Brilliant Dadaşova: "Mən sənətimi dəlicəsinə sevən insanam"

Və dostluğa inanır

Kiçik arayışımız: Brilliant Süleyman qızı Dadaşova Bakıda, tanınmış bir ailədə dünyaya göz açıb. Anası Qızxanımı çox tez itirib. Avtomobil qəzası... Avtomobildə olan digər ailə üzvləri isə sağ qalmışdılar.

Həyat davam edirdi. Brilliant Dadaşova böyük səhnəyə 1985-ci ildə ayaq basır. O zaman Moskvada keçirilən Ümumdünya Gənclər Festivalında gələcəyin superulduzu xüsusi diplomuna layiq görülmüşdü. 1986-cı ildə Azərbaycan televiziya və radiosunun solisti oldu. Onun sənətdə inkişafı bu axarda gedirdi. 1987-ci ildə həmyerlimiz sovet ifaçıları arasında keçirilən müsabiqədə birinci yerə nail ola bilir.

Daha sonra Brilliant Dadaşova İsveç, Avstriya, Almaniya, Böyük Britaniya, ABŞ və digər ölkələrdə musiqi mədəniyyətimizi uğurla təmsil etməyə başladı. Sovet İttifaqı dağıldıqdan sonra Rusiyada solo konsertlə çıxış edən ilk müğənni məhz Brilliant Dadaşova oldu.

O, Rusiyanın ən iri konsert auditoriyasında - Moskvada və Sankt-Peterburqda çıxış etdi. 1995-ci ildə "Züleyxa" mahnısına çəkilmiş videoklip Rusiya kanalında nümayiş etdirilməyə başladı və kanalın qızıl onluğunda uzun müddət ərzində ön cərgələrdə sabit qaldı.

1997-ci ildə bu və ya digər nailiyyətlərinə görə Brillianta əməkdar artist adı verildi. Elə həmin ildə müğənni Azərbaycan-Norveç layihəsində iştirak edirdi. Xaricdə klip çəkdirən ilk müğənni də Brilliant Dadaşova olub. O, Türkiyə və Rusiya kimi dövlətlərdə videoklipdə çəkilib. 1999-ci ildə səhnəmizin Brilliantı bələdiyyə seçkilərində qalib gələrək Bakı şəhəri Səbail rayon bələdiyyəsinə üzv seçildi.

Xalq artisti Brilliant Dadaşovanın uğurlu karyerası davam edir. Brilliant yeni mahnılar oxuyur, videokliplər çəkir və hətta Azərbaycandan kənarda da solo konsertlərdə çıxış edir. Vaxt tapıb ictimai məsələlərlə də məşğul olur. Tanrıya inanır, öz vətənini, ailəsini, öz pərəstişkarlarını sevir. Görüşümüz Novruz bayramı ərəfəsində oldu və populyar sənətçimizin bayramını təbrik edib, öncə onun şirniyyatlara münasibətini bilmək istədik. Soruşuruq: "Ümumiyyətlə, hansı bayram şirniyyatını daha çox sevirsiniz?

- Xeyr, mətbəxlə heç aram yoxdur. Şirniyyatlardan daha çox paxlavanı, qoğalı sevirəm. Hətta mən balaca olanda qoğalın üstünü və altını yeyirdim, ortasını isə saxlayırdım. Nənəm isə deyirdi, fikir verməyin ona, böyüyəcək və qoğalı bütöv yeyəcək. Mən böyüdüm, amma qoğalı yenə də eynilə kiçik yaşlarımda yediyim kimi yeyirəm (gülür).

- Şou-biznes və Türkiyə səfərlərinizə aid eynitipli suallarla sizi yormaq istəməzdim. Gəlin bəşəri mövzulara toxunaq və sizdən danışaq. Siz Bakıda göz açıb, Bakı kəndlərində böyümüsünüz. Bu gün Bakını necə görmək istərdiniz? Bakı çoxmu dəyişib?

- "Bakı gözəl, Bakı şirin!" (zümzümə edib, gülür). Bu gün şəhərimiz böyüyür, dəyişir, tikilir, yollar salınır. Amma əlbəttə, hamımız nostalji hissləri yaşamaq istəyir, əvvəl gördüyümüz yerləri yenidən görmək istəyirik. Misal üçün, "Abşeron" mehmanxanası söküləndə mən öz-özümə dedim ki, axı bu bizim keçmişimiz idi və bu keçmişimizdən heç nə qalmayıb. Lakin digər tərəfdən haradasa bu normal bir hadisədi, belə ki, insanlar yeniliklərə can atır.

- Belə bir deyim var: "İnsan istəklərinin quludur". Maraqlıdır, siz zirvədə olan sənətkarsınız, şöhrətiniz, hörmətiniz, hər şeyiniz var. Bəxtdən, taledən daha nələri umursunuz?

- Mən bir işi görməzdən öncə hər şeyi çox analiz edən insanam və hər zaman səhv etməməyə çalışıram. Amma dünənə nəzər salanda görürəm ki, çox səhvlər etmişəm. Hələlik həmin səhvlərimi özüm üçün etiraf edirəm, bəlkə də vaxtı gələndə hamı üçün açıqladım. Hər halda, çalışaram ki, istəklərimin qulu olmayım. Onu qeyd etmək istəyirəm ki, mən sənətimi dəlicəsinə sevən insanam və müğənni olmasaydım da, başqa sənətdə olsaydım, yenə də işim mənim üçün birinci cərgədə durardı.

- Bir çox ifaçılar muğamlarımıza müraciət edir və bu müraciətlə xanəndələrimizi pis ifaları ilə təhqir etmiş olurlar. Amma həmişə sizdən və ifanızdan razı qalırlar. Bəs niyə siz bütün musiqi janrlarının mahir ifaçısı olsanız da, məhz estradaya bağlandınız?

- Əfsuslar olsun ki, bu gün estrada musiqisi deyəndə çoxları bunu qalmaqallar kimi təsəvvür edir.

Amma Rəşid Behbudov, Şövkət Ələkbərova dövründə estrada musiqisi anlayışı tam başqa idi. Bu yaxınlarda bir mötəbər insan, akademik mənimlə söhbətdə estrada musiqisinin ünvanına biganə sözlər dedi və bu mənim xoşuma gəlmədi. Mən ona cavab verdim ki, gəlin onda Tofiq Quliyevin, Səid Rüstəmovun, Cahangir Cahangirovun, Rauf Hacıyevin üstündən xətt çəkək. Mən və sən bu sənətə, estradaya gələndə, estrada musiqisində Akif İslamzadə, Rafiq Babayev kimi parlaq ifaçılar vardı. Və əgər bizim estradamız bu cür sənətkarların adı ilə bağlıdırsa, mən ancaq fəxr edə bilərəm ki, estrada müğənnisiyəm. Mən musiqiyə gələndən bəri "Qubanın ağ alması", "İstəkanın sarısı", "Getmə-getmə, gözəl yar" kimi xalq mahnılarında muğam improvizasiyaları etmişəm. Biz Rafiq Babayevlə xalq mahnılarımızı müasirləşdirmişdik, amma deməzdim ki, estrada musiqisinə çevirmişdik. Lakin bu gün mahnıları çevirirlər və deyim ki, o qədər də yaxşı nəticələr əldə olunmur. Mən sizinlə tamamilə razıyam ki, bu gün bizim muğamları korlayırlar.

- Bu yaxınlarda Heydər Əliyev Sarayında hörmətli mədəniyyət və turizm naziri Əbülfəs Qarayevin iştirakı ilə bəstəkar, cazmen Vaqif Mustafazadənin yubileyi keçirildi və mən bu konsert proqramından böyük zövq aldım, çünki orada bayağı musiqi yox idi və səhnədə sözün əsl mənasında musiqi vurğunları və istedadlı insanlar çıxış edirdi. Düşünmürsünüz ki, əgər siz və bir sıra seçilən sənətkarlarımız, maqazin verilişlərində çəkilməkdən imtina etsəniz, həmin verilişlərin reytinqi də olmaz və ən əsası bir günlük müğənnilərin reklam mənbəyi, nəhayət, bağlanar. Nəyə görə bu boykota getmirsiniz?

- Mən iki il bu boykotu etdim və heç bir verilişdə çıxış etmədim. Təsəvvür edin ki, hər verilişin 10-15 nəfərlik heyəti, rejissoru, prodüseri var. Bir nəfərə, iki nəfərə yox deyirsən, amma hamı ilə üz-göz olmaq olmur. Biz elə bir dövrə gəlib çıxmışıq ki, hər kəs bazardakı kimi öz məhsulunu ortalığa qoya bilir. Əlbəttə, vaxt gələcək, hər kəs öz yerini tapacaq.

- 1985-ci ildən bu günə kimi bizi sevindirməkdə, duyğulandırmaqda davam edirsiniz. Bəzən olub ki, çox gözəl mahnıların ifaçısı həm populyarlığı, həm dinləyici sevgisini itirib. Əbəs yerə deməyiblər ki, insanla birinci məhv olan incəsənətdir.

- Əlbəttə, insanın daxili aləminin kasıb olması onun sənətinə təsir edir. İnsan daxildən çirkin olanda başqalarına pozitiv hisslər ötürə bilmir. O qədər gözəl səsli və arxasında çoxlu sponsor və maddi dəstəyi olan müğənnilər var ki, nə etsələr də gündəmə gələ bilmirlər. İnsanların ürəyində yaşamağı yalnız Allah qismət edir.

- Çoxları dostluğa inanmır və "qadının yeganə rəfiqəsi anası ola bilər" söyləyirlər...

- Dostluğu maddiyyata dəyişib satanlar olmasına baxmayaraq, mən dostluğa inanıram. Ən yaxın dostum isə Allahdır. Vəfasına, ədalətinə inandığım Allahdır.

- Və sonda, pərəstişkarlarınızı nə ilə sevindirmək fikriniz var?

- Hazırda Türkiyədə hazırlanan albomla. İnşallah!.

Sevinc İsmayıl

Ayna.-2010.-3 aprel.-S.19.