Müdafiə və Təhlükəsizlik sektorunda nə baş verib? (1-30 iyun)

1 iyun. Azərbaycan Dövlət Miqrasiya Xidmətinin (DMX) rəisi, II dərəcəli dövlət miqrasiya xidməti müşaviri Arzu Rəhimovun rəhbərlik etdiyi heyət MDB iştirakçı ölkələrinin Miqrasiya orqanları rəhbərləri Şurasının Rusiya Federasiyasında keçirilən 9-cu iclasında iştirak edib.

1 iyun. BMT baş katibi Pan Gi Mun Nyu-Yorkda BMT Baş Qərargahında Azərbaycanın xarici işlər naziri Elmar Məmmədyarovla görüşündə Dağlıq Qarabağ münaqişəsinin tezliklə sülh yolu ilə həll edilməsinə ehtiyac olduğunu qeyd edib və bu istiqamətdə nəticələri gözlədiyini bildirib.

1 iyun. MEA Radiasiya Problemləri İnstitutunun direktoru Adil Qəribov deyib ki, Ermənistanda tikilməsi nəzərdə tutulan yeni atom elektrik stansiyasının ətraf mühitə təsiri Beynəlxalq Atom Enerjisi Agentliyi ekspertləri tərəfindən qiymətləndirilməli və onun nəticələri sərhədyanı ölkələrə təqdim edilməlidir. 2 iyun. Azərbaycanın BMT-dəki daimi nümayəndəsi Aqşin Mehdiyev bildirib ki, Azərbaycan hökuməti Ermənistanın müharibə dövründə törətdiyi cinayətlərin üstündən sükutla keçməyəcək. O növbəti dəfə BMT baş katibinə məktubla müraciət edib.

2 iyun. Azərbaycan zabitləri İtaliyanın birləşməsinin 150 və İtaliya Respublikasının 65 illiyi münasibətilə Romada hərbi paradda iştirak ediblər

2 iyun. ANAMA-dan verilən məlumata görə, Ağstafa rayonunun Saloğlu ərazisinin minalardan təmizlənmə prosesi başa çatıb. Saloğlu layihəsinin rəsmi bağlanış mərasimi iyulda nəzərdə tutulur.

2 iyun. Azərbaycan və Fransa mütəxəssisləri nüvə sahəsi üzrə birgə tədqiqatlara başlayıblar. İşlər Fransanın "Areva" şirkəti ilə RPİ arasında mayın 31-də imzalanan anlaşma protokolu əsasında görülür. Sənədə əsasən, Fransa və Azərbaycan mütəxəssisləri gələcəkdə nüvə texnologiyaları yeniliklərinin öyrənilməsi üzrə birgə proqram həyata keçirəcəklər. Eyni zamanda, Fransa Azərbaycan üçün bu sahə üzrə kadrların hazırlanmasında da iştirak edəcək.

2-4 iyun. Fövqəladə Hallar Nazirliyinin dəvəti ilə Koreya Respublikasının Fövqəladə Halların İdarə olunması Milli Agentliyinin rəhbəri Park Yeon-Sonun rəhbərlik etdiyi heyət ölkəmizdə rəsmi səfərdə olub.

3 iyun. Türkiyənin ROKETSAN şirkəti Azərbaycan SQ-dən aldığı sifarişlər üzrə tədarükə başlayıb. Artıq layihə çərçivəsində Azərbaycan Silahlı Qüvvələrinin sifariş verdiyi reaktiv raketlərin istehsalına başlanılıb. 2011-ci ilin sonu, 2012-ci ilin əvvəlində ilk məhsul partiyasının Azərbaycana çatdırılacağı gözlənilir.

3 iyun. Müdafiə naziri Səfər Əbiyev Ukraynanın Azərbaycana yeni təyin olunmuş fövqəladə və səlahiyyətli səfiri Aleksandr Mişşenkonu qəbul edib. Görüşdə Ukrayna ilə Azərbaycan arasında hərbi əlaqələrin perspektivləri barədə fikir mübadiləsi aparılıb.

4 iyun. Ermənistan SQ-nin Ağdam rayonunun Çəmənli kəndi istiqamətində açdıqları atəş nəticəsində Ağcabədi rayonunun Yuxarı Qiyamadınlı kənd sakini, kənd yaxınlığında qoyun otaran 1959-cu il təvəllüdlü Piriyev Yelmar Qənimət oğlu həlak olub.

4 iyun. Azərbaycan Türkiyənin ROKETSAN şirkətində hazırda yaradılma mərhələsi keçən tank əleyhinə idarə olunan raketlərin birgə istehsalı layihəsində iştirak edə bilər. Hazırda üzərində işlər gedən və türk mühəndisləri tərəfindən yaradılmış bu raketlərə Azərbaycan da daxil olmaqla bir sıra ölkələrin hərbçiləri maraqlarını ifadə ediblər.

4 iyun. Vaşinqtonda Azərbaycan xarici işlər naziri E.Məmmədyarovla görüşdən öncə ABŞ dövlət katibi Hillari Klinton bildirib ki, Azərbaycan və ABŞ Dağlıq Qarabağ münaqişəsinin ATƏT-in Minsk Qrupu vasitəsilə həlli üzrə işin davam etdirilməsinə sadiqdirlər.

6 iyun. Dağlıq Qarabağ münaqişəsinin nizamlanmasında vasitəçilik missiyasını üzərinə götürmüş Minsk Qrupu həmsədrləri Robert Bradtke (ABŞ), Bernar Fasie (Fransa) və İqor Popovun (Rusiya) regiona səfəri başlayıb. Onlar Bakıya gəliblər.

6 iyun. İordaniyanın Kral II Abdullahın Layihə Bürosuna (KADDB) daxil olan "NP Aerospace Jordan" şirkəti ilə Azərbaycan Müdafiə Sənayesi Nazirliyinin (MSN) "Radioquraşdırma" zavodu arasında əməkdaşlıq sazişinə müvafiq olaraq bədən zirehi və dəbilqələrin istehsalına dair daha bir anlaşma imzalanıb.

6 iyun. Beynəlxalq Qızıl Xaç Komitəsinin (BQXK) Ermənistandakı nümayəndəliyi bu ölkədə əsirlikdə saxlanılan Azərbaycan hərbçisinə baş çəkib. Əsirdən ailəsinə "Qızıl Xaç məktubu" çatdırılıb.

6 iyun. ANAMA tərəfindən Gürcüstan və Türkiyə mütəxəssisləri üçün təlim kurslarına başlanıb.

6-7 iyun. Bakıda "Eternity-2011" ("Sonsuzluq-2011") kompüter dəstəkli təlimin planlaşdırma konfransı keçirilib. Konfransda Azərbaycan, Türkiyə və Gürcüstan hərbçiləri, bir sıra mülki strukturların təmsilçiləri iştirak ediblər. "Eternity" kompüter dəstəkli təlimlər əsas ixrac boru kəmərlərinin mühafizəsi məqsədi ilə təşkil olunur. Növbəlilik əsasında hər il bir ölkədə keçirilən təlimlərdə boru kəmərlərinin idarəetməsini həyata keçirən şirkətlərin əməkdaşları da iştirak edirlər.

6-18 iyun. Odessada Ukrayna HDQ və ABŞ HDQ-nin ikitərəfli "Si Briz-2011" hərbi təlimləri keçirilib. SNT proqramı üzrə iyunun 18-dək davam edən bu tədbir beynəlxalq sülhyaratma əməliyyatının planlaşdırılması və keçirilməsi mövzusuna həsr edilib. Təlimlər zamanı 17 ölkənin - Azərbaycan, Əlcəzair, Belçika, Böyük Britaniya, Gürcüstan, Danimarka, Kanada, Keniya, Makedoniya, Moldova, Niderland, Almaniya, Türkiyə, ABŞ, Ukrayna, Fransa və İsveçin nümayəndələri beynəlxalq sülhyaratma əməliyyatının planlaşdırılması və keçirilməsi dövründə çoxmillətli qərargahların və qüvvələrin fəaliyyəti məşq etdirilib.

7 iyun. ATƏT-in fəaliyyətdə olan sədrinin şəxsi nümayəndəsinin mandatına uyğun olaraq Azərbaycan Respublikasının Ağdam-Bərdə yolundakı təmas xəttində monitorinq keçirilib. Monitorinq zamanı ATƏT Minsk Qrupu həmsədrləri və ATƏT-in fəaliyyətdə olan sədrinin şəxsi nümayəndəsi təmas xəttinin qarşı tərəfinə keçiblər.

7 iyun. Müdafiə naziri Səfər Əbiyev Avropa Xarici Siyasət Xidmətinin Avropa və Mərkəzi Asiya üzrə idarəedici direktoru Miroslav Layçakın başçılıq etdiyi heyəti qəbul edib.

8 iyun. ANAMA-nın məlumatına görə, cari ilin may ayı ərzində Azərbaycanda 2 238 519 kvadratmetr ərazi yoxlanılaraq, mina və partlamamış hərbi sursatdan (PHS) təmizlənib. Əməliyyatlar nəticəsində 4 222 PHS, 2 ədəd tank və 1 ədəd piyada əleyhinə mina aşkar edilərək zərərsizləşdirilib. Ötən ay mina/PHS hadisəsi qeydə alınmayıb.

7-10 iyun. Daxili Qoşunlardan general-leytenant Zakir Həsənovun rəhbərlik etdiyi heyət Türkiyədə Avrasiya Hərbi Statuslu Hüquq-Mühafizə Təşkilatları Qurumunun təsis toplantısında iştirak edib.

7-8 iyun. Polşanın paytaxtı Varşavada İsveçrə səfirliyi və Polşanın Beynəlxalq Məsələlər İnstitutunun təşkilatçılığı ilə "Şərq tərəfdaşlığı ölkələrində təhlükəsizlik sektorunun demokratik idarəetməsi" adlı seminar keçirilib. Azərbaycanı bu tədbirdə Sülh və Demokratiya İnstitutundan Arif Yunusov və "Doktrina" Jurnalistlərin Hərbi Araşdırmalar Mərkəzinin sədri Cəsur Məmmədov təmsil ediblər.

8 iyun. Yevlax rayonunda "N" saylı hərbi hissənin baş leytenantı Rüfət Əliyevin (1985) idarə etdiyi 10 UP 508 dövlət nömrə nişanlı, "Mercedes-180" markalı minik avtomobili yoldan çıxaraq aşıb. Hadisə nəticəsində sürücü Rüfət Əliyev və onun hərbçi yoldaşları - İsmayıl Bədəlov (1982) və Səxavət Fərzəliyev (1986) müxtəlif dərəcəli bədən xəsarətləri alıblar.

8 iyun. ABŞ Gürcüstan ordusuna 40 ədəd "Hummer" avtomobili bağışlayıb. Avtomobillərdən Əfqanıstanda xidmətə hazırlaşan gürcü sülhməramlılarının təlimlərində istifadə ediləcək.

9 iyun. Minsk Qrupu həmsədrləri Ermənistana səfər ediblər.

9 iyun. "Cəmiyyət dəstəkli polis işinə dair Beynəlxalq Konfrans"da çıxışında ATƏT Bakı ofisinin rəhbəri Əli Bilgə Cankorel bildirib ki, Azərbaycanda cəmiyyət tərəfindən dəstəklənən polis layihəsinin icrası nəticəsində polislə ictimaiyyət arasında ünsiyyətdə nəzərəçarpan inkişaf müşahidə olunur.

9 iyun. Nazirlər Kabineti müdafiə sənayesi kompleksi üçün yüksək ixtisaslı kadrların hazırlanması haqqında qərar qəbul edib. Qərara əsasən, Azərbaycan Texniki Universitetində "Xüsusi texnika və texnologiya" fakültəsi və müvafiq kafedralar yaradılacaq.

9 iyun. Vyanada Ümumdünya İqtisadi Forumunda Avropa və Mərkəzi Asiyanın regional sammiti çərçivəsində təşkil olunan "Rusiyaya baxış" mövzulu iclasda çıxışı zamanı Ermənistanın baş naziri Tiqran Sarkisyan bildirib ki, ATƏT Minsk Qrupu uğura yaxındır və ABŞ, Fransa və Rusiya prezidentlərinin bəyanatı buna sübutdur.

Onun sözlərinə görə, erməni tərəfi sözügedən bəyanatda mövcud olan əsas prinsiplərlə razıdır və siyasi iradə nümayiş etdirməyə, həmçinin təcili razılaşmaya gəlməyə hazırdır.

9 iyun. Rusiya-NATO Şurasının müdafiə nazirləri səviyyəsində Brüsseldə keçirilmiş iclasının yekunlarına dair mətbuat konfransında Rusiya müdafiə naziri Anatoli Serdyukov deyib ki, Rusiyanın NATO ilə bərabər birgə raketdənmüdafiə sistemi yaratmağa dair bütün təklifləri rədd edilib. O, qarşı tərəfdən pozitiv və aydın siqnal almadıqlarını, Rusiyanın narahatlıqlarının aradan qaldırılmadığını söyləyib.

9 iyun. Azərbaycan xarici işlər nazirinin müavini Araz Əzimov bildirib ki, rəsmi Bakı Qəbələ radiolokasiya stansiyasının icarə qiymətini artırmaq niyyətindədir. Əzimov bildirib ki, Rusiya icarənin müddətini uzatmaq istəyir: "Biz əməkdaşlığı davam etdirməyə hazırıq, amma şərtlərə yenidən baxmaq lazımdır". Nazir müavini rəsmi Bakının konkret hansı məbləği tələb etdiyini açıqlamayıb, yalnız bildirib ki, risklərin yüksəlməsi və Qəbələ RLS-in əhəmiyyətinin artması səbəbilə icarə haqqının məbləği də artırılmalıdır.

9 iyun. NATO-nun Cənubi Qafqaz üzrə xüsusi nümayəndəsi Ceyms Appaturay bəyan edib ki, Əfqanıstandakı birgə hərbi əməliyyatlar və Azərbaycanın əldə etdiyi təcrübə Azərbaycan Silahlı Qüvvələrinin modernləşdirilməsinə təkan verəcək. Appaturay davamlı templə inkişaf edən Azərbaycanla hərbi əməkdaşlığın səviyyəsini və intensivliyini yüksək qiymətləndirib.

9 iyun. Tərtər rayonunda yerləşən hərbi hissədə silah və sursatla ehtiyatsız davranma nəticəsində əsgərlər Rəşad Məmmədov, Babək Şahlarzadə və Alxan Ağakərimov müxtəlif dərəcəli bədən xəsarətləri alıblar.

9 iyun. Müdafiə naziri Səfər Əbiyev NATO müdafiə nazirlərinin Əfqanıstanda Beynəlxalq Təhlükəsizliyə Yardım Qüvvələri (ISAF) əməliyyatlarına töhfə verən qeyri-NATO dövlətləri ilə keçirilmiş görüşündə iştirak edib.

9 iyun. Nazir Səfər Əbiyev Brüsseldə NATO baş katibinin Qafqaz və Mərkəzi Asiya üzrə xüsusi nümayəndəsi Ceyms Appaturayla görüşüb. Görüşdə tərəflər Azərbaycan-NATO münasibətlərini, NATO ilə qarşılıqlı operativ uzlaşmanın artırılması, ölkəmizin ISAF əməliyyatına töhfəsi və digər məsələləri müzakirə edib, Dağlıq Qarabağ münaqişəsinin tənzimlənmə prosesi ilə bağlı fikir mübadiləsi aparıblar.

9 iyun. Nazir Səfər Əbiyev Brüsseldə Polşanın müdafiə naziri Boqdan Kliç ilə də görüşüb. Görüşdə iki ölkə arasında müdafiə sahəsində əməkdaşlıq məsələləri müzakirə olunub.

10 iyun. Minsk Qrupu həmsədrləri Bernar Fasie (Fransa), Robert Bradtke (ABŞ) və İqor Popov (Rusiya) regiona səfərlərinin yekunu ilə bağlı birgə bəyanatla çıxış ediblər. Həmsədrlər tərəfləri bu keçid dövründə hər hansı bir təxribat xarakterli addım və hərəkətlərə yol verməməyə çağırıblar.

10 iyun. NATO-nun Qafqaz və Mərkəzi Asiya üzrə xüsusi nümayəndəsi Ceyms Appaturayın Azərbaycana səfəri təxirə salınıb. Səfərin təxirə salınmasına səbəb Brüssel aeroportu işçilərinin tətil etməsidir.

10 iyun. BQXK-nın nümayəndələri Azərbaycanda əsirlikdə saxlanılan 3 erməni hərbçi və bir ailənin üzvü olan 5 mülki şəxsə baş çəkiblər.

11 iyun. Moskvada Azərbaycan, Ermənistan və Rusiya xarici işlər nazirləri Elmar Məmmədyarov, Edvard Nalbandyan və Sergey Lavrovun işgüzar görüşü keçirilib. Müzakirələr zamanı tərəflər Dağlıq Qarabağ münaqişəsinin nizamlanmasının əsas prinsiplərinin bir sıra əsas məsələsi üzrə mövqelərini yaxınlaşdırmağa nail olublar. Bu sənədin layihəsinə iyunun sonunda baş tutacaq üçtərəfli sammitdə baxılacaq. Məmmədyarov bildirib ki, Dağlıq Qarabağ münaqişəsi ilə bağlı aparılan Moskva danışıqlarında irəliləyiş əldə olunub: "Amma bəzi məqamlar hələ də açıq qalır".

13 iyun. İranın Hava Hücumundan Müdafiə Qərargahının komandanı Fərzad İsmaili deyib ki, İran Silahlı Qüvvələri radardan yayına bilən təyyarələrin aşkarlanması, identifikasiyası və izlənməsi texnologiyasını əldə edib.

13 iyun. Prezident Administrasiyası ictimai-siyasi şöbəsinin müdiri Əli Həsənov deyib ki, "Ermənistan-Azərbaycan, Dağlıq Qarabağ münaqişəsinin həllində ciddi irəliləyişin əldə olunmasının vaxtı yetişib".

13 iyun. Xəzər Donanmasının komandanı, kontr-admiral Sergey Alyokminski bildirib ki, Rusiya yaxın aylarda Xəzər dənizindəki hərbi donanmasını yeni gəmilər hesabına daha da gücləndirməyi planlaşdırır. Qarşıdakı yay aylarında Rusiya Hərbi Dəniz Qüvvələrinin Xəzər flotiliyasına əlavə 3 döyüş gəmisi daxil etmək planlaşdırılır.

13 iyun. Bu ilin sonunadək Azərbaycanla Almaniya arasında nüvə sahəsində birgə elmi və kadr hazırlığını nəzərdə tutan niyyət protokolu imzalanacaq.

13 iyun. Azərbaycanın NATO PA-da nümayəndə heyətinin üzvü Məlahət İbrahimqızı bildirib ki, NATO Parlament Assambleyasında Dağlıq Qarabağ münaqişəsi ilə bağlı sənədin qəbul olunması üzərində iş aparılır.

13-16 iyun. Özbəkistanın müdafiə naziri Kabul Berdiyev əməkdaşlıq üzrə danışıqlar aparılması üçün Səfər Əbiyevin dəvəti əsasında Bakıda olub. İyunun 14-də MSN-in Elektron Hesablayıcı Maşınlar Zavodunda K.Berdiyevin rəhbərlik etdiyi heyətlə görüş keçirilib.

13-24 iyun. Azərbaycan NATO-nun manevrlərinə müşahidəçilər göndərib. Litva Müdafiə Nazirliyindən bildiriblər ki, bu il NATO-nun Litvada irimiqyaslı "Kəhrəba ümid-2011" ("Amber Hope 2011") manevrlərində 9 ölkədən 2,2 min hərbi qulluqçu və mülki mütəxəssis iştirak edir. Quru və dəniz mərhələlərindən ibarət təlimlərə Şimali Atlantika Alyansının yeddi üzvü - Kanada, Latviya, Litva, Norveç, Polşa, ABŞ və Estoniya, habelə NATO-nun tərəfdaşları Gürcüstan və Finlandiya öz bölmə və nümayəndələrini, Azərbaycan, Belarus, Qazaxıstan, Moldova, Ukrayna və Ermənistan isə öz müşahidəçilərini göndərmişlər.

14 iyun. Gürcüstanlı həmkarı Qriqol Vaşadze ilə Tiflisdə keçirdiyi birgə mətbuat konfransında Azərbaycanın xarici işlər naziri Elmar Məmmədyarov Dağlıq Qarabağ münaqişəsinin nizamlanmasına dair sualları cavablandıraraq konfliktin mərhələlərlə həll olunacağını, burada kommunikasiya və digər məsələlərin nəzərə alınacağını deyib.

14 iyun. Müdafiə Nazirliyininin yaydığı məlumata görə, Azərbaycan SQ təmsilçiləri aşağıdakı təlimlərə qatılacaqlar:

- Cənubi Qafqaz və Moldova "Clearing House" konfransı. 20-22.06.2011. Berlin, Almaniya.

- FTP-dən əlavə. 20-22.06.2011. "Yırtıcı Şahin-3" təliminin 2-ci koordinasiya iclası.

Doha, Qətər dövləti.

- Azərbaycan-ABŞ iş planına əsasən. 20-24.06.2011. Birgə əməliyyatlar simpoziumu. Konstanta, Rumıniya.

- Dil testi seminarı. 20.06-01.07.2011. Garmiş, Almaniya.

- BQXK-nin təşkilatçılığı ilə. 26.06-03.07.2011. "Hərbi Əməliyyatlarını idarə edən beynəlxalq qaydalar mövzusunda yüksək səviyyəli seminar". Saldanha/ Keyp Taun Cənubi Afrika Respublikası.

14-18 iyun. Azərbaycan hərbçiləri Ukraynada keçirilən Çoxmillətli "Si Briz-2011" hərbi təlimlərinin üçüncü mərhələsinə qatılıblar. Sülhyaratma qüvvələri piratlara qarşı əməliyyatlarla əlaqədar fəal hərbi təlimlər keçiblər. Təlimlərin gedişində sülhyaratma qüvvələri piratlar tərəfindən zəbt olunmuş gəminin azad edilməsi, piratların dənizdə və quruda fəaliyyət göstərən bazalarının məhv edilməsi əməliyyatlarını məşq ediblər. Təlimlərdə quru, dəniz və aviasiya komponentlərindən istifadə edilib.

14 iyun-8 iyul. Azərbaycan SQ nümayəndələri Almaniyanın Hamburq şəhərində "Avropa təhlükəsizliyi-2011" kursunda iştirak edir.

15 iyun. Bakıda "NATO: XXI əsrin siyasi-hərbi bloku" mövzusunda "dəyirmi masa" keçirilib. Konfrans iştirakçıları Azərbaycanla NATO arasındakı əməkdaşlığı, NATO-nun Lissabon sammitindən sonrakı yeni siyasətini, bu sammitin alyansın gələcəyi baxımından əhəmiyyətini, NATO ilə Avropa Birliyinin əməkdaşlığını müzakirə ediblər.

15 iyun 2011- 5 yanvar 2012. Azərbaycan SQ nümayəndələri ABŞ-ın San-Antonio şəhərində keçirilən piyada zabitinin təməl kursuna qatılıblar. Kursda iştirak Azərbaycan-ABŞ iş planına əsasən baş tutub.

15 iyun. Avropa Parlamentinin beynəlxalq məsələlər üzrə komitəsində Minsk Qrupu həmsədrlərinin iştirakı ilə Dağlıq Qarabağ münaqişəsinə həsr olunmuş dinləmə keçirilib. Dinləmədə amerikalı və fransalı həmsədrlər Robert Bradtke ilə Bernar Fasie, ATƏT-in fəaliyyətdə olan sədrinin şəxsi nümayəndəsi Anjey Kasprşik, AB-nin Cənubi Qafqaz üzrə keçmiş xüsusi nümayəndəsi Piter Semnebi və digər şəxslər çıxış ediblər.

15 iyun. ABŞ-ın Azərbaycan səfiri Metyu Brayza deyib ki, sülhməramlı qüvvələrin Dağlıq Qarabağ münaqişəsi zonasında yerləşdirilməsi gündəmdə olan məsələlərdəndir.

16 iyun. Avroparlamentdə keçiriləcək dinləmələr ərəfəsində AB Dağlıq Qarabağın Azərbaycana aid olduğunu növbəti dəfə təsdiq edib. Bu barədə Avropa Parlamentinin rəsmi saytında yerləşdirilən bəyanatda qeyd olunub: "Dağlıq Qarabağ Azərbaycanın beynəlxalq səviyyədə tanınmış sərhədləri çərçivəsində erməni əhalisinin əksəriyyət təşkil etdiyi ərazidir".

16 iyun. AB-nin Cənubi Qafqaz üzrə keçmiş xüsusi təmsilçisi Piter Semnebi bildirib ki, AB-nin Cənubi Qafqaz üzrə yeni xüsusi təmsilçisinin sentyabrın əvvəllərində təyin edilməsi Dağlıq Qarabağ münaqişəsinin həll edilməsinə kömək edəcək.

16 iyun. Beynəlxalq Böhran Qrupunun Avropa proqramlarının direktoru Sabina Freyzer bildirib ki, Kazan görüşündə irəliləyişə nail olunub-olunmayacağını proqnozlaşdırmaq çətindir, lakin bunun mümkünlüyünə böyük ümidlər var.

16 iyun. Rusiya XİN rəsmi nümayəndəsi Aleksandr Lukaşeviç bəyan edib ki, Rusiya, Ermənistan və Azərbaycan liderləri Kazan görüşündə Dağlıq Qarabağ münaqişəsinin həllinin əsas prinsipləri haqqında layihəyə dair qərar qəbul edəcəklər.

16 iyun. Tovuz rayonunda yerləşən "N" saylı hərbi hissədə əsgər Mərdan Bəşirov SVD silahından (snayper) açdığı atəş nəticəsində əsgər Vüsal Əlizadə qətlə yetirilib. Hadisənin münaqişə zəminində baş verdiyi bildirilir.

16 iyun. Ağstafa rayonunda yerləşən "N" saylı hərbi hissədə kiçik çavuş Kənan Muradov dövlət nişanı olmayan motosikletlə gedərkən Ağstafa-Sadıxlı yolunda idarəetməni itirərək, onu aşırıb. Hərbçi hadisə yerində həlak olub.

17 iyun. Qazaxıstan xarici işlər nazirinin müavini Kayrat Sarıbay Astanada "Xəzər şelfinin inkişafı" konfransında çıxışı zamanı deyib ki, sahilyanı ölkələrin problemə ümumi yanaşması Xəzərin hüquqi statusunun yaxın perspektivdə öz həllini tapacağına ümid yaradır.

17 iyun. Müdafiə Nazirliyinin Bayıl qəsəbəsində yerləşən "N" saylı hərbi hissəsinin - hospitalının vəzifəli şəxsləri barəsində cinayət işi başlanıb.

17 iyun. RF xarici işlər nazirinin müavini Qriqori Karasin bildirib ki, Rusiya və Azərbaycan "Qəbələ radiolokasiya stansiyasının icarəsi üzrə razılaşmanın şərtlərini müasirləşdirmək" üçün danışıqlar aparır. "Sovet dövründə tikilmiş və əhəmiyyətli hərbi obyekt olan Qəbələ RLS-ə gəlincə, Rusiya Federasiyası icarə üçün 10 milyon dollar (ildə) ödəyirdi", - deyə o qeyd edib. Onun sözlərinə görə, "bu gün belə desək, icarə şərtlərini müasirləşdirmək üçün danışıqlar aparılır.

17 iyun. Azərbaycan Respublikasının NATO yanında nümayəndəliyinin başçısı səfir Xəzər İbrahim NATO baş katibi Anders Foq Rasmussen tərəfindən qəbul edilib. Baş katib görüşdə NATO-nun Azərbaycan ilə tərəfdaşlığının daha da inkişafını arzuladığını ifadə edib. NATO baş katibi Azərbaycanın NATO ilə güclü tərəfdaşlığını, xüsusən də Əfqanıstanda Beynəlxalq Təhlükəsizliyə Yardım Qüvvələri (ISAF) əməliyyatına töhfəsini təqdir edib.

18 iyun. Müdafiə Nazirliyinin Şəmkir hərbi birləşməsinin Qazax rayonu ərazisində yerləşən hərbi hissəsinin əsgəri Fikrət Hümbətov avtomat silahdan çənəsinin altını nişan alaraq atəş açıb. İntihara cəhd edən əsgərin vəziyyəti ağırdır.

19 iyun. MN-in Naftalan şəhərində yerləşən "N" saylı hərbi hissəsinin taqım komandiri, baş leytenant Anar Malik oğlu Məhərrəmov yaşadığı evdə (Şəki) özünü asaraq intihar edib.

19 iyun. İran prezidenti Mahmud Əhmədinejad Azərbaycan prezidenti İlham Əliyevə zəng edib. Telefon söhbəti zamanı ikitərəfli əlaqələr, regional təhlükəsizlik və terrorizmlə mübarizə məsələləri ətrafında fikir mübadiləsi aparılıb.

20-22 iyun. ABŞ Milli Müdafiə Universitetinin təşkilatçılığı ilə İstanbulda "21-ci əsrdə müharibələrin yeni aspektləri" mövzusunda beynəlxalq simpozium keçirilib. Simpoziumda Azərbaycanı Prezident yanında Strateji Araşdırmalar Mərkəzinin (SAM) hərbi-siyasi və milli təhlükəsizlik məsələləri üzrə ekspert Reşad Kərimov təmsil edib. SAM əməkdaşı "Sosial şəbəkələr və hərbi münaqişələr" mövzusunda məruzə ilə çıxış edib.

24 iyun. Kazanda Azərbaycan, Rusiya və Ermənistan prezidentlərinin görüşü keçirilib. Bu, prezidentlər İlham Əliyev, Dmitri Medvedev və Serj Sarkisyanın üçtərəfli formatda doqquzuncu görüşdür. Belə formatda bundan əvvəlki görüş martın 5-də Soçidə keçirilib. Soçi görüşündən əvvəl isə ötən il oktyabrın 27-də Həştərxanda görüş keçirilib. Azərbaycan, Ermənistan və Rusiya prezidentləri İlham Əliyev, Dmitri Medvedev və Serj Sarkisyanın görüşünün yekunları üzrə Həştərxanda Dağlıq Qarabağ münaqişəsi tərəfləri - Azərbaycan və Ermənistan tərəfindən bəyannamə imzalanıb. Bəyannamə hərbi əsirlərin qaytarılmasını nəzərdə tutur və humanitar xarakter daşıyır.

24-25 iyun. ABŞ dövlət katibinin hərbi-siyasi məsələlər üzrə köməkçisi Andryu J. Şapiro Azərbaycanda səfərdədir. Səfər çərçivəsində cənab Şapiro yüksək vəzifəli mülki və hərbi zabitlərlə görüşlər keçirir, ümumi təhlükəsizlik probleminin həllinə yönəlmiş diplomatik təşəbbüslər barədə fikir mübadiləsi aparır. Qonaq həmçinin ABŞ-Azərbaycan təhlükəsizlik dialoqunda ABŞ heyətinə də başçılıq edir. Dialoq beynəlxalq təhlükəsizlik məsələlərinə həsr olunub və dəniz təhlükəsizliyi, terrorla mübarizə, sərhəd təhlükəsizliyi, nüvə silahının yayılmaması sahələrində ikitərəfli əməkdaşlığı genişləndirmək barədə müzakirələri əhatə edir.

26 iyun. SQ Günü münasibətilə Bakıda hərbi paradda ordu cəbbəxanasından ən son model silah və hərbi texnikaların nümayişi gözlənilir.

29 iyun - 3 iyul. Rusiyanın Sankt-Peterburq şəhərində Beynəlxalq Dəniz Müdafiə Şousu-2011 (International Maritime Defence Show - "İMDS-2011") keçiriləcək. "İMDS-2011" şousuna Azərbaycan Müdafiə Sənayesi Nazirliyinin (MSN) "Sənayecihaz" Elm-İstehsalat Müəssisəsi (EİM) də qatılacaq. Şounun sərgi salonunda Azərbaycan müəssisəsinin istehsal etdiyi dəniz sistemləri nümayiş olunacaq. Dəniz şousuna Azərbaycanın Hərbi-Dəniz Qüvvələri və DSX Sahil Mühafizəsi heyətləri də qatılacaq..

Ayna.- 2011.- 25 iyun.- S.9-10.