümumrespublika müşavirəsi keçirilib. APA-nın məlumatına görə, mədəniyyət və turizm nazirinin müavini Ədalət Vəliyev bildirib ki, müşavirədə məqsəd ölkədə fəaliyyət göstərən nəşriyyat və poliqrafiya müəssisələrinin fəaliyyəti ilə tanışlıq, mövcud problemlərin müzakirəsi, eyni zamanda kitab yaradıcılığı sahəsində geniş əməkdaşlığa nail olmaqdır: "Hazırda Azərbaycanda çoxsaylı nəşriyyatlar fəaliyyət göstərir. Ancaq təəssüf ki, nəşriyyatlarda çap olunan kitablar kitabxanalara verilmir. Halbuki "Nəşriyyat haqqında" qanuna görə, hər nəşriyyat çap etdiyi dörd kitabı kitabxanalara verməlidir".

Ə. Vəliyev nazirliyin 10 nəşriyyatla əməkdaşlıq etdiyini və onların buraxdığı nəşrlərdən xəbərdar olduğunu söyləyib. Son illər Azərbaycanda kitab çapı sahəsində irəliləyişlər olduğunu diqqətə çatdıran nazir müavini, xarici ölkələrdə keçirilən kitab-yarmarkalarda Azərbaycan kitablarının sərgilənməsini buna misal göstərib.

Müşavirədə nəşriyyat və çap evlərinin rəhbərləri də çıxış edərək öz fikir və mülahizələrini bölüşüblər, eyni zamanda problemlərin həlli istiqamətində təkliflər veriblər.

Toplantı ilə əlaqədar Milli Kitabxana Mədəniyyət və Turizm Nazirliyinin 2006-2009-cu illərdə nəşr etdirdiyi kitabların sərgisini təşkil edib.

Ədalət.- 2009.- 2 iyul.- S. 4.