Bəxtiyar Sadıqovun yeni kitabı çıxdı

"Ömrün söz yadigarı" adlanan kitab dörd fəsildən ibarətdir: "Tarixi yaradanlar və yaşadanlar", "Ziyalı sözü, vətəndaş mövqeyi", "Qarabağa gedən yol", "Mətbuat və mənəvi dəyərlər".

Kitabda B.Sadıqovun müxtəlif illərdə "Azərbaycan" qəzetində çap olunmuş yazıları toplanıb. Topluya B.Sadıqovun 2007-ci ilin dekabrında "Media forum" saytına verdiyi müsahibəsi də daxil edilib.

"Ömrün söz yadigarı"na yazdığı ön sözdə müəllif bildirir: "Dünya sözlə yaranıb, sözlə yaşayır, sözlə idarə olunur. Söz ürəyin açarı, düşüncənin gerçəkliyidir. Elə ki sözün yerinə silahlar danışır, onda fəlakət başlayır. Bu, həm də sözün qüdrətinin və sülh təbiətli olmasının təsdiqidir.

İnsan dil açandan əbədi susanadək saysız-hesabsız söz işlədir. Onların gərəklisi, şirini də olur, xoşagəlməzi, acısı da! Amma yadda qiymətlisi, təəssüf ki, hərdən də yaralayanı qalır. Hansı yaxşıdır, - yəqin belə bir mübahisə açmaq da mənasızdır. Bəs, söz demək üçün insana nə lazımdır? Təbii ki, əvvəlcə söz söyləmək istedadı. Sonra dediyinin eşidilməsi üçün ağıllı mühakimə yürütmək bacarığı və bir də mənəvi haqq! Daha sonra sözün deyilmə tribunası. Ən nəhayət, söz deməyə cəsarət və bəlkə də ondan vacibi sayılan sözü deyə bilmək məharəti! Bunlar olmasa, deyilən sözlər mənasız yığına çevrilir. Onu nə dinləyən olur, nə də oxuyan. İşdir, kimsə təsadüfən və yaxud məcburən belə sözlə rastlaşırsa, bir şey deməsə də, başını bulamaqla münasibətini ifadə edir.

Az qala ən vacib şərti unutmuşduq. Tutarlı söz demək üçün həm də insana ömür gərəkdir. Çətinlik, sınaqlarla dolu, dostlar əhatəsində keçən bir ömür...

Müdrik o kəsdir ki, dediyi söz eşidilib.

O kəslər xoşbəxtdirlər ki, dedikləri söz yadigara çevrilib.

Zamanın sınaqlarından keçib gəlmək isə sözün xoşbəxtliyidir".

"Ömrün söz yadigarı" kitabının redaktoru filologiya elmləri namizədi Afət Sadıqova, buraxılışa məsul jurnalist İxtiyar Hüseynlidir.

Bəxtiyar Yusif oğlu Sadıqov 1951-ci ildə Ağdam şəhərində anadan olub. 1974-cü ildə Bakı Dövlət Universitetinin jurnalistika fakültəsini bitirib. 40 ilə yaxındır mətbuatda çalışır. "Abşeron" qəzetində redaktor müavini, "Kommunist" qəzetində şöbə müdiri vəzifəsində işləyib, Qarabağ müharibəsi dövründə - 1991-1993-cü illərdə "Həyat" və "Azərbaycan" qəzetlərinin Qarabağ bölgəsi üzrə xüsusi müxbiri olub.

Qarabağ müharibəsindən bəhs edən "Qeyrət və xəyanət", habelə "İnsan və zaman", "Həqiqət və yalan" kitablarından əlavə ictimai-siyasi mövzuda yazılmış 20-dən artıq kitabın həmmüəllifi və redaktoru olub.

2-ci və 3-cü çağırış Milli Məclisin deputatı və "Azərbaycan" qəzetinin baş redaktorudur. Mətbuat Şurası İdarə Heyətinin, Yazıçılar və Jurnalistlər birliklərinin, Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının üzvüdür. 2005-ci ildə prezidentin sərəncamı ilə "Əməkdar jurnalist" fəxri adına layiq görülüb.

Ədalət.- 2009.- 24 iyul.- S. 4.