"Borçalı dünən, bu gün və sabah"

Bəlli problemlər və anlaşılmayan yanaşma

Media mərkəzində bu adda kitab təqdim olundu. "Borçalı dünən, bu gün və sabah" kitabında yer alan araşdırmalarda 90-cı illərin əvvəllərindən bizə məlum problemlərin hələ də qaldığı aydın olurdu.

Toplantıda ardınca Gürcüstanın cənub-şərq regionunda azərbaycanlıların sıx yaşadıqları Kvemo-Kartlidə (Borçalı) humanitar vəziyyətin müzakirəsi aparıldı (Turan).

"Körpü", "Borçalı", "Qeyrət" qeyri-hökumət təşkilatlarının fəalları bu yaxınlarda regionda keçirilmiş bələdiyyə seçkilərini qiymətləndirərkən bildirdilər ki, azərbaycanlıların tarixən çoxluq təşkil etdikləri Borçalı bölgəsində özünüidarəetmə orqanlarında gürcü milliyyətindən olanlar bir qayda olaraq çoxluq təşkil etmişlər. Erməni əhalinin çox olduğu Samsxe-Cavaxetiya yaşayış məntəqəsində isə bələdiyyəyə seçilənlərin 90%-ni ermənilər təşkil edib.

Borçalıda təhsil sahəsində vəziyyət pisləşir, məktəblər boşalır, yeni müəllim yoxdur, Azərbaycanın Təhsil Nazirliyi ali məktəb məzunlarını bu regiona göndərmir. Bu göstərici üzrə müqayisə bizim ölkəmizin xeyrinə deyil. Gürcüstanın Təhsil Nazirliyi isə hər il Qax və Balakəndəki gürcü məktəblərinə humanitar fənlər üzrə 10 müəllim göndərir.

İctimai xadimlər Eyvaz Borçalı, Adilxan Abdullayev və digərləri Azərbaycan hökumətini Gürcüstan hökuməti ilə birlikdə bu ölkədəki azərbaycanlı əhalinin humanitar müşkülləri üzrə tədbirlər planı işləyərək onu tətbiq etməyə çağırırlar. Bu əsasən Gürcüstan-Azərbaycan birgə müəssisələrinin yaradılmasını, yaşayış məntəqələrinin tarixi adlarının qaytarılmasını, yolların bərpasını, iki ölkə arasında sərhəd nəzarətinin sadələşdirilməsini, kənd təsərrüfatı məhsullarının xaricə daşınmasına icazə verilməsini, Azərbaycan dilində regional qəzetlərin bərpasını və s. nəzərdə tutur.

Bu toplantıda anlaşılmayan odur ki, Gürcüstan demokratik ölkədir, azərbaycanlıların mövcud problemlərinin çoxu bu ölkə qanunları çərçivəsində öz həllini tapa bilər. Belə anlaşılır ki, orada sadəcə bu işləri görə bilən adamlar çatışmır. Mövzunu Bakıda vaxtaşırı qaldıranlar isə özlərini mediaya xatırlatmağa ehtiyac duyan əslən gürcüstanlı Azərbaycan vətəndaşlarıdır.

Ayna.- 2010.- 12 iyun.- S.18.