Gündüz Abbasovun şəxsi arxiv fondu yaradılıb

Azərbaycan Film Fondunda tanınmış aktyor Gündüz Abbasovun şəxsi arxiv fondu yaradılıb. Film Fondunun mətbuat xidmətinin rəsmisi Rəşad Qasımovun məlumatına görə, aktyorun fonduna 40-a yaxın fotomaterial daxil olub. Bu sənədlərin bəziləri şəxsi arxivlərdən götürülüb. Bəziləri isə fotoqraf Pərviz Quliyevin vaxtilə çəkdiyi fotolardır.

Gündüz Abbasov ötən əsrin 50-60-cı illərinin ən məşhur aktyorlarından biri olub. "Əsl dost". "Bir qalanın sirri", "Bizim küçə", "Leyli və Məcnun", "Telefonçu qız", "Torpaq, dəniz, od, səma", "Dədə Qorqud", "Nizami" və digər filmlərdə çəkilib.

Mətbuat əlaqələndiricisi daha bir xəbəri bizimlə bölüşdü. Qurum Rusiya Dövlət Film Fondu ilə birgə xalq artisti, kinorejissor Tofiq İsmayılovun "Əzablı yollar" ("Məlikməmməd") film-nağılını bərpa edib. Öyrəndik ki, filmin bərpası Mədəniyyət və Turizm Nazirliyinin dəstəyi ilə həyata keçirilib. 1982-ci ildə "Azərbaycanfilm" kinostudiyasında istehsal olunan filmin ssenari müəllifi Oqtay Məmmədov, quruluşçu rejissoru Tofiq İsmayılov, quruluşçu operatoru Şərif Şərifovdur. Baş rollarda Yaşar Nuri, Eldəniz Zeynalov, Siyavuş Aslan, Həmidə Ömərova və başqaları çəkilib.

"Məlikməmməd" nağılı əsasında çəkilən film uşaqlar üçün nəzərdə tutulub. Filmin bərpa variantı bu yaxınlarda AzTV-də nümayiş olunacaq.

Ayna.- 2011.- 19 noyabr.- S.20.