Müdafiə və Təhlükəsizlik sektorunda nələr baş verib? (01- 15 mart)

1 mart. Dövlət Torpaq və Xəritəçəkmə Komitəsinin sədri Qərib Məmmədov bildirib ki, yaxın vaxtlarda komitəsinin mütəxəssisləri RF-in müvafiq orqanlarının mütəxəssisləri ilə birlikdə təsdiq olunmuş dövlət sərhəd xəttinin demarkasiyası (dövlət sərhəd nişanlarının basdırılması) işlərinə başlayacaqlar.

1 mart. ATƏT-in fəaliyyətdə olan sədrinin şəxsi nümayəndəsinin mandatına uyğun olaraq Qazax rayonunun Bala Cəfərli kəndi ilə Ermənistanın Kayan kəndi arasındakı yolun yaxınlığında qoşunların təmas xəttində monitorinq keçirilib.

1 mart. ANAMA partlayıcı sursatların zərərsizləşdirilməsi sahəsində NATO-nun Gürcüstanda həyata keçirdiyi layihə çərçivəsində NATO-nun Maddi-Texniki Təminat və Təchizat Agentliyi (NAMSA) tərəfindən keçirilən tenderin qalibi olub.

1 mart. Nazirlər Kabineti "Daxili işlər orqanlarının əməkdaşlarına fasiləsiz xidmət illərinə görə haqqın ödənilməsi üçün xidmət illərinin hesablanması Qaydası"na əlavə edib.

1 mart. Sloveniyanın müdafiə naziri Lyubitsa Eloşiçin Azərbaycana səfəri zamanı "Azərbaycan Respublikası MN və Sloveniya Respublikası MN arasında müdafiə sahəsində əməkdaşlıq haqqında saziş" imzalanıb.

2 mart. MN-in Zirə qəsəbəsində yerləşən "N" saylı hərbi hissəsinin əsgəri Muxtar Ələsgərov (1987) çoxsaylı bıçaq xəsarətləri ilə xəstəxanaya çatdırılıb.

3 mart. Narkotiklərə nəzarət üzrə Beynəlxalq Komitənin illik hesabatında qeyd olunur ki, Əfqanıstandan narkotik maddələrin daşınması üçün Cənubi Qafqaz ölkələrindən tranzit kimi istifadə olunur.

3 mart. Müdafiə naziri Səfər Əbiyev ABŞ-ın Azərbaycandakı fövqəladə və səlahiyyətli səfiri Metyu Brayzanı qəbul edib.

3 mart. Azərbaycan və Rusiya arasında sərhədləri müəyyənləşdirən sərhəd müqaviləsi ratifikasiya üçün Rusiya Dövlət Dumasına təqdim edilib.

3 mart. Prezident İlham Əliyev Buzovna qəsəbəsinin Albalılıq yaşayış sahəsində MSN "Şərq" İstehsalat Birliyinin yeni "AZAD Systems Co" müəssisəsinin açılışında iştirak edib, "Cihaz" İstehsalat Birliyinin "Sənayecihaz" Elm-İstehsalat Mərkəzinə baş çəkib.

3 mart. General-leytenant Kərim Vəliyev Bakı hərbi birləşməsinə komandir təyin olunub.

4 mart. BQXK-nın Ermənistandakı nümayəndələri erməni əsirliyində olan Azərbaycan ordusunun çavuşu Anar Hacıyeva baş çəkiblər. A.Hacıyev 2009-cu il mayın 10-da Ermənistan SQ tərəfindən əsir götürülüb.

4 mart. Macarıstan səfərindən qayıdan xarici işlər nazirinin müavini Xələf Xələfov Ramil Səfərovun ekstradisiyası ilə bağlı məsələnin həllinə ümid etdiyini bildirib.

4 mart. Ermənistan tərəfinə əsir düşən Azərbaycan Ordusunun kiçik çavuşu Roman Novruz oğlu Hüseynov (1985) ailəsinə məktub yazıb. R.Hüseynov Daşkəsəndə N saylı hərbi hissədə manqa komandiri olaraq aprel ayından avqustun 22-nə qədər xidmət edib. O, 2010-cu il avqustun 27-də Ermənistan SQ tərəfindən əsir götürülüb.

4 mart. Milli Məclisin iclasında "Əlilliyin və uşaqların sağlamlıq imkanları məhdudluğunun qarşısının alınması, əlillərin və sağlamlıq imkanları məhdud uşaqların reabilitasiyası və sosial müdafiəsi haqqında" qanuna əlavə edilməsi barədə qanun layihəsi müzakirə olunaraq qəbul olunub.

4 mart. MN bölgələrdəki hərbi hissələrdə mətbuat nümayəndələri üçün "Açıq qapı" gününün keçirilməsinə başlayıb.

4 mart. Zaqatala rayonunun Muxax kəndində baş verən yol-nəqliyyat hadisəsi nəticəsində milli ordunun əsgəri N.Mamıyev xəsarət alıb və xəstəxanaya yerləşdirilib.

5 mart. Soçidə Azərbaycan, Rusiya və Ermənistan prezidentlərinin görüşü keçirilib. Dağlıq Qarabağ münaqişəsinin nizamlanmasına dair apardıqları danışıqların yekunları ilə bağlı birgə bəyanat qəbul edilib. Prezidentlər qısa müddət ərzində hərbi əsirlərin dəyişdirilməsi prosesinin başa çatdırılmasına dair razılığa gəliblər.

5 mart. MN-in Təlim-Tədris Mərkəzində baş vermiş insident nəticəsində leytenant rütbəli şəxs ağır bədən xəsarəti alaraq Mərkəzi Kliniki Hərbi Hospitala yerləşdirilib.

6 mart. Ombudsmanın 2010-cu ildəki fəaliyyətinə dair Milli Məclisə təqdim etdiyi hesabatında qeyd olunub ki, ötən il Azərbaycanda vətəndaşlar tərəfindən müxtəlif məsələlərlə bağlı MN-in Mərkəzi Arxivinə ünvanlanmış çoxsaylı müraciətlərə, demək olar, cavab verilməyib.

7 mart. MN mətbuat xidmətinin yaydığı məlumata görə, son illərdə nazirliyin hərbi şəhərciklərində yerinə yetirilmiş tikinti, yenidənqurma, təmir və abadlıq işləri şəxsi heyətin mənzil-məişət və yaşayış şəraitini yaxşılaşdırmaqla yanaşı, onun döyüş hazırlığı səviyyəsini də yüksəldib. Belə ki, MN-in 43 hərbi şəhərciyində tikinti, yenidənqurma və təmir işləri aparılıb.

8 mart. Hökumətin parlamentə təqdim etdiyi hesabatda bildirilir ki, 2008-ci ilin dekabr ayında Tərtər rayonu ərazisində dislokasiya olunmuş hərbi hissənin postuna basqınla əlaqədar həyata keçirilən əməliyyat-axtarış tədbirləri nəticəsində cinayətdə iştirak edən "Sahil camaatı" adlı radikal qruplaşmanın daha 4 üzvü tutularaq istintaqa təhvil verilib. Qeyd edək ki, sözügedən hərbi hissəyə basqın edən qruplaşmanın digər 4 üzvü 2009-cu ildə həbs edilib. Hesabatda bildirilir ki, Pakistan və Əfqanıstan ərazilərində koalisiya qüvvələrinə qarşı silahlı birləşmələrdə iştirak etdiklərinə görə barələrində beynəlxalq axtarış elan olunmuş 3 nəfər Azərbaycan vətəndaşı 2010-cu ildə saxta sənədlərlə ölkə ərazisinə daxil olmaq istəyərkən tutulublar.

8 mart. Ermənistan silahlı bölmələrinin açdığı atəş nəticəsində Ağdam rayonunun Şıxlar kənd sakini Fariz Arzu oğlu Bədəlov (8 yaşında) həlak olub.

9 mart. İrəvanda baş verən yol qəzasında Ermənistan MN sülhməramlı taburunun əməkdaşları - 22 yaşlı Levon Terteryan və Robert Mnatsakanyan ölüb, 26 yaşlı Armen Mkrtçyan isə yaralanıb.

9 mart. Türkmənistanın Azərbaycandakı səfiri Toyli Komekov bildirib ki, yaxın günlərdə Bakıda Xəzərin hüququ statusu ilə bağlı beştərəfli görüş keçiriləcək.

9 mart. Nazirlər Kabinetinin Milli Məclisə verdiyi hesabatda bildirilib ki, DSX ötən il Türkiyədən 2 yeni itisürətli sərhəd gözətçi kateri alıb. Ötən il, həmçinin ARDNŞ-nin balansından 1 ədəd irihəcmli gəmi Sahil Mühafizəsinə qəbul olunub. Xəzərin ekologiyasının yaxşılaşdırılması məqsədi ilə Sahil Mühafizəsinin bazasında Çexiya istehsalı olan 300 kubmetrlik gücdə təmizləyici qurğu istifadəyə verilib. Xəzər dənizinin Azərbaycan sektorunun şimal hissəsində - Xaçmaz rayonunun Müqtədir qəsəbəsində şimal divizionunun inşasına başlanılıb. Həmçinin 3 irihəcmli sərhəd gözətçi gəmisinin döyüş imkanlarının artırılması üçün müvafiq tədbirlər görülüb.

9 mart. Erməni hərbçisinin qətlində təqsirləndirilərək Macarıstanda ömürlük həbs cəzası almış Azərbaycan Ordusunun zabiti Ramil Səfərovun macar dilindən tərcümə etdiyi "Qapı" romanının təqdimatı keçirilib.

9 mart. Prezident İ.Əliyev general-leytenant Bəylər Eyyubovun 1-ci dərəcəli "Vətənə xidmətə görə" ordeni ilə təltif edilməsi haqqında sərəncam imzalayıb.

9 mart. ATƏT Minsk Qrupu həmsədrlərinin Vilnüsdə yaydıqları birgə bəyanatda bildirilir ki, həmsədrlər prezidentlərin martın 5-də Soçidə keçirilən görüşündən əvvəl və sonra qoşunların təmas xəttində atəşkəs rejiminin pozulması haqqında xəbərlərdən ciddi şəkildə narahatdır.

9 mart. Prezident İ.Əliyev ölkə vətəndaşlarının 2011-ci il aprelin 1-dən 30-dək həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında fərman imzalayıb.

9 mart. DSX-nin Göytəpə sərhəd dəstəsinin silah-sursat xidmətinin rəisi mayor Raqif Qəniyev özünə xidməti silahdan atəş açaraq intihar edib.

10 mart. ATƏT-in fəaliyyətdə olan sədrinin şəxsi nümayəndəsinin mandatına uyğun olaraq Goranboy rayonunun Borsunlu kəndinin cənubundakı təmas xəttində monitorinq keçirilib.

10 mart. Türkiyə Jandarma Baş Komandanlığının baş qərargah rəisi, general-polkovnik Fikrət Demirtaş Azərbaycana gəlib.

10 mart. Prezident İ.Əliyev "Azərbaycan Respublikası DİN Daxili Qoşunlarının hərbi qulluqçularını təltif etmək haqqında" sərəncam imzalayıb. Eyni zamanda dövlət başçısının sərəncamı ilə polkovnik Ramiz Firudin oğlu Tahirova və DQ Qərargahı rəisinin birinci müavini Şahin İsgəndər oğlu Məmmədova general-mayor hərbi rütbəsi verilib. 10 mart. Erməni mənbələri bildirir ki, təmas xəttinin Tərtərin Yuxarı Çaylı kəndi istiqamətində atəşkəs pozulub və Azərbaycan tərəfinin açdığı atəşlə Ermənistan silahlı qüvvələrinin 19 yaşlı əsgəri Artur Ağbabyan öldürülüb. Azərbaycan MN bu insidentlə bağlı şərh verməyib.

10 mart. Müdafiə naziri Səfər Əbiyev NATO baş katibinin dəvəti ilə Şimali Atlantika Şurasının İSAF əməliyyatına töhfə verən qeyri-NATO ölkələri müdafiə nazirləri səviyyəsində keçiriləcək görüşdə iştirak etmək üçün Brüsselə yola düşüb.

10 mart. BDU rektoru, MM Elm və təhsil komitəsinin üzvü Abel Məhərrəmov bildirib ki, magistratura və aspiranturaya daxil olmaq istəyən gənclərə hərbi xidmətdən möhlət hüququ verilə bilər.

11 mart. MN Şəmkir hərbi birləşməsinin təşkilat, səfərbərlik və kadrlar bölməsinin rəisi olmuş polkovnik-leytenant Azər Hüseynov bıçaqla qollarının damarlarını və boğazını kəsib.

11 mart. Prezident Serj Sarkisyan Soçi görüşündə Azərbaycan tərəfinin mövqeyində müəyyən dəyişiklik olduğunu iddia etmişdir.

13 mart.ATƏT-in fəaliyyətdə olan sədri, Litva xarici işlər naziri Audronyus Ajubalis Azərbaycana rəsmi səfərə gəlib.

14 mart. Həmsədrlər Bakıda Dağlıq Qarabağla bağlı qiymətləndirmə missiyasının hesabatını Azərbaycan prezidenti İlham Əliyevə təqdim ediblər. Hesabat Ermənistan prezidentinə də təqdim olunub.

14 mart. 2011-ci ilin yanvarında Sumqayıt ŞHK tərəfindən həqiqi hərbi xidmətə çağırılmış Pirverdiyev Müzəffər Rafiq oğlu (1990) Qazaxda yerləşən "N" saylı hərbi hissədə xəstəlikdən (pnevmoniya) vəfat edib.

14 mart. Dövlət Departamentinin açıqladığı son hesabatda bildirilib ki, ABŞ 2012-ci ildə Ermənistana 8 milyon 750 min dollar, Azərbaycana isə 5 milyon 248 min dollar məbləğində hərbi və təhlükəsizlik yardımı göstərməyi planlaşdırır.

15 mart. Ermənistan MN bəyan edib ki, Ermənistan və Azərbaycan prezidentləri arasında Rusiya dövlət başçısının vasitəçiliyi ilə əldə edilmiş razılaşmaya uyğun olaraq azərbaycanlı əsirləri qaytarmağa hazırdır.

15 mart. SQ əsgəri, 2010-cu ilin yanvarında Oğuz Rayon HK-dan çağırılmış Orxan İlham oğlu Məmmədov (1991) özünü asaraq intihar edib.

15 mart. Prezident İ.Əliyevin sərəncamı ilə Xəzər Zahir oğlu İbrahim Azərbaycanın NATO yanında nümayəndəliyinin başçısı təyin edilib.

15 mart. MN mətbuat xidmətinin məlumatına görə, yaxın vaxtlarda SQ hərbçiləri bu tədbirlərdə iştirak edəcəklər:

21-25 mart. NATO Birləşmiş Əməliyyat, Birləşmiş Transformasiya və Hərbi Əməkdaşlıq İdarəsinin Hərbi Əməkdaşlığın Koordinasiyası konfransı, Lusern, İsveçrə.

21 mart - 1 aprel. Hava əməliyyatları üzrə terminologiya kursu, İzmir, Türkiyə.

24 mart - 2 iyun. FTP-dən əlavə. 6-cı Beynəlxalq Qərargah zabitləri kursu, Liptovski Mikulaş, Slovakiya.

25 mart - 17 iyun. C.Marşal adına Avropa Təhlükəsizlik Araşdırmaları Mərkəzinin Ali Təhlükəsizlik Araşdırmaları proqramı çərçivəsində növbəti kursu, Qarmiş-Partenkirxen, Almaniya.

28 mart - 1 aprel. FTP-dən əlavə, "Combined Endevor 2011" təliminin Əsas planlaşdırma konfransı, Lissabon, Portuqaliya.

30 mart. FTP-dən əlavə, NATO Məktəbində keçirilən tədbirlərin planlaşdırıcıları mövzusunda seminar. Oberammerqau, Almaniya.

Ayna.- 2011.- 19 mart.- S.9-10.