Faiq Ağayev - Karl Marks,

Aygün Kazımova - Fridrix Engels...

Ona görə ki, "şou-biznesin yazılmayan qanunlarını tərtib ediblər"

Xalq artisti Faiq Ağayevin konsert fasiləsi çox uzun sürdü. Bu arada bir neçə dəfə vəd versə də, gerçək olmadı. Bu günlərdə isə öyrəndik ki, yeni konsert layihəsi mayda həllini tapacaq - Heydər Əliyev Sarayında 4 günlük konsert proqramı ilə çıxış etməyə hazırlaşır. Sənətçi boş dayanmadığını, çalışdığını deyir:

- Efirlərdə varam, şou-proqramlarda iştirak edirəm. Yəni böyük boşluq yaratmadım. 2009-cu ildə nəzərdə tutulan solo konsertim maliyyə böhranı üzündən alınmadı. Mən isə tamaşaçılarıma alışdıqları ənənəvi "100% F.A." keyfiyyətində bir layihə təqdim etmək istəyirəm. Tez-tez rastlaşdığımız orta səviyyəli konsertlərdən lap 30 günlüsünü keçirə bilərdim. Mən olay yaradacaq konsert verirəm. Məsələn, sonuncu konsertimin dekorasiyasının qiyməti Bakıda yeni binalarda iki otaqlı mənzilin qiymətinə bərabər idi. Özü də səhnə dekorundan ikinci dəfə bəhrələnmək olmur. Konsert bitdi - atılır. Digər xərcləri hələ sadalamıram.

- Bəlkə iş tempinin düşməsinə estradada ənənələrin dəyişməsi təsir edir? 1988-ci ildə "Bakı payızı"nın yetişdirdiyi Faiq Ağayev, Aygün Kazımova, Zülfiyyə Xanbabayeva, Samir Bağırov o vaxtlar müasir estradanın təməlini qoydular. Sizin formalaşdırdığınız ənənələrdən bu günə bir nişan qalıb, yoxsa gənclər meydana yeni atmosfer gətirib?

- O vaxt biz milli estradamızda inqilab etdik.Bir müddət sonra Azərbaycanda şou-biznes yarandı. Bu inqilabın Karl Marksı oldu Faiq Ağayev, Fridrix Engelsi - Aygün Kazımova (gülür). Biz şou-biznesin yazılmamış qanunlarını tərtib etdik. Bizdən öncə də estrada sahəsində müəyyən qaydalar mövcud idi. Sadəcə, bunu zəmanəyə uyğunlaşdırdıq. Ölkələrin konstitusiyaları zaman-zaman dəyişirsə, belə qanunların da redaktə olunması normaldır. Odur ki, bizdən öncəki nəslin ən qüvvətli sənətkarları yeni yaranmış qaydalarla fəaliyyətini uğurla davam etdirdiyi kimi, biz də yeni nəslin yürütmək istədiyi ab-havaya hazırlıqlıyıq.

- O vaxt sırf beyninizin məhsulunu ortaya qoydunuz. İndiki gənclər isə Avropadan bəhrələnir...

- Bu gün 40 yaşına yaxınlaşan insanların o vaxt xarici telekanalları izləmək imkanı yox idi. İndi isə informasiya mənbəyi çoxdur. Lakin biz görmədən, təqlid etmədən fəaliyyət qaydalarımızı yaratdıq. İndikilər həm təqlid edir, həm yararlanır, həm də yeni nə isə icad etməyə cəhd göstərirlər. Eyni zamanda, publikanı da nəzərə almaq vacibdir. Çünki 88-ci ilin tamaşaçısı ilə indiki tamaşaçı arasında çox böyük fərq var. Sovet dönəmində formalaşmış tamaşaçı daha seçkin, tələbkar, sözün yaxşı mənasında "vasvası" idi. Xüsusən də paytaxt tamaşaçısı. SSRİ-nin nəhəngləri Kobzon, Puqaçova, Vaykule söyləyirlər ki, turne üçün konsert proqramı hazırlayanda, ilk öncə onu Bakıya gətirirdilər. Bakıda kəm-kəsirləri müəyyən olunurdu. İndi nə var - tamaşaçıya da onu, üzr istəyirəm ifadəmə görə, yedizdirirlər. Musiqi SMS-ləşəndə, sənət ikinci plana keçir. Qələbəyə sənət yox, SMS səbəb olur. Bizim vaxtımızda sarayın səhnəsinə çıxmaq üçün mütləq hansısa respublika müsabiqəsinin qalibi olmaq lazım idi. İndi ənənələr dəyişib. Radio və ya telekanala çıxmaq üçün, sadəcə, vəsait lazımdır. Bir neçə mahnı, klipin yayımından sonra populyarlaşırsansa, səni böyük konsertlərə dəvət edirlər. Ümidvaram ki, şou-biznes haqqında qanun qəbul edilib, əməli işləməyə başlayandan sonra sənətdə müəyyən "rəndələnmə" prosesi gedəcək.

- Hansı tələblərin "qanunlaşdırılmasının" tərəfdarısınız?

- Müğənnilərin Mədəniyyət Nazirliyi tərəfindən verilən lisenziya ilə çalışmasının tərəfdarıyam. Lisenziyanı qazanmaq üçün hər müğənni peşə imtahanı verməlidir. Onda bilinəcək ki, konsert meydançasında, televiziyada kimin çıxış etməyə haqqı var. Kimi isə yalnız gecə saat 1-dən sonra göstərmək olar. Kim yalnız toylarda, şou-proqramlarda oxuya bilər. Fikir haçalığı yaratmayan bir sistemə ehtiyac var. Çünki indi çoxunun yeri çaş düşüb.

- Sizin yaratdığınız fasilədə yerinizi tutan oldu? Özünüz deyirsiniz ki, sənətdə yerlər çaş düşüb.

- Faiq Ağayev kimin yerini tutub ki, onun da yerini kimsə tutsun? Bu, ictimai rəyin ziyanıma formalaşması üçün düşünülmüş, nüfuzumun kölgələməyinə yönələn uğursuz bir cəhd, əsassız, süni bir fikir idi - "Faiqin qatarı gedib və s.". Açıq meydandı, iddialılar müqayisəni etməzdən əvvəl ən azından mənim sənətdə etdiklərimi təkrarlamalıdır. Azərbaycanın ilk müğənnisiyəm ki, 5 beynəlxalq müsabiqədən qalibiyyətlə qayıtmışam. Özü də bu SMS və ya pulla həll olunmayıb. Çağdaş estradamızda yeganə artistəm ki, 17 il sərasər anşlaqla solo konsertlər keçirirəm.Ən gənc əməkdar və xalq artistiyəm. Bu günə kimi üstələnməyən 5 günlük konsert rekorduna imza atmışam. Qafqazda ilk 3D qrafikalı animasiya klipi mənə məxsusdur və s. Ona görə də heç kəs deməsin ki, Faiq Ağayevin yerini tutub.

Belə bir məşhur deyim var, "Kral öldü, yeni krala eşq olsun!". Təvazödən uzaq səsləndiyi üçün bağışlayın, amma kimdi yeni kral? Varmı? Şəxsən mən görə bilmirəm. Kim görür - desin. Bar verməyən ağaca daş atmırlar. Bir insana o zaman hücumlar olur ki, o digərlərindən fərqlənir. Həsəd aparmaq ayrı şeydir, paxıllıq ayrı. Şəxsən mən korifeylərimizə həsəd aparmışam.

- Bəs sizə yönəlmiş hiylələrə hiylə ilə cavab vermisiniz?

- Heç vaxt. Amma mənə çox hiylə işlədiblər. Neyləyim? Mənim də naxışım budur (gülür). Adım-sanım, hörmətim, ruzi-bərəkətim, nüfuzum var ki, kimsə özünə reklam qazanmaq üçün məndən istifadə edir. Ola bilsin ki, kimsə mənimlə eyni gücə malikdir və mən hansısa məqamlarda ona maneçilik törədirəm. Mənim silahım hiylə yox, ağlım, zəkam və məntiqdir. Bədxahlarımın istifadə etdiyi üsullardan əsla bəhrələnməmişəm. Hər gecə Allahdan ağlımı başımdan almamasını diləyirəm.

- Flora Kərimova və İlhamə Quliyevanın "soyuq savaşı", Faiq Ağayev və Zülfiyyə Xanbabayeva, Brilyant Dadaşova münasibətləri gənc sənətçi nəsildə bir-birinə aqressivlik aşılaya bilir. Faiq Ağayev nə vaxtsa jest edib, küsülülərin siyahısında sonuncuların adlarını çıxara bilərmi?

- Bir qədər lovğalıq etmək istəyirəm (gülümsüyir). 1996-cı ildə 25 yaşım olanda, Gənc Tamaşaçılar Teatrında 3 günlük konsertim vardı. Fəxri qonaqlarım İlhamə Quliyeva, Nisə Qasımova, Flora Kərimova, Brilyant Dadaşova və Aygün Kazımova idi. Mən orada elə bir vəziyyət yaratdım ki, Flora Kərimova səhnəyə çıxıb İlhamə xanım və onun övladı barəsində gözəl sözlər dedi, İlhamə xanım da jest edib, cavab olaraq Kərimova və qızı üçün çox xoş sözlər səsləndirdi. Bu görüntülər eksklüziv olaraq yalnız mənim arxivimdədir. Digərlərinə gəlincə, ən bariz nümunə Aygün Kazımovadır ki, biz zaman-zaman yabalaşır, sonra dostlaşırıq.Yetər ki, barışmaq üçün istək və etiraf olsun. Mən kiminsə qarşısında günahkaramsa, yaş və cins fərqinə baxmayaraq, barışmaq üçün ilk addımı özüm ataram. Adını çəkdiyiniz digər iki xanım sənətçilərə gəldikdə isə, günahkar qarşı tərəfdir. İndi mən durub üzr istəməliyəm? Şəxsiyyət, ləyaqət və qeyrət müstəvisində kişi-qadın faktoru yoxdur və olmamalıdır. İnanın, onların məndən üzr istəmələri arzusunda deyiləm. Sadəcə, heyifsiləndiklərini dilə gətirsələr ki, "Vaxtilə Faiqə qarşı bu hərəkəti nahaq elədim", bu mənə kifayət edir. Həmin etirafdan dərhal sonra gəlib o adamları qucaqlayıb, öpüb, bağışlaram.

- Brilyant Dadaşova Türkiyənin TMB kanalının Azərbaycan üzrə nümayəndəsi olanda mətbuatda onun sizin kliplərinizin həmin kanalda yayımlanmayacağı barədə fikri yazılmışdı. Amma bir müddət əvvəl həmin kanalın qonağı oldunuz, hətta ad gününüz də orada qeyd edildi.

- Bu söhbətə qayıtmaq istəmirəm. Allah o həmkarıma cansağlığı versin. Bircə balasının toyunu görsün, mən də o toyda oxuyum! Bundan artıq nə deyə bilərəm ki?

- Yuxarıda qeyd etdiniz ki, şou-biznesdə çoxunun yeri çaş düşüb. Qarışıqlığı tənzimləmək üçün hansı qurumun yaranmasına ehtiyac duyursunuz?

- Bizim peşə ittifaqımız olmalıdır. Vaxtilə mənim belə bir təklifim olub. Bəzi mühafizəkar sənətçilər və mətbuatın, xüsusilə də bir qisim televiziya maqazin proqramlarımızın aktiv dağıdıcı səyləri nəticəsində bu gün Azərbaycanda "şou-biznes" anlayışı az qala söyüş kimi qəbul olunur! Bu səbəbdən estrada sahəsində çalışanların assosiasiyasını yaratmaq ehtiyacı var. Sabah istənilən həmkarımızın problemi, mübahisəsi və ya haqqının tapdalanması faktı meydana çıxsa, biz qurum olaraq müdafiə prinsiplərindən istifadə edə bilərik. Yaxud televiziya kanalı ilə müğənnilər arasında problem yaransa, diqtə edən biz olaq. Piratlarla fərdlər deyil, həmin assosiasiya mübarizə aparsın. Amma bir-birimizə olan iddia və iradlar buna imkan vermir. Bir çoxlarımız ehtiyat edir ki, kim bu ictimai qurumun rəhbəri olsa, bütün işləri öz xeyrinə yönəldəcək.

Z.Rəhimqızı

Ayna.- 2010.- 1 may.- S.21.