Aktrisa Xanım Qafarova: "Sənətdə iz qoymağa çalışıram"

Onun "ya sənət, ya ailə" seçimi olmayıb

Həyatını səhnəsiz təsəvvür etmir. Musiqili Komediya Teatrının aktrisası, əməkdar artist Xanım Qafarovanın sözlərinə görə, sənətdə yer tutmaq çox çətindir. Sənətə zəhməti ilə gəldiyini söyləyir. Aktrisa "bəzilərinə irəliləmək üçün dayaq dururlar, bəzilərinə əksinə, maneələr yaradırlar. Etiraf edim ki, məni nə geri çəkən olub, nə də qarşımda böyük bir yol açan. Doğrudur, ustadım Hacıbaba Bağırovun mənə böyük köməyi dəyib. Bundan sonrakı uğurlarımda da onun ruhuna borcluyam. Həm həyatda, həm də sənətdə qarşımda çox böyük çətinliklər olub. Səbirli olmağımla, çətinliklərlə mübarizə apara-apara bügünkü mövqeyə çıxmışam", - dedi.

Söhbət əsnasında öyrəndik ki, Xanım Qafarova yaratdığı obrazlarla seyrçi məhəbbəti qazansa da, populyarlaşsa da, özünü şanssız hesab edir. Deyir ki, həyatda şanslı və şanssız insanlar olur, özünü isə ikincilərin sırasında görür:

"İnsanın naxışı həyatda da, sənətdə də onu önə çəkən bir amildir. Allah şansı mənə bir az yarımçıq verib".

Lakin aktrisa söyləyir ki, şanssızlıq onu heç nədən məhrum etməyib. Sadəcə, məqsədə çatmaq üçün həmişə uzun yol qət etməli olub. Onun məqsədə doğru getdiyi yol heç vaxt hamar olmayıb. Lakin aktrisa enişli-yoxuşlu yollarla olsa da, arzularına çatıb. Ona görə də zəhmətlə qazanılan uğurun daha gözəl olduğunu düşünür:

"Əziyyətlə sənətə gəlib tamaşaçıların qəlbində yer tapırsansa, onların yaddaşında ömürlük qalırsan. Bu gün populyar olmaq çox asandır. Yoldan keçən bir insan bir ay ərzində efirdə, qəzetdə görünsə, populyar olacaq. Ancaq ən əsası - yadda qalmaq, tamaşaçının ürəyinə yatmaqdır. Həmişə demişəm ki, mən ustadlarımın yolu ilə getmək istəyirəm. Onlar da sənətə çətinliklərdən keçib gəliblər. Mən həm həyatda, həm də sənətdə onlar kimi iz qoymağa çalışıram".

Həyatda öyrəndikləri səhnədə köməyinə çatıb. Həyatda isə aktyorluq edə bilmədiyini vurğulayaraq deyir ki, əgər səhnədə həyatdakı kimi aktrisa olsaydı, onu heç kəs qəbul etməzdi. Xanım Qafarovanın dediyinə görə, roldan-rola dəyişmək, başqalarının maskasını taxmaq asan məsələ deyil. Amma müsahibim etiraf edir ki, həyatda gördükləri ona səhnədə çox kömək olur:

"Çünki biz sənətçilər müşahidəçiyik. Ancaq səhnədə elə rollarım var ki, özüm onlara həsrətlə baxıb "kaş həyatda elə şanslı, xoştale insan ola biləydim" deyirəm. Məsələn, "Səhnədə məhəbbət", "Nəğməli könül"dəki rollarımdakı kimi...".

X.Qafarova deyir ki, vaxtilə incəsənətdə haqsızlıq dövrü yaşanırdı. İndi isə "ələk dövrüdür". Aktrisa bu qənaətdədir ki, indi ələkdən yaxşılar keçir. O inanır ki, vaxt gələcək yalnız ələkdən keçənlər üzdə olacaqlar:

"Əslində, onlar onsuz da üzdə, xalqın ürəyindədir. Ancaq efirdə yoxdurlar, mətbuatda az-az çıxış edirlər. Amma hər bir tamaşaçı, oxucu danışan kimi, onların adını çəkir. Hər kəsin qəlbinin dərinliyində onların adı var".

Aktrisa sənətdə "mənəm-mənəm" deyənləri "xəstə" adlandırır. Onun fikrincə, belə şəxslər "mənəmlik" xəstəliyinə tutulublar. "İndiyə qədər eşitməmişəm ki, əsl sənətkarlar, məsələn, Zeynəb xanım, Flora xanım efirdə "mənəm-mənəm" desinlər. Dünyasını dəyişən sənətkarların lentlərində də belə şeylərə rast gəlməmişəm. Şəxsən mən o xəstəlikdən çox-çox uzağam".

Xanım Qafarova Musiqili Komediya Teatrının aparıcı aktrisası, əməkdar artist, prezident təqaüdçüsüdür. Çalışdığı teatrın repertuarının əsas yükü onun çiynindədir:

"Bu mənim işim, sənətimdir. Bu qiyməti mənə həm dövlət, həm tamaşaçı verib. Bu məni qane edir. Bəzən görürsən ki, uşaq evinə, əlillər evinə gedib bir kiloqram alma aparan adamlar özlərini reklam edirlər.

Bu günə qədər saysız-hesabsız tədbirlərdə iştirak eləmişəm, ancaq heç vaxt ağlıma gəlməyib ki, onu reklam edim. Bu mənim sənətdən əlavə bir insan kimi borcumdur".

Xanım Qafarova aktrisalığa mahnı ifaçılığından gəlib. Vaxtilə ifaçı kimi ümumittifaq müsabiqələrində çıxış edib, Moskvada gənclərin XII ümumittifaq festivalının laureatı olub. Əlibaba Məmmədovun "Hümayun" ansamblında, daha sonra Şəfiqə Axundovanın "Fərəh" instrumental ansamblında oxuyub. X.Qafarova teatra gələndən sonra ansambllardakı işinə son qoyub. Buna baxmayaraq, o deyir ki, aktrisalıq karyerası onun mahnı ifaçılığını üstələməyib. O yenə də oxuyur:

"Sadəcə, mahnı ifaçılığı pula daha çox bağlıdır. Mahnını bəstəkardan alırsan, klip çəkdirirsən, efirdə "raskrutka" etdirirsən. Mənim o qədər imkanım olmadığı və teatrda repertuar yüküm ağır olduğu üçün mahnı ifaçılığı ikinci plana keçdi. Hazırda çox gözəl mahnılar yazdırmışam. Amma klip çəkdirmək imkanım olmadığından mahnılarım efirdə səslənmir. Bilirsiniz ki, telekanallar pulla xidmət göstərir. Bu məni, təbii ki, sənət baxımından qane etmir".

İfa etdiyi mahnıların özünün xarakterini ifadə etdiyini vurğulayır. Repertuarında lirik mahnılar üstünlük təşkil edir.

Onun həyatında sənəti ilə ailəsi bir-birinə mane olmur. Xanım Qafarova söyləyir ki, münasibətlərin möhkəmlənməsi, ailədə söz-söhbətin olmaması qadından asılıdır. Onun fikrincə, ideal, söz-söhbətsiz ailə yoxdur:

"Qadın həmişə evdə tənzimləyici rol oynayır. Hər bir vəziyyətdə güzəştə getməyi bacarmaq lazımdır. Mənə elə gəlir ki, qadın kişidən daha çox mülayim olur. Bir müddət keçəndən sonra tərəflər bir-birini başa düşür. Onda münasibətlər get-gedə adiləşir, söz-söhbətlər də olmur".

Aktrisa "sənət və ailə bir yerdə tutmur, ikisindən birini qurban vermək lazımdır" söyləyənləri anlamır:

"Onlar ailəni sənətə qurban vermirlər. Ailəni villada yaşamağa, bahalı maşına minməyə, dəbdəbəli restoranlarda yeyib-içməyə, xarici ölkələrdə gəzməyə qurban verirlər. Danışanda da deyirlər ki, ailəmi sənətə qurban vermişəm. Amma əslində, ortada heç bir sənətdən söhbət gedə bilməz. Əlbəttə, bu fikri hamıya aid etmək olmaz. Müəyyən bir kəsim var ki, həqiqi sənətlə məşğuldur. Belə fanatlar çox azdır. Mən həyatımı səhnəsiz təsəvvür etmirəm. Bilmirəm, bəlkə elə vəziyyət yarana bilər ki, səhnəni atmalı olaram. Həmişə deyirdim ki, əgər gözəl ailəm və uşaqlarım olsa, "ya sənət, ya da ailə" seçimi qarşısında qalsam, onda sənəti ailəyə qurban verə bilərəm. Çox şükürlər olsun ki, mənə həm ailə qismət oldu, həm də Tanrı nə qədər ömür verərsə, sənətlə bağlı qarşımda heç bir əngəl yoxdur"..

Xatun

Ayna.- 2011.- 30 iyul.- S.20.