Yalçın Rzazadə: "Milli estradada yadlaşma sindromu yaşanır"

Sənətkar ehtiyatlı olmağa səslədi

Retro mahnılarını yenidən gözdən keçirib onlara yeni nəfəs verən xalq artisti Yalçın Rzazadə bu addımı estradada yaranan boşluğu doldurmaq məqsədi ilə atdığını söylədi. Son illər meydana çıxan mahnıların əksəriyyətini ruhuna yaxın bilməyən Yalçın Rzazadənin qənaətinə görə, onlarda yad ladlar eşidilir. Milli estrada sənətində yadlaşma sindromu yarandığından narahatlıq keçirən sənətkar gənclərə bu barədə bir qədər ehtiyatlı olmağı tövsiyə etdi:

"Bu gün səhnə onların ixtiyarındadır. Ekranda, ictimaiyyət arasında daha çox görünən gənclərdir. Amma onların yaradıcılığını müşahidə edərkən bəzilərinin danışığı, səhnə hərəkətləri belə məni məyus edir. Çoxlu qüsurlar aşkar edirəm. Hiss edirəm ki, çoxları bilərəkdən efir mədəniyyətindən kənara çıxır. Mənim sənət təcrübəmin uzun illəri əhatə etməsinə baxmayaraq, hələ də özümü kamera, ekran qarşısında böyük məsuliyyətlə təqdim edirəm. Hər bir xırda məqamı beynimdə düşünür, sonra təqdim edirəm".

Xalq artisti deyir ki, onu narahat edən əsas səbəblərdən ən başlıcası estradada yadlaşma məsələsidir. Klassik estrada ənənələrinin bu günümüzdən qopduğunu, yerini isə yad melodiyaların aldığını deyir:

"Mənim repertuarımda olan mahnıların tarixi 70-80-ci illərə gedib çıxır. Amma həmin mahnılar hələ də sevilir, dinlənilir və bu gün repertuarlardan düşmür. Çünki bu bizim milli musiqimizin ladlarının əksidir. Bu mənim çağırışımdır - gənc müğənnilər özlərini bəstəkar adlandırmadan öncə milli estradaya nə dərəcədə xələl gətirə biləcəklərini düşünsünlər. Çünki pisi də, yaxşısı da bizim adımızadır. İndiki problemlər gələcəkdə musiqi tariximizə bir ləkə olmaması üçün sənətçilər özlərindən öncə sənəti düşünməyi bacarmalıdırlar".

Z.Rüstəm

Ayna.- 2010.- 7 avqust.- S.20.