"Modelə intellekt gərəkdir"

Çünki modelyerin informasiya daşıyıcısıdır

Əməkdar incəsənət xadimi, modelyer Fəxriyyə Xələfovanın modellər üçün xüsusi meyarları var. Modellərdə boy məhdudiyyəti qoymur. Hazırda modelyer xanım 10 qız və 7 oğlan həmkarı ilə çalışır. Qeyri-peşəkarlarla isə ümumiyyətlə işləmir:

"Gənclər elə düşünürlər ki, model olmaq çox asan işdir. Düşünürlər ki, ona təhsil, intellekt lazım deyil. Amma belə deyil. Modelə intellekt gərəkdir. Mən podiuma çıxmıram, amma model mənim informasiya daşıyıcımdır. Podiuma çıxan model işlərimi mənim adımdan çox peşəkarlıqla təqdim etməlidir. Modellər beynəlxalq sərgilərə çıxıb stendləri tanıdırlar, hər şey onlardan asılıdır. Müdir çıxmır ki, camaatın qarşısına. Yəni biznesin inkişafı, əlaqələr modeldən asılıdır. Çox çətin peşədir. Model daim öz üzərində işləməlidir. Onlar formanı qoruyub saxlamasından tutmuş, dil bilməsinə, xarakterinə, dözümlülüyünə qədər bütün keyfiyyətləri özündə cəmləşdirməlidir.

- Azərbaycanda modellər podiumda pul qazana bilirmi?

- Bizdə bir-iki agentlik var ki, onlar mütəmadi işləyir.

Onların nümayişləri, sərgiləri olur. Onlar aylıq qazanclarını çıxara bilirlər. Burada əsas məsələ peşəkarlıqdır. Sabah biri çıxıb deyə bilər ki, Fəxriyyə xanım, mən modeləm. Amma mən ondan soruşanda ki, boyun neçədir, deyir 175. Deyirəm ki, bu boy model sayılmır, orta boydur. Model olmaq üçün 185 sm boy lazımdır. Hazırda 5-10 nəfər belə model var. Onlar peşəkardır və həmişə iş tapırlar. Amma deyə bilmərəm ki, onların sayı çoxdur. Model üçün peşəkarlıq lazımdır.

- Ətir biznesindən qazanc götürmüsünüz?

- Hələ ki, yolun başlanğıcındayam. Müvəffəqiyyət qarşıdadır. Modada olduğu kimi, bu işi də birinci mən başladım. Ona görə də yol göstərənim yoxdur. Özüm öyrənə-öyrənə icad edirəm. Ancaq onu deyə bilərəm ki, layihənin sonunda uduzmayacağam. Bilirəm ki, zərərə düşməyəcək və qoyduğum vəsaiti qaytaracağam. Qazanca gəldikdə, birinci ətirdən qazanc gözləmirəm. Qarşıma elə məqsəd qoymuşdum ki, elə ancaq vəsaitimi qaytarım və həmin vəsaiti sonradan başqa ətirlərin istehsalına yönəldim.

- Kişi ətirləri istehsal etmək fikriniz var?

- "Nuray"dan sonra kişi ətirləri yaradacağam. Düşünürəm ki, kişi ətirlərindən sonra artıq istədiyim qazancı əldə etməyə başlayacağam.

Kişilər üçün ətirlər artıq son mərhələdədir. Digər bir tərəfdən, burada çeşid məsələsinin də xüsusi önəmi var. Məsələn, məndə hələlik bir çeşid ətir var. Bir rəfdə 5 çeşid məhsul olduqda, rahat ola bilərəm ki, birinin satışı o birisini kompensasiya edəcək. "Nuray" ətirlərinin satışından çox razıyam.

Gənc qız və oğlanlar üçün tamamilə fərqli ətirlər istehsal etmək fikrindəyəm. Bax bu 5 çeşidə gəlib çatanda tam rahat olacağam ki, artıq qazanc əldə edirəm. Adına gəldikdə, hələ qərar verməmişəm. Üç ad var - avtomobilimin nömrəsi 579, "Maqnum", "Elbrus" zirvəsi qoymaq istədim, amma heç birinin üzərində dayanmadım. Hələ də axtarışdayam.

- Biznesiniz yalnız yerli auditoriya üçündür, yoxsa kənara da çıxa bilirsiniz?

- Bazar hələlik Azərbaycan və paytaxt Bakıdır. Ölkə xaricinə hələlik çıxmamışıq. "Nuray" ətri 1 ildir satışdadır. Ancaq mənim ətrimi indiyə qədər neçə ölkənin birinci şəxslərinin xanımlarına hədiyyə aparıblar. Bu özü elə keyfiyyət göstəricisidir.

Bizim keyfiyyət sertifikatlarımız çoxdur. İlk özəlliyi odur ki, mənim icad etdiyim ətirdir. Bu ətir gün boyunca - səhərdən axşama qədər bir xanımı müşayiət etsə, ona müsbət enerji verəcək.

Qoxunun özü çox gözəldir və buna görə də xanımda çox gözəl əhval-ruhiyyə yaradacaq və ətrafla gözəl dialoq qurmaq imkanı verəcək. Mən bu ətri elə yaratdım ki, insanlar tərəfindən anlaşıla biləcək qoxu olsun. Elə ətirlər var ki, insanda baş ağrısı yaradır. İndi istəyirəm ki, ətri qonşu Gürcüstan, İran, Türkiyə bazarına çıxarım.

Xatun

Ayna.- 2011.- 20 avqust.- S.21.