Ələviyyə Babayeva - 90

Ədəbi yaddaşda qalmağı bacardı

Bizim gəncliyin populyar yazıçılarından olmuş, əsərləri indinin özündə də çox oxunan yazıçı Ələviyyə Babayevanın avqustun 12-də 90 yaşı tamam olur. Hər yazıçıya 90 il ömür qismət olmur. Ələviyyə xanımı ad günü münasibəti ilə biz təbrik edir, ona cansağlığı arzulayırıq. Ədəbi mühitdə onu erudisiyalı, bir neçə dili kamil bilən və onlarda səlis danışan, dünya ədəbiyyatının bilicisi, olduqca mütaliəli bir yazıçı kimi xarakterizə edirlər. Bu mühitdə ona ümumən ehtiramlı bir münasibət var.

Bakıda dünyaya göz açıb. ADU-nun filologiya fakültəsində təhsil alıb, ədəbi fəaliyyətə 1936-cı ildə "Ədəbiyyat qəzeti"ndə dərc olunmuş "İki həyat" adlı hekayəsi ilə başlayıb. Elə o zamandan öz orijinal hekayələri, povest və romanları ilə vaxtaşırı oxucuların görüşünə gəlib. Və beləcə 75 il qələm əlindən düşməyib Ələviyyə xanımın.

Çağdaş rus ədəbiyyatından gənc oxuculara ünvanlanmış xeyli tərcümələr də onun ədəbi bioqrafiyasına yazılmışdır. Sadalayaq: A.Qaydarın "Uzaq ölkələr" (1950), V.Biankinin "İz ilə" (1947), "Ayı balası" (1959), "Qırmızı təpə" (1963), K.Paustovskinin "Oğru pişik" (1951), V.Q.Korolenkonun "Satın alınmış uşaqlar" (1962), Y.Sotnikin "Əcaib quş" (1964), V.Astafyevin "Ulduz xəzanı" (1970), Y.Çaruşinin "Nikitanın oyuncaqları" (1984) və b. Bu tərcümələr bir zamanlar kütləvi tirajla çap olunmuşdu. Onun Turgenev, Tolstoy, Çexov kimi yazıçılardan da tərcümələri vardır.

Ələviyyə xanım "Azərbaycan qadını" dərgisində məsul katib (1951-1973), "Gənclik" nəşriyyatında müasir ədəbiyyat şöbəsinin müdiri (1973-1976), sonra baş redaktor (1976-1985), Yazıçılar Birliyində tərcümə bölməsinin rəhbəri olmuşdu.

Saysaq, indiyədək 60-dan çox kitabı işıq üzü görüb. Bir yazıçı olaraq adını ən çox tanıdan isə "Adamlar və talelər" romanı oldu. Ardınca "Əlvida", "Bəlkə sabah olmadı", Son döngə", "Dəli Sona" və s. kimi romanları çıxdı. Ümumilikdə 7 roman. Kitabları bir çox xarici ölkələrdə nəşr olundu. Bir sözlə, bu 75 ildə məhsuldar çalışdı, milli ədəbiyyatımızda iz qoydu, onun dünyada tanınmasına öz yazıçı töhfələrini verdi.

Umudlu İ.

Ayna.- 2011.- 13 avqust.- S.20.