Dərsliklər təkmilləşir

Nizami Cəfərov bu fikirdədir

Dərsliklərdəki problemlərin əsas səbəbi SSRİ dönəmində bu işin qeyri-azərbaycanlılar tərəfindən görülməsi olub. Texniki elmlər, tarix, təbiət elmlərinə dair dərsliklər, sadəcə, rus dilindən Azərbaycan dilinə tərcümə edilirdi. Millət vəkili Nizami Cəfərov deyir ki, əsas problemlərin bu sahələr üzrə yazılan dərsliklərdə müşahidə edilməsi təsadüfi deyil. Azərbaycan dili, ədəbiyyat və digər humanitar fənlərlə bağlı dərsliklər isə sovet dövründə də azərbaycanlı alimlər tərəfindən hazırlandığından müstəqillik illərində bu sahədə ciddi problem yaşanmayıb:

"Narazılıqlar isə sırf subyektiv baxışlarla bağlı olub. Məsələn, biri istəyir ki, ədəbiyyat dərsliyində Süleyman Rüstəmin şeirləri olsun, digəri bunu istəmir. Bizim isə əsas məqsədimiz odur ki, şagirdlər dərslikdən istifadə edəndə çox yorulmadan lazımi informasiya ala bilsinlər. Mən düşünürəm ki, dərsliklərimiz ilbəil təkmilləşir".

Dilçi alim bu qənaətdədir ki, təhsildəki problemləri təkcə dərsliklərlə əlaqələndirmək doğru deyil. Burada müəllim faktorunu da unutmaq lazım deyil:

"Tədris prosesində müəllim də vacib faktordur. Bizdə keçid dövründə sanki müəllimlərin bir az damarı boşaldı. Müəllimlər üçün metodik vəsait qıtlığı yarandı. İndi bu problemi aradan qaldırmağa çalışırıq".

Xatun

Ayna.- 2010.- 21 avqust.- S.16.