Knut Hamsunun əsəri səhnəmizdə

Gənc Tamaşaçılar Teatrında premyera olacaq

Azərbaycan Dövlət Gənc Tamaşaçılar Teatrında tanınmış Norveç yazıçısı, Nobel mükafatı laureatı Knut Hamsunun "Viktoriya" əsəri əsasında hazırlanan tamaşanın təqdimat mərasimi keçiriləcək.

Teatrın mətbuat xidmətindən verilən xəbərə görə, "Məhəbbət balladası" adlanan əsərin səhnələşdirilməsi Norveç Krallığının Azərbaycandakı səfirliyi və Dövlət Gənc Tamaşaçılar Teatrının birgə layihəsidir.

Xəbərdə qeyd olunur ki, tamaşanın quruluşçu rejissoru Bəhram Osmanov, quruluşçu rəssamı Fuad Qafarov, rəqslərin quruluşçusu isə Vüsal Mehrəliyevdir. Tamaşada baş rolları Günel Məmmədova, Elnur Kərimov, əməkdar artistlər Lətifə Əliyeva, Rəzzaq Məmmədov və başqaları oynayırlar. Tamaşada Norveç bəstəkarı Edvard Griqin musiqisi səslənəcək. Tamaşanın premyerası yanvarın 16-sı olacaq.

Öyrəndik ki, teatrın kollektivi yanvarın 26-da daha bir səhnə əsərini tamaşaçılarına təqdim edəcək. Mətbuat əlaqələndiricisi bildirdi ki, bu, A.P.Çexovun "Albalı bağı" adlı pyesi olacaq. Tamaşaya quruluş verən xalq artisti İrina Perlovadır.

Tamaşada rolları teatrın əməkdar artistləri Leyli Vəliyeva, Nofəl Vəliyev, Ayşad Məmmədov, Şövqi Hüseynov, Seyidşah Məmmədov və başqaları oynayacaqlar.

Xatırladaq ki, tamaşa A.P.Çexovun dünyaya gəlişinin 150 illiyinə həsr olunub. Həmin gün eyni zamanda Dövlət Gənc Tamaşaçılar Teatrının kiçik səhnəsinin də açılışı olacaq.

Xatun

Ayna.-2010.-16 yanvar.-S.19.