"Gözəlçələr" Giresunu heyrətə gətirib

Gəncə teatrının "Giresun Aksu" festivalında iştirakı uğurlu olub

Gəncə Dövlət Dram Teatrının Giresun şəhər bələdiyyəsinin (Türkiyə) dəvəti üzrə 17-ci Uluslararası "Giresun Aksu" teatr festivalında iştirakı teatrın həyatında ilk xarici səfər idi və çox uğurlu alındı, - deyə teatrın direktoru Əli Qasımov qəzetimizə müsahibəsində bildirdi. - Festivala bizi bələdiyyə rəisi Kərim Aksu dəvət etmişdi. Biz də Tuncer Tucenoğlunun "Gözəlçələr" tamaşasıyla bu festivala qatıldıq və tamaşa çox bəyənildi".

Əli Qasımov festivala qatılan digər teatrlardan fərqli olaraq Gəncə teatrının tamaşadan 10 gün əvvəl və sonra orada qalmaq üçün dəvət olunduğunu söylədi. Direktor bunun qardaş Türkiyənin Azərbaycana olan böyük hörmətindən irəli gəldiyini dedi.

Truppa sözügedən tamaşanı iki dəfə, mayın 8-də Giresunun özündə, 9-da isə Bulancaq turizm şəhərində göstəriblər. "Gözəlçələr" pyesi türk yazarına məxsusdur və bu əsər Türkiyənin özündə də bir neçə dəfə teatrlarda tamaşaya qoyulub.

"Bu tamaşaya müraciət etməyimiz heç də təsadüfi deyildi. Bildiyimiz kimi, son dönəmdə qadın alveri dünya miqyasında böyük bir bəlaya çevrilib. Qadınların əzablara, iztirablara məruz qalması, təhqir olunması, onların insan dəllalları tərəfindən aldadılaraq qul kimi satılması, ümumiyyətlə, qadın alveri kimi arzuolunmaz halların tənqidi əsərdə öz əksini tapır", - deyə direktor bu aktual problemə toxunan tamaşanın uğurlu alındığını və yaxşı qarşılandığını söylədi. Direktor danışır ki, Türkiyədə incəsənətə böyük qiymət verilir və xalq teatr tamaşalarına böyük həvəslə gəlir. Orada bizim artistləri yaxşı mənada təəccübləndirən bir çox şeylərin şahidi olduğunu da sözlərinə əlavə edir. Bir sözlə, teatr tamaşalarına könüllü axın direktoru əməlli-başlı heyrətləndirib.

Zalda əyləşənlərin əksəriyyəti ziyalılar, orta yaşlı nəslin insanları imiş. Çoxusu tamaşalara ailəlikcə gəlibmiş. Onların arasında Türkiyə universitetlərində müəllim işləyən bizim azərbaycanlı professor xanımları görüblər. Zalda olan oturacaqlardan savayı, əlavə stullar qoyulubmuş ki, hər kəs yerləşə bilsin. Publika tamaşanı çox diqqətlə izləmiş və sonda bir neçə dəqiqə zalı tərk etməyərək, gurultulu alqışlarla aktyorları səhnəyə dəvət etmişlər.

Əli Qasımov danışır ki, tamaşadan sonra mövzu teatr həvəskarları tərəfindən müzakirə olundu, maraqlı fikirlər söyləndi, Azərbaycan teatrının bu günü, başqa ölkə teatrlarından fərqi və s. kimi müqayisələr də aparılıb.

Giresun bələdiyyə başqanı Gəncə teatr truppasını təbrik etmiş, müxtəlif mükafatlar, eləcə də mədəniyyət nazirinə və Gəncə Şəhər İcra Hakimiyyəti rəhbərliyinə təşəkkürnamələr təqdim olunmuşdur. Vəd verilib ki, bundan belə Gəncə teatrıyla Giresun bələdiyyəsi arasında sıx əlaqələr olacaq, hər il ənənəvi festivallara dəvət olunacaqlar.

Gəncə teatrı iyunun 19-dan 21-nə kimi Türkiyədə daha bir qastrolda olacaq. Onlar bu dəfə Ordu şəhərində Antuan de-Sent Ekzüperenin "Balaca Şahzadə" əsərini təqdim edəcəklər. Tamaşaya teatrın baş rejissoru Gümrah Ömərov quruluş verib.

Aytən ƏLƏKBƏROVA

Ayna.- 2011.- 21 may.- S.20.