Təşviqata "dayan" əmri

Bu gün 18 mart referendumunda təşviqata ayrılmış müddət başa çatır. Sabahdan təşviqat qadağandır.

Mərkəzi Seçki Komissiyasında qeydə alınmış 9 təşviqat qrupu - "Yeni Azərbaycan" (hakim Yeni Azərbaycan Partiyasının yaratdığı qrup), "Şəhər" (bir sıra rayon və şəhər bələdiyyələrində, universitetlərdə yaradılmış qrup), "Tərəqqi" (bir sıra rayon və şəhər bələdiyyələrində, universitet və idarələrdə yaradılmış qrup),"Hüquq və Demokratiya" (hüquqşünaslar qrupu), "Vətəndaş Cəmiyyəti" (QHT rəhbərlərinin yaratdığı qrup), "Davamlı İnkişaf Naminə" (gənclər qrupu), "Zəka" (alimlər qrupu), "Respublikaçılar" (Müsavat Partiyasının yaratdığı qrup), "Qarabağ və Respublika Uğrunda Vətəndaş Hərəkatı" (AXCP, ADP, Ümid, Liberal, Vətəndaş və İnkişaf partiyalarının yaratdığı qrup) fevralın 18-dən təşviqat aparır.

Martın 18-də Azərbaycanda konstitusiya dəyişiklikləri üzrə referendum keçiriləcək. Referendum aktı layihəsində 29 maddədə 41 dəyişiklik təklif olunur. Ən prinsipial dəyişiklik ana qanunun 101-ci maddəsində (Azərbaycan Respublikası prezidenti seçkilərinin əsasları) nəzərdə tutulur. Bu maddədən @Heç kəs iki dəfədən artıq təkrarən Azərbaycan Respublikasının prezidenti seçilə bilməz" müddəasının çıxarılması təklif olunur.

Bu, müstəqil Azərbaycanın tarixində 5-ci referendum olacaq. 1991-ci il dekabrın 29-da keçirilmiş ilk referendumda secicilər Azərbaycanın dövlət müstəqilliyi haqqında konstitusiya aktına münasibət bildiriblər. 1993-cü il avqustun 29-da prezident Əbülfəz Elçibəyə etimad göstərilməsi məsələsi haqqında ümumxalq səsverməsi olub. 1995-ci il noyabrın 12-də keçirilmiş referendum Azərbaycan Respublikası Konstitusiyasının qəbulu məsələsinə həsr edilib. 2002-ci il avqustun 24-də keçirilmiş ümumxalq səsverməsi Azərbaycan Respublikası Konstitusiyasında dəyişikliklərə yönəlib.

Anar

Ədalət.- 2009.- 17 mart.- S. 3.