Xeyriyyə tədbiri keçirildi
Bu günlərdə Gözdən Əlil Uşaqlar
üçün Respublika İnternat Məktəbində
"Qafqaz Media" İctimai Birliyinin xəttilə tədbir
keçirilmişdir. Birliyin sədri Hacı Azadə Taleh
Abbasqızı tədbiri açıq elan edərək
demişdir:
- Hörmətli qonaqlar, əziz
valideynlər və şagirdlər, bu gün "Qafqaz
Media" İctimai Birliyi öz sənət dostları ilə
birlikdə sizin qonağınızdır. Bizim Birlik tez-tez belə
tədbirlər, xeyriyyə marafonları keçirir. Bu ilin
yanvar ayının 7-də Suraxanı rayonundakı Əqli Cəhətdən
Qüsurlu Uşaqlar üçün internat məktəbində
və yenə də yanvar ayının əvvəllərində
Gəncə "SOS" uşaq kəndində valideyn himayəsindən
məhrum olan uşaqlar ilə görüş
keçirmişik, körpə balalarımızı
sevindirmişik. Bizim Birlik bu il respublikamızda uşaq ili elan
edildiyini nəzərə alaraq ilin sonuna kimi yüzdən
çox belə tədbirlər keçirəcək. Biz
insanlıq və vətəndaşlıq borcumuzu yerinə
yetiririk, bu işlərimizdən sadəcə olaraq
könül rahatlığı tapırıq.
Sonra söz müğənnilərimizə verildi. Respublikamızın əməkdar artistləri Firuzə İbadova və Ruhəngiz Allahverdiyeva öz çıxışları ilə dinləyicilərin diqqətini cəlb etdilər. Sonra AMEA-nın əməkdaşı, xeyriyyəçi Xədicə Murad söz alaraq dedi:
- Bu cür tədbirlərin tez-tez keçirilməsi gənc nəslin təlim-tərbiyəsində çox böyük rol oynayır. Əziz uşaqlar, bilirik ki, sizin aranızda şeir yazan, rəsm ilə məşğul olan istedadlı uşaqlar da var. Mən onlara hər zaman köməklik göstərməyə hazıram. Şagirdlərdən Şəhriyar Həsənovun və Aynurun şeir kitablarının çap xərcini öz öhdəmə götürürəm və gələcəkdə də belə istedadlı uşaqlara kömək edəcəm.
Yenə söz müğənnilərə verildi. Gənc müğənni Fatma Abdullayeva, Ataxan İsmayılov, İbrahim Borçalı, Anar Abdullayev, Nicat Həsənov, Səlim Abbasov, Arif Səlimov, Aşıq Pəri məclisinin üzvü Aidə Gülzar, Seyid Əmin Nur Təbrizi çıxış edərək öz yeni mahnıları ilə dinləyicilərin zövqünü oxşadılar. Tədbirdə şairlərdən Fərqanə Mehdiyeva yeni şeirlərini oxudu.
Azərbaycan-Türkiyə Gənclərinin Dostluq Cəmiyyətinin sədri Kadir Yıldız çıxış etdi və Hacı Azadə xanımı fəxri fərmanla təltif etdi. Hacı Azadə xanım məclisdə çıxış edənlərə təşəkkürnamə təqdim etdi və məclis üzvlərinə öz səmimi minnətdarlığını bildirdi.
Uşaqlara oyuncaqlar, boyama fırçaları, şirniyyatlar hədiyyə edildi və sonda tədbirin üzvləri xatirə şəkli çəkdirdilər.
Bəydəmirli Rəşad
Ədalət.- 2009.- 11 fevral.- S. 6.