21 Fevral - Dünya Ana Dili
Günü
İran türkləri bu
günü məyusluq və hiddətlə qarşılayacaq
Fevralın
21-də Dünya Ana Dili Günüdür, 1992-ci ildən bəri
hər il YUNESKO bu günü qeyd edir. Məqsəd dünyada
"dillərin ölməsinin" qarşısını
almaqdır. Araşdırmalara görə, dünyada 6 min dil
var və hər il neçə-neçə dil sıradan
çıxır. Bir çox mütəxəssislər bu
baxımdan Güney Azərbaycan türklərinin ana dilinin də
məhvolma təhlükəsi ilə üzləşdiyini
deyirlər. Buna səbəb həmin dildə məktəbin
olmaması, milli mədəniyyətin inkişafının
qarşısının alınması, milli
varlığın danılması göstərilir.
Xatırladaq ki, 1952-ci
fevralın 2-də Banqladeş (bir müddət bura Şərqi
Pakistan adlanıb) xalqı ana dili haqqı tələbi ilə
bağlı etiraz aksiyası keçirdi. O zaman Pakistan təhlükəsizlik
qüvvələri tərəfindən 3 aksiya
iştirakçısı öldürüldü. Sonralar
YUNESKO həmin günlə bağlı Beynəlxalq Ana Dili
Gününün qeyd olunması barədə uyğun qərar
qəbul etdi.
Artıq neçə
ildir Güney Azərbaycan türkləri dünya ictimaiyyətinin
və ölkə rəhbərliyinin diqqətini bu məsələyə
cəlb etmək üçün çeşidli cəhdlərə
baş vururlar. Ancaq onların bu haqlı tələbləri
qarşılanmaqdansa, azərbaycanlılara polis dəyənəkləri,
təzyiq və həbsxanalarla cavab verilir.
Güney Azərbaycanda
olduğu kimi, xaricdəki azərbaycanlılar güneyli
soydaşlarımızın təbii, haqlı və qanuni
haqlarını müdafiə etmək məqsədilə tədbirlər
gerçəkləşdirir. Bölünmüş vətənimizin
bu tayında Ana Dili Gününə diqqət yetirilmədiyi
halda, Güney Azərbaycanda bu gün unudulmur. Səbəbi isə
aydındır. Çünki Güney Azərbaycandakı 30
milyondan çox bir toplumun ana dili məhv olmaq təhlükəsi
ilə üz-üzədir. Mövzuya, daha doğrusu, ana dili
gününə yenidən qayıtmağımıza əsas
səbəb Güney Azərbaycanda bu günlə bağlı
keçirilən tədbirləri də diqqətə
çatdırmaqdır.
Şəhriyarın
şeirinin bir beytində dilimiz belə dəyərləndirilib:
"...Türkün dili tək
sevgili, istəkli dil olmaz,
Özgə dilə qatsan, bu əsəl
dil (bal kimi dil - S.S.), əsil olmaz...".
Beynəlxalq Ana Dili
Günü ilə bağlı Güney Azərbaycanın bir
sıra şəhərlərində, o cümlədən Təbriz,
Urmiya, Ərdəbil, Zəncan, Marağa, Xoy, Həmədan,
Meşkin, Əhər və b. yerlərdə "Ana dilində
təhsil" tələbi ilə imzatoplama kampaniyası və
başqa tədbirlər gözlənilir. "Təbrizsesi"
saytının yaydığı məlumata görə, bir
sıra şəhərlərin küçə
divarlarında "Yaşasın Azərbaycan!", "Ana dilim
- Türk dili!", "Türk dilində mədrəsə!",
"İran türklər üçün zindandır!",
"Ana dili!" və başqa bu məzmunda şüarlar
yazılıb.
Yerli müşahidəçilərin dediyinə görə,
Güney Azərbaycan türkləri
Xaricdəki azərbaycanlılar dünyanın
çeşidli ölkələrində Beynəlxalq Ana Dili
Günü ilə bağlı tədbir keçirərək,
Güney Azərbaycan türklərinin milli haqlarını
müdafiə edəcəklər.
S.Soltan
Ayna.-2010.-20 fevral.-S.8.