Abdulla Şaiq - 130

"Tülkü həccə gedir" miniatür kitab şəklində

Mədəniyyət və Turizm Nazirliyinin təşəbbüsü və dəstəyi ilə martın 9-da Abdulla Şaiq anılacaq. Gənc Tamaşaçılar Teatrında yazıçı və maarifçi Abdulla Şaiqin 130 illik yubileyi münasibəti ilə təntənəli tədbir planlaşdırılır.

Nazirlikdən verilən bilgiyə görə, məqsəd Abdulla Şaiqin Mənzil Muzeyinin işini təqdim etməkdir. Yubiley tədbirində mədəniyyət və turizm naziri başda olmaqla nazirliyin rəhbər heyəti, AMEA-nın və Azərbaycan Yazıçılar Birliyinin məsul şəxsləri, Azərbaycan elm və mədəniyyət xadimləri, Abdulla Şaiqin tədqiqatçıları, ali məktəblərin professor və müəllim heyəti toplaşacaq.

Xəbərdə qeyd edilib ki, ədibin müxtəlif janrlı əsərləri, şeirlərinə yazılmış musiqi örnəkləri təqdim olunacaq. Muğam Teatrı solistlərinin ifasında ədibin qəzəlləri üzərində muğamlar, uşaq bəstəkarı Oqtay Zülfüqarovun rəhbərliyi ilə uşaq filarmoniyasının "Aysel" teatrının ifasında uşaq mahnıları səslənəcək. Eyni zamanda Gənc Tamaşaçılar Teatrının hazırladığı "Eloğlu" pyesindən səhnələr göstəriləcək.

Sadəcə, bir yazıçı, hekayələr müəllifi, uşaq yazıçısı kimi tanıdığımız Abdulla Şaiqin türkçülük, vətənpərvərlik mövzusunda gözəl şeirləri də var və onun bu səpkili şeirlərinin sovet dönəmində üzə çıxarılması mümkün deyildi. Anım mərasimində onun lirik şeirləri ifa ediləcək. Yubiley münasibəti ilə nəşr olunan "Abdulla Şaiqin Mənzil Muzeyi. 1991-2011" kitabı təqdim olunacaq.

Miniatür Kitab Muzeyinin direktoru Zərifə Salahova tərəfindən ədibin yeni "Tülkü həccə gedir" miniatür kitabı təqdim ediləcək.

XATUN

Ayna.- 2011.- 26 fevral.- S.20.