Əbülfəs Qarayev: "Bu il Azərbaycanın turizm sahəsində 10%-lik artım gözlənilir"

 

 Bu il ərzində Azərbaycanın turizm sahəsində 10%-lik artım müşahidə olunacaq. "APA-Economics"in məlumatına görə, bunu Azərbaycanın mədəniyyət turizm naziri Əbülfəs Qarayev bildirib.

Nazirin sözlərinə görə, qlobal maliyyə böhranı ilə əlaqədar Azərbaycanın turizm sahəsində artım əvvəlki səviyyədə olmayacaq: "Əlbəttə, biz ötən ilki 40%-lik artımı əldə edə bilməsək , cari ilin sonuna kimi bu sahədə 10%-lik artımın müşahidə olunacağı gözlənilir. Belə ki, bu il Bakı İslam Mədəniyyəti Paytaxtı seçilib paytaxtımızda bir çox tədbirlər keçirilir. Bununla əlaqədar turistlərin Azərbaycana axını müşahidə olunur".

Ə.Qarayev onu da qeyd edib ki, hazırda bir sıra ölkədə qeydə alınan H1N1 virusuna yoluxma halları Azərbaycanın turizm sahəsinə təsir etməyəcək: "H1N1 virusu Meksika Kubaya ciddi təsir göstərib, Avropa ölkələrinə isə bu proses tədricən daxil olur. Azərbaycanda hələlik belə bir hal müşahidə olunmayıb. Həmin regionlardan Azərbaycana turist axını az olsa da, Azərbaycan Səhiyyə Nazirliyi müvafiq tədbirlər görür".

 

 

 Ədalət.- 2009.- 20 may.- S. 4.