Elçinin "Şekspir"i Moskvanı fəth etdi

Moskvada "Jar-ptitsa" Teatrının səhnəsində Azərbaycanın tanınmış yazıçı və dramaturqu Elçin Əfəndiyevin eyniadlı pyesi əsasında hazırlanmış "Şekspir" tamaşasının premyerası Rusiya paytaxtındakı "Dərviş teatrı"nın quruluşunda böyük uğurla keçib. Bakı şəhər Mədəniyyət və Turizm İdarəsindən bildirilib ki, iki hissədən ibarət ekssentrik "Şekspir" komediyası rusiyalı və azərbaycanlı aktyorlardan ibarət istedadlı truppanın ifasında təqdim edilib. Tamaşanın səhnə tərtibatı və quruluşu teatrın bədii rəhbəri Mərdan Feyzullayevə məxsusdur. Tamaşadan əvvəl "Jar-ptitsa" Teatrının direktoru, Rusiyanın əməkdar mədəniyyət işçisi Lyüdmila Meru çıxış edib. O qeyd edib ki, Azərbaycanın xalq yazıçısı, əməkdar incəsənət xadimi, filologiya elmləri doktoru Elçin Əfəndiyevin yaradıcılığı onun istedadının pərəstişkarları olan rusiyalı tamaşaçılara yaxşı tanışdır. Tamaşada baş rolları Rusiyanın əməkdar artisti Nikolay Malınkin (Stalin), Şirzad Əsəd Pirallahi (sanitar), Taşa Romanova (Sara Bernar), Oleq Deqtyaryov (baş həkim) və başqaları ifa ediblər.

Ayna.- 2010.- 6 noyabr.- S.20.