"Heydər Əliyev: Şəxsiyyət fenomeni" mövzusunda konfrans keçirildi

Dünən Azərbaycan Milli Elmlər Akademiyasında "Heydər Əliyev: Şəxsiyyət fenomeni" mövzusunda konfrans keçirilib.Tədbiri giriş sözü ilə açan hüquq elmləri namizədi Aytən Mustafayeva tədbirin AMEA-nın bir ənənəsinə çevrildiyini deyib.

Daha sonra konfransda təhsil nazirinin müavini İradə Hüseynova çıxış edib. O, Heydər Əliyevin Azərbaycan tarixində mühüm yer tutduğunu vurğulayıb: "Heydər Əliyev dünyada peşəkar siyasətçi kimi tanınır. Onun hakimiyyət illərində saysız-hesabsız azərbaycanlı tələbə dünyanın ən qabaqcıl ölkələrində təhsil alıb".

İ.Hüseynova müəllifi olduğu "Heydər Əliyev və Qafqazda sülh prosesi" adlı dərsliyin mayın 13-də işıq üzü görəcəyini bildirib.

Millət vəkili Rəbiyyət Aslanova isə Heydər Əliyevin siyasi fəaliyyətindən danışıb: "Mən ruhun varlığına inanan insanam. İnanıram ki, Heydər Əliyevin ruhu bu gün də bizim üzərimizdədir. O, böyük azərbaycanlı idi. Onun adı dünyanın ən qabaqcıl siyasətçilərinin adı ilə yanaşı çəkilir".

Ailə, Qadın və Uşaq Komitəsinin sədri Hicran Hüseynova isə Heydər Əliyevin siyasəti nəticəsində Azərbaycanda qadınların fəallığının artığını söyləyib: ""Heydər Əliyev deyirdi ki, qadınlar dünyanın bəzəyidir. Qadınsız cəmiyyət ola bilməz. Biz qadınlarımızla fəxr edirik".

Tədbirdə millət vəkilləri Qənirə Paşayeva, Aydın Mirzəzadə, Zahid Oruc, Zəlimxan Yaqub və digər şəxslər də iştirak ediblər.

Ömər

Ədalət.- 2009.- 8 may.- S. 6.