Akademik Ədilə Namazova: "İncəsənətin insan əxlaqının formalaşmasında rolu danılmazdır"

Telekanalların bu yöndə proqramlar yayımlaması tövsiyə edilir

"Cəmiyyətdə əxlaq məsələsi hamıya eyni dərəcədə aiddir. İstər kişi olsun, istər qadın, istər gənc, istərsə də uşaq. Cəmiyyətdə qadınların adını bəlkə ona görə daha çox əxlaqla bağlayırlar ki, o, anadır. Qadın ailədə ab-hava yaradandır. Əgər onun əxlaqı yaxşıdırsa, böyük-kiçiyin yerini bilsə, tərbiyəsi olsa, demək, uşağını da elə tərbiyəli, əxlaqlı böyüdəcək. Nə qədər olmasa, həyat yoldaşı da ona baxıb ibrət götürəcək. O, həyat yoldaşını da düzgün istiqamətləndirəcək", - deyə akademik Ədilə Namazova söyləyir.

Onun fikrincə, insan əxlaqının formalaşması, mənəviyyatının zənginləşməsi üçün ilk növbədə onun tərbiyəsi, daha sonra biliyi. İnsanın dərrakəsi, düşüncəsi onun mənəviyyatının zənginləşməsində mühüm rol oynayır. Ailə əxlaqı isə valideynlərdən başlayır. Akademik deyir: "Ailədə əxlaq olmasa, o ailədə böyüyən uşaqda da əxlaq olmaz. "Ot kökü üstə bitər" - deyib atalar. Heç görmüsünüzmü, qızılgülün kökündən qanqal bitsin? Və yaxud buğda kökündən hər hansı alaq bitdiyini görmüsünüzmü?

Müsahibim onu da qeyd etdi ki, incəsənətin müxtəlif növlərinin insanın təlim-tərbiyəsində, əxlaqının formalaşmasında rolu danılmazdır. Odur ki, hər bir telekanal həftə müddətində tərbiyəvi, əxlaqi əhəmiyyətli verilişlər təqdim etməlidir. Sirr deyil ki, indi böyük romanları oxuyan azdır. Və yaxud müasir ədiblərimizin böyük kitablarını da oxuyan azdır:

"Belə vəziyyət 30-40 il bundan əvvəl başqa ölkələrdə baş vermişdi. Mən bir dəfə "Oqonyok" jurnalından Lev Tolstoyun Amerikada yaşayan nəvəsinin müsahibəsini oxudum. Ona sual vermişdilər ki, indi Amerikada Tolstoyun əsərlərini oxuyan, tanıyan varmı? O isə cavabında demişdi ki, biz indi elə dövrdə yaşayırıq ki, insanların Tolstoyun "Hərb və sülh", "Anna Karenina" kimi qalın əsərlərini oxumağa hövsələsi çatmır. Onlar daha çox detektiv janrında olan xırda kitablara üstünlük verirlər. Metroda gedərkən, parkda dincələrkən bu kimi kitabları oxuyurlar. Mən onda təəccüblənirdim, axı bizdə hamımız Mirzə İbrahimovun "Gələcək gün" romanını əldən-ələ oxuyurduq. Və yaxud Süleyman Rəhimovun əsərlərini mütaliə edirdik. Səməd Vurğunun şeirlərini əzbər bilirdik. Görünür, dediyimiz inkişaf insanları bir qədər böyük əsərlərdən uzaqlaşdırır. Təbii ki, bu da onların əxlaqına təsir edir. Digər tərəfdən, biz mənəviyyatı, əxlaqı özümüz də inkişaf etdirməliyik".

A.AKİF

Ayna.- 2011.- 19 noyabr.- S.18.