Təhlükəsizlik və müdafiə sektoru - 16-30 aprel

16 aprel. KHVTİC sədri, general-mayor Novruzəli Orucov bildirib ki, Aviasiya Mərkəzi ərazisində Azərbaycan Könüllü Hərbi Vətənpərvərlik Texniki İdman Cəmiyyəti və Dövlət Sərhəd Xidməti birgə aerodrom inşa edəcək. Hazırda yaxınlıqdakı hərbi bazada baş vermiş partlayış nəticəsində mərkəzin ərazisinə dağılmış mina və döyüş sursatları təmizlənir: "İşlər başa çatandan sonra mərkəz yenidən qurulacaq və buradan Dövlət Sərhəd Xidməti ilə birgə istifadə edəcəyik".

16 aprel. Çernobıl faciəsinin 25-ci ildönümü ərəfəsində Azərbaycan Fövqəladə Hallar Nazirliyi sistemində çalışan Çernobıl qəzasının iştirakçıları ilə görüş keçirilib.

17 aprel. Stokholm Beynəlxalq Sülh Araşdırmaları İnstitutunun hesabatına görə, 1991-ci ildən bu yana burda Azərbaycan Ermənistan və Gürcüstanla müqayisədə silah alınmasına daha çox pul xərcləyir. Özü də əvvəlki illərlə müqayisədə fərq artıb. Məsələn, 2010-cu ildə Azərbaycan silah alınmasına 1.5 milyard dollar, Ermənistan 422, Gürcüstan 454 milyon dollar xərcləyib. Ancaq institutun 2009-cu il üçün açıqladığı rəqəmlərinə görə, ümumdaxili məhsulunun ən böyük hissəsini silah almağa xərcləyən ölkə Gürcüstandır. Rəsmi Tbilisi silah alınmasına ÜDM-in 5.6, Yerevan 4.2, Bakı isə cəmi 3.4 faizi qədər vəsait xərcləyir.

18 aprel. Azərbaycanda səfərdə olan Rumıniya prezidenti Trayan Basesku deyib ki, Dağlıq Qarabağ münaqişəsi beynəlxalq hüquq normaları çərçivəsində həll olunmalıdır: "Lakin bu həll istənilən dövlətin ərazi bütövlüyünə təsir göstərməməlidir. Ümidvarıq ki, Dağlıq Qarabağ problemi Azərbaycanın ərazi bütövlüyü, beynəlxalq hüquq normaları, xüsusilə azlıqların suveren dövlət çərçivəsində hüquqlarına hörmət prinsipi əsasında həll olunacaq".

18 aprel. Türkiyə Milli Müdafiə Nazirliyinin məlumatına görə, 2010-cu ildə Türkiyənin müdafiə sektorunda fəaliyyət göstərən iki şirkət Azərbaycana 267 milyon ABŞ dolları dəyərində ixracat gerçəkləşdirib. Məlumata görə, Türkiyənin ən böyük raket və reaktiv döyüş sursatlarının istehsalçısı olan ROKETSAN şirkəti Azərbaycanla 244 milyon dollarlıq ixracat müqaviləsinin icrasını gerçəkləşdirib. "Otokar" şirkəti isə Azərbaycanla zirehli nəqliyyat vasitələrinin ("Cobra" təkərli transportyorların və "Land Rover Defender" avtomobillərinin) ixracına dair 23 milyon dollar dəyərində müqavilə imzalayaraq icrasına başlayıb. Bundan başqa, Türkiyənin dənizçilik sektorunda fəaliyyət göstərən "Dearsan" tərsanəsi Xəzəryanı ölkələrdən Türkmənistandan 120 milyon dollarlıq gəmi sifarişi alaraq işlərə başlayıb.

18-20 aprel. Azərbaycanın milli təhlükəsizlik naziri general-leytenant Eldar Mahmudovun dəvəti ilə Bolqarıstanın Milli Kəşfiyyat Xidmətinin direktoru general-leytenant Kirço Kirov ölkəmizdə rəsmi səfərdə olmuşdur.

18-20 aprel. Türkiyənin Quru Qoşunları komandanı, ordu generalı Erdal Ceylanoğlu Azərbaycana səfərə gəlib. Müdafiə naziri general-polkovnik Səfər Əbiyevlə görüşündə hərbi əməkdaşlıq məsələlərinin perspektivləri diqqət mərkəzində olub. Dövlət Sərhəd Xidmətinin rəisi, general-leytenant Elçin Quliyevlə görüş zamanı isə Türkiyə heyətinə Azərbaycan sərhəd təhlükəsizliyi sisteminin təşkili, əməliyyat şəraiti və mövcud təhdidlər barədə məlumat verilib. Görüşdə sərhəd təhlükəsizliyi sahəsində ikitərəfli əlaqələrin səviyyəsi yüksək qiymətləndirilib, gələcək hərbi əməkdaşlıq vəziyyəti və perspektivləri müzakirə olunub.

19 aprel. Müdafiə Nazirliyinin Naxçıvan MR-da yerləşən "N" saylı hərbi hissəsində 2011-ci ildə Ordubad Rayon Hərbi Komissarlığından həqiqi hərbi xidmətə çağırılmış, 1992-ci il təvəllüdlü Orxan Nəriman oğlu Babayev xəstəlikdən vəfat edib.

19 aprel. Gürcüstan Rusiya ilə, ərazisindən keçməklə, bu ölkənin Ermənistandakı hərbi bazasına yüklərin daşınmasını nəzərdə tutan razılaşmanı ləğv edib. Tbilisi bu qərarını 5 illik müqavilə müddətinin bitməsilə əsaslandırıb.

19 aprel. 15-25 may tarixlərində "Regional cavab-2011" adı altında keçirilməsi gözlənilən ABŞ - Azərbaycan birgə hərbi təlimləri növbəti dəfə təxirə salınıb. Müdafiə Nazirliyi mətbuat xidmətinin rəisi, polkovnik-leytenant Eldar Sabiroğlu deyib ki, nəzərdə tutulan təlim qeyri-müəyyən vaxta təxirə salınır.

19 aprel. "Flight Global" agentliyinin məlumatına görə, İsrail Kosmik Sənaye şirkəti (Israel Aerospace Industries) Azərbaycana "Heron" və "Searcher 2" pilotsuz kəşfiyyat təyyarələrini təklif edib. Məlumatda qeyd olunub ki, bu yaxınlarda İAİ heyətinin Azərbaycana səfəri zamanı belə bir təklif səsləndirilib.

20 aprel. Ermənistan SQ Azərbaycanın işğal altında olan keçmiş Ağdərə rayonunun ərazisində, Tərtərin Talış və Yuxarı Çaylı kəndləri istiqamətində hərbi təlimlərə başlayıblar. Təlimlərdə müxtəlif çaplı artilleriya qurğularından və zirehli texnikalardan istifadə edilib. Həmin ərazilərə yaxın yaşayış məntəqələrində partlayış səsləri eşidilib.

20 aprel. Xocavənd rayonunun Kuropatkino kəndi yaxınlığında ermənilərin atəşkəs rejimini pozması nəticəsində Azərbaycan Ordusunun əsgərləri - Fazil Elxan oğlu Abdullayev (1991) və Elşən İsfəndiyar oğlu Nəzərov (1990) düşmən gülləsinə tuş gəlib. Hər iki əsgər hospitala yerləşdirilib. F.Abdullayevin vəziyyəti orta ağır qiymətləndirilir. E.Nəzərov isə yüngül xəsarət alıb. F.Abdullayev Gədəbəy, E.Nəzərov isə Kəlbəcər RHK-dan həqiqi hərbi xidmətə çağırılıblar.

20 aprel. Azərbaycanda rəsmi səfərdə olan Litva daxili işlər naziri Raymundas Palaitisin rəhbərlik etdiyi heyəti fövqəladə hallar naziri Kəmaləddin Heydərov qəbul edib.

21 aprel. Türkiyənin xarici işlər naziri Əhməd Davudoğlu bəyan edib ki, "Türkiyə və Ermənistan arasındakı münasibətlərin yaxşılaşması və Qarabağ münaqişəsinin nizamlanması məsələləri ilk baxışdan əlaqəli görünməsə də, bu iki prosesin bağlılığı mübahisəsizdir".

21 aprel. Şəmkir Hərbi Birləşməsinin hərbi hissələrindən birində 2010-cu ilin oktyabrında Nərimanov RHK-dan həqiqi hərbi xidmətə çağırılmış Elçin Əli oğlu Kərimbəyli (1992) ürək tutmasından dünyasını dəyişib.

22 aprel. Ermənistan Silahlı Qüvvələrinin Ağdam rayonu istiqamətində atəşkəsi pozması nəticəsində ordumuzun giziri Anar Əli oğlu Süleymanov (1982) düşmən gülləsinə tuş gəlib. Güllə yarası alan gizir hospitala yerləşdirilib.

22 aprel. Moskvada Azərbaycan, Ermənistan və Rusiya XİN başçıları arasında Dağlıq Qarabağ münaqişəsinin nizamlanmasına dair görüş keçirilib. Görüşlə bağlı geniş məlumat verilməyib.

25 aprel. ANAMA mətbuat xidmətindən bildirilib ki, NATO-nun yardımı ilə Azərbaycanın Ağstafa rayonunda həyata keçirilən "Partlamamış sursatların təmizlənməsi üzrə Saloğlu layihəsi" çərçivsində əməliyyatlar iyun ayında tamamlanacaq. Hazırda ərazidə əməliyyatlarla yanaşı, xarici keyfiyyət yoxlamaları da aparılır. Xarici keyfiyyət yoxlamaları ərazidə işlər bitdikdən sonra daha bir neçə ay davam edəcək. Agentlikdən verilən məlumata görə, 2005-ci ilin dekabrından bu günə qədər Saloğlu kəndində 5 528 263 kvadratmetr ərazi təmizlənib, 586 765 partlamamış sursatlar aşkar olunaraq zərərsizləşdirib. Qeyd edək ki, Saloğlu sovet ordusunun Cənubi Qafqazda ən böyük sursat anbarı olub. Rusların 1991-ci ilin avqust ayında bazada törətdikləri partlayış nəticəsində 138 sursat anbarı dağılıb.

25 aprel. KHVTİC Respublika Şurasının sədri, general-mayor Novruzəli Orucov bildirib ki, Azərbaycanda yeniyetmələr üçün desant kursları açılacaq. Onun sözlərinə görə, desant kurslarında yeniyetmələrə bir neçə istiqamətdə - nəzəri hazırlıq, paraşütdən tullanma, əlbəyaxa döyüş və silah atıcılığı - təlimlər keçiləcək.

25 aprel. Azərbaycanın xarici işlər naziri Elmar Məmmədyarov "Rusiya qlobal siyasətdə" adlı jurnala müsahibəsində bəyan edib ki, Ermənistan ordusunun Qarabağdan çıxarılması çox vacibdir və buradakı vəziyyəti köklü surətdə dəyişə bilər.

25 aprel. İran HDQ komandanı, kontr-admiral Həbibullah Səyyari deyib ki, İran İR-in yeni müdafiə doktrinası hazırlanır. Səyyari yeni müdafiə doktrinası haqqında jurnalistlərə danışarkən İranın hərbi qüvvələrinin xüsusən Hind okeanının Ərəb dənizinin bir hissəsi olan Ədən körfəzi sularında iştirakının vacibliyini vurğulayıb. Admiral körfəzin sularında daha 30 xarici dövlətin gəmilərinin olduğunu qeyd edib.

25 aprel. Azərbaycanın müdafiə naziri Səfər Əbiyev ABŞ-ın Azərbaycandakı fövqəladə və səlahiyyətli səfiri Metyu Brayzanı qəbul edib. Görüşdə ABŞ-Azərbaycan ikitərəfli hərbi əməkdaşlıq məsələlərinin gedişatı və perspektivləri müzakirə edilib, eyni zamanda təxirə salınmış "Regional cavab - 2011" birgə hərbi təliminin keçiriləcəyi vaxt barədə də danışılıb. Bundan başqa, enerji infrastrukturunun təhlükəsizliyi haqda fikir mübadiləsi aparılıb.

25 aprel. ABŞ dövlət katibi müavininin Avropa və Avrasiya məsələləri üzrə köməkçisi Tina Kaydanau Azərbaycana səfər edib. O prezident İ.Əliyev və xarici işlər naziri Elmar Məmmədyarovla görüşüb. İkitərəfli əməkdaşlıq perspektivləri müzakirə olunub.

26-28 aprel. Bakıda Azərbaycan və ABŞ arasında imzalanmış Hərbi əməkdaşlıq üzrə İş Planı çərçivəsində Azərbaycan-ABŞ ikitərəfli planlaşdırma üzrə əməkdaşlıq konfransı keçirilib. Konfransda ölkələr arasında növbəti il üçün planlaşdırılan hərbi əməkdaşlıq mövzuları müzakirə olunub.

26-27 aprel. Xəzər dənizi üzrə Azərbaycan, Rusiya, Türkmənistan, Qazaxıstan və İran tərəflərinin işçi qrupun Bakı görüşü zamanı konvensiyanın ayrı-ayrı müddəaları razılaşdırılıb. Bunu Bakıda Xəzər dənizinin hüquqi statusunun müəyyənləşdirilməsinə dair konvensiyasının müzakirə edilməsi məqsədilə xüsusi işçi qrupun iclasından sonra keçirdiyi mətbuat konfransında xarici işlər nazirinin müavini Xələf Xələfov bildirib. Xələfov əlavə edib ki, Bakı görüşünün yekunu olaraq Xəzərin hüquqi statusuna dair konvensiyanın işlənməsi üzrə işçi qrupunun iclasının yekunları üzrə kommunike qəbul edilib.

26-28 aprel. ANAMA baş əməliyyat meneceri Samir Poladov Xorvatiyanın Sibenik şəhərində 8-ci Beynəlxalq Humanitar Minatəmizləmə Simpoziumu - "Humanitarian Demining 2011 - HUDEM-2011"ə qatılıb. Tədbir çərçivəsində istehsalçı şirkətlər özlərinin yeni texnologiyalarını sərgiləyiblər.

27 aprel. CAR-ın Adi Silahlanmaya Milli Nəzarət Komitəsinin (NCACC) məlumatına görə, ötən il Cənubi Afrika Respublikası (CAR) Azərbaycana 17 674 395 ABŞ dolları (119 119 764 CAR randı) dəyərində hərbi məhsul ixrac edib. CAR-ın 2010-cu ildə Azərbaycana hansı məhsulları ixrac etməsi barədə məlumatlar isə açıqlanmayıb. 2009-cu ildə isə CAR şirkətləri tərəfindən Azərbaycana 22 515 775 dollar dəyərində ixracat gerçəkləşdirilib. 2009-cu ildə CAR-dan əsasən Azərbaycana "Paramount Group" şirkəti tərəfindən 10 ədəd "Marauder" tipli zirehli personal daşıyıcı satılıb.

27 aprel. Ermənistan SQ növbəti dəfə Xocavənd rayonu istiqamətində atəşkəs rejimini pozublar. Azərbaycan SQ-nin açdığı cavab atəşi nəticəsində bir erməni hərbçisi öldürülüb. Ermənistan mətbuatı başından aldığı güllə yarasından keçinən hərbçinin 1992-ci il təvəllüdlü Baxşiyan Vazgen Karlenoviç olduğunu yazır. Yaralı hospitala aparılanda yolda keçinib.

28 aprel. Gürcüstanın ədliyyə naziri Zurab Adeişvili Azərbaycana səfərə gəlib. Səfər çərçivəsində Zurab Adeişvili Azərbaycanda bir sıra görüşlər keçirib. Görüşlərdə iki ölkənin prokurorluq və ədliyyə orqanları arasında əməkdaşlıq məsələləri müzakirə edilib.

28 aprel. ABŞ-ın dövlət katibinin siyasi məsələlər üzrə birinci müavini Uilyam Berns ATƏT Minsk Qrupu həmsədrləri və ATƏT sədrinin şəxsi nümayəndəsi ilə görüşüb. Uilyam Berns həmsədrlərlə onların Dağlıq Qarabağ münaqişəsinin nizamlanması üzrə yaxın və gələcək fəaliyyətini müzakirə edib.

28 aprel. Bakıda ABŞ konqresmenlərindən ibarət bir heyətlə Milli Məclis üzvləri arasında görüş olub. Azərbaycanlı parlamentarilər ilə müzakirələr zamanı Dağlıq Qarabağ münaqişəsinin nizamlanma məsələsinə toxunulub.

28 aprel. Bakı Hərbi Məhkəməsindən verilən məlumata görə, Milli Ordunun zabitləri Azər Xalıqov və Azər Hüseynov Cinayət Məcəlləsinin 311.3.1-ci (rüşvət alma - qabaqcadan əlbir olan bir qrup şəxs və ya mütəşəkkil dəstə tərəfindən törədildikdə) maddəsi ilə təqsirləndirilirlər. Onların barəsində ötən gün Bakı Hərbi Məhkəməsinin qərarı ilə həbs qətimkan tədbiri seçilib. Qeyd edək ki, Müdafiə Nazirliyinin Şəmkir Hərbi Birləşməsinin şəxsi heyətin uçotu üzrə məsul zabiti, polkovnik-leytenant Azər Xəlil oğlu Hüseynov bu il martın 14-də ülgüclə boğazını kəsərək intihara cəhd edib. Bu faktla bağlı araşdırma aparılır.

28 aprel. Azərbaycan və Litva baş prokurorluqları arasında memorandum imzalanıb. Memorandumda korrupsiya və qanun pozuntularının başqa növlərinin araşdırılması üzrə potensialın artırılması məqsədilə müxtəlif sahələrdə əməkdaşlığa dair razılaşma öz əksini tapıb.

29 aprel. Bakı Hərbi Məhkəməsindən verilən məlumata görə, Bakının Suraxanı Rayon Hərbi Komissarlığı çağırış şöbəsinin əməkdaşı Mərbud Məmmədov Respublika Hərbi Prokurorluğu tərəfindən başlanmış cinayət işi ilə əlaqədar məsuliyyətə cəlb edilib. O, Cinayət Məcəlləsinin 32.5-ci (cinayətdə iştirakçılıq) və 311.1-ci (rüşvət alma) maddəsi ilə ittiham olunur. Bakı Hərbi Məhkəməsinin qərarı ilə M.Məmmədov barəsində həbs qətimkan tədbiri seçilib. Qeyd edək ki, bir neçə gün əvvəl Suraxanı və Binəqədi rayon hərbi komissarları rüşvətxorluqda təqsirli bilinərək həbs olunmuşlar.

29 aprel. Azərbaycan MSN Milli Aerokosmik Agentliyi (MAKA) döyüş texnikalarının personalı üçün yay mövsümü şlemafonların istehsalına başlayıb. MAKA-nın müəssisəsində istehsal edilən bu qoruyucu baş geyimləri xüsusi qulaqlıqla da təchiz olunub.

29 aprel. "Dok İNG" şirkətindən verilən məlumata görə, Azərbaycan Xorvatiyanın "Dok İNG" şirkətinin istehsalı olan MV-10 tipli mexaniki minatəmizləmə maşınlarına maraq göstərir.

29 aprel. Erməni hərbi birləşmələri Ağdam və Xocavənd rayonlarının işğal altında olan ərazilərində artilleriya və zirehli texnikalardan istifadə etməklə hərbi təlimlərə başlayıb.

29 aprel. Prezident İlham Əliyev Bakıda səfərdə olan Ukrayna prezidenti Viktor Yanukoviçlə birgə mətbuat konfransında bəyan edib ki, Azərbaycan və Ukrayna arasında hərbi-texniki sahədə əməkdaşlıq ənənəvi formata malikdir. "Bu gün biz iqtisadiyyatın bu mühüm seqmentində yeni keyfiyyət səviyyəsinə çıxırıq, əməkdaşlığın istiqamətlərini genişləndiririk. Əminəm ki, bu gün mövcud olan təcrübə qarşılıqlı faydalı hərbi-texniki əməkdaşlığı çox fəal inkişaf etdirməyə imkan verəcək. Bu əməkdaşlıq həm də birgə tədqiqatları və müştərək istehsalı nəzərdə tutur", - deyə o qeyd edib.

29 aprel. Sankt-Peterburq Dövlət Universiteti və NATO-nun Moskva İnformasiya Bürosunun dəstəyi ilə "Rusiya - NATO tərəfdaşlığı: Lissabon sammitinin qərarlarını yerinə yetirərkən" adlı beynəlxalq konfrans keçirilib. Azərbaycandan tədbirə "Doktrina" Jurnalistlərin Hərbi Araşdırmalar Mərkəzinin rəhbəri Cəsur Sümərinli qatılıb. O, "NATO-nun Əfqanıstan missiyası: Tərəfdaş ölkələrin mövcud və perspektiv töhfələrində Rusiyanın rolu" adlı məruzə ilə çıxış edib.

29 aprel. Erməni mətbuatının məlumatına görə, Azərbaycan əsgərləri daha iki erməni hərbçini məhv edib, birini isə yaralayıb. Bu barədə Ermənistan mətbuatı məlumat yayıb. Onların adı hələlik açıqlanmır. Azərbaycan Müdafiə Nazirliyi isə bəyan edib ki, Dağlıq Qarabağda iki erməni əsgərini Azərbaycan Ordusu deyil, Ermənistan vətəndaşı olan hərbçi öldürüb.

30 aprel. ANAMA-dan verilən məlumata görə, Vyetnam minaaxtaranları Azərbaycanın təcrübəsini öyrənəcəklər. Məlumatda bildirilir ki, Vyetnam Veteranları Amerika Fondunun (VVAF) 12 nəfərlik heyəti mayın 1-dən 5-dək Azərbaycanda səfərdə olacaq. Qeyd edək ki, buna qədər ANAMA tərəfindən Əfqanıstan, Tacikistan, Türkiyə və Gürcüstan minaaxtaranlarına müxtəlif təlimlər keçirilib.

30 aprel. Türkiyənin Makina və Kimya Sənayesi Təşkilatından (MKEK) verilən məlumata görə, Azərbaycan mühəndislərinin yaratdığı 12.7 mm çaplı "İstiqlal" snayper tüfənginin (İST-12.7 Anti-Material Rifle) bu ilin sonlarında Türkiyədə istehsalına başlana bilər. Bu iri çaplı snayper tüfənginin birgə istehsalına dair Türkiyə və Azərbaycan arasında ötən ilin sonlarında anlaşma əldə olunub. Bu ilin fevral ayında isə MKEK-lə Azərbaycan Müdafiə Sənayesi Nazirliyi (MSN) arasında imzalanmış müqavilədə birgə istehsal əksini tapıb. Birgə istehsal olunacaq snayper tüfəngi Azərbaycanda hazırda sınaq testləri keçirilən modeldən xeyli fərqlənəcək. Silahın dizaynında, çəkisində və bəzi sistemlərində əhəmiyyətli dəyişiklik ediləcək. Hazırda bununla bağlı tədqiqatlar aparılır, eyni zamanda texnologiyanın transferi həyata keçirilir. Silahın Türkiyədə istehsal ediləcək modelinin həm Türkiyə Silahlı Qüvvələrinin silahlanmasına verilməsi, həm də MKEK-MSN əməkdaşlığı çərçivəsində digər NATO ölkələrinə və xarici bazarlara birgə çıxarılması nəzərdə tutulur. İST-12.7 snayper tüfənginin Türkiyədə istehsalı Azərbaycanın ilk hərbi-texnoloji transferidir.

30 aprel. Erməni hərbi birləşmələri səhərdən hərbi təlimləri Ağdamın işğal altında olan Şahbulaq dağı və Uzundərə ərazisində keçiriblər. Düşmən qüvvələri təlimlərdə artilleriya, zirehli texnika və atıcı silahlardan istifadə edib.

30 aprel. MN mətbuat xidmətinin yaydığı məlumata görə, Azərbaycan SQ hərbi qulluqçuları bu tədbirlərdə iştirak edəcəklər:

FTP-dən əlavə. 02-06.05.2011. Əldədüzəltmə partlayıcı qurğular əleyhinə mübarizə mövzusunda kurs. İzmir, Türkiyə.

"Anadolu Ulduzu-2011" axtarış və xilasetmə təliminin müşahidəçilərin ziyarət günündə iştirak. 03-05.05.2011. İzmir, Türkiyə.

Azərbaycan-ABŞ iş planına əsasən. 04.05.2011-06.09.2012. Döyüş dalğıcı kursu. San-Antonio, ABŞ.

Azərbaycan-Böyük Britaniya ikitərəfli əməkdaşlıq planına əsasən. 09.0517.06.2011.Çoxmillətli sülhü dəstəkləmə əməliyyatları üzrə təlimatçı hazırlığı (MPSO İTC) kursu. Vişkov, Çexiya.

NATO-nun İnformasiya əməliyyatları planlaşdırıcıları kursu. 09-20.05.2011. Oberamerqau, Almaniya.

Azərbaycan-Litva ikitərəfli əməkdaşlıq planına əsasən. 10-13.05.2011. Hospitala aparılmazdan əvvəl travmalara qarşı mübarizə üzrə hərbi kurs. Kaunas, Litva.

Tərəfdaş ölkələrin qərargah zabitləri üçün tanışlıq kursu. 12-18.05.2011. Brüssel / Mons, Belçika..

Ayna.- 2011.- 7 may.- S.9-10.