Həmidə Ömərova: "Çoxseriyalı filmlərə ehtiyac var"

Aktrisa hesab edir ki, aktyorların imkanlarını açmaq lazımdır

Son illər filmlərə çəkilmədiyinin səbəbindən danışan kinoşünas, xalq artisti Həmidə Ömərova qəzetimizə belə bir açıqlama verdi. Filmə çəkilmədiyini şəxsi yox, bütün Azərbaycan kinosunu əhatə edən problem hesab edən aktrisa deyir ki, filmlərdə məşhur aktyorlar və aktrisalar çəkilməlidir:

"Amma bu, hamıya qismət olmur. Bəzən elə filmlər olub ki, çəkilmək istəmişəm, ancaq məni dəvət etməyiblər. Amma film hazır olduqdan və ona baxdıqdan sonra orada çəkilmədiyimə sevinmişəm. Bunun bir çox səbəbləri var".

Aktrisa əlavə edir ki, hər hansı bir filmin uğursuz alınmasında yalnız bir aktyoru, yaxud təkcə rejissoru, operatoru günahlandırmaq düzgün deyil. Çünki bu, kollektiv əməyin məhsuludur və filmin uğurlu, yaxud uğursuz alınmasında da hər kəsin öz rolu olur. Son illər ekranlaşdırılan filmlər barədə mövqeyini bildirən Həmidə Ömərova: "Əslində son iki ildə çəkilmiş filmlərin, demək olar, çoxuna baxmamışam. Yalnız festivallar çərçivəsində nümayiş olunan filmləri izləmişəm. Arzu edərdim ki, milli kinomuz həm keyfiyyət, həm də kəmiyyət baxımından daha da inkişaf etsin. Mənə elə gəlir ki, son 2-3 ildə Azərbaycanda doğrudan da maraqlı filmlər çəkilməkdədir. Artıq bu sahənin inkişafı üçün bir çox işlər görülür. Amma bu, qısa zamanda nəticəsini verə bilməz, gözləmək lazımdır", - deyə bildirdi. Çoxseriyalı filmlərə ehtiyac yarandığını söyləyən Həmidə xanım eyni zamanda bunları söylədi:

"Biz filmləri yeni dublyaj etməyə başladıqda tamaşaçılar buna alışa bilmirdilər. Amma indi dublyaj olunmuş filmləri hamı izləyir. Serial istehsalında da inkişaf əldə etmək üçün mütləq serialların çəkilməsi lazımdır. Bu, həm də aktyorlarımız üçün çox vacibdir. Hər bir aktyorun iç dünyasını, onun istedadını açmaq üçün serialın imkanları daha genişdir. Dünya kinosunda da belə nümunələr çox olub: dramatik, faciəvi obrazlar yaradan bir aktyor birdən-birə serialda komik bir rola çəkilir və tamaşaçılar onun tam fərqli tərəflərini kəşf edirlər. Yəni aktyor istedadını hərtərəfli açmaq üçün seriallar çox kömək edə bilər. Ümid edirəm ki, tezliklə Azərbaycanda da yüksək keyfiyyətli, baxımlı seriallar istehsal olunacaq. Bu isə milli kinomuzun dirçəlməsində önəmli rol oynaya bilər".

Xatun

Ayna.- 2010.- 22 may.- S.18.