Yaqub Zurufçu: "Bəxtim gətirdi ki, sənətimi sevən auditoriya qazana bildim"

Bu şöhrətli ifaçı Bakıda özünü xoşbəxt sayır

"Sənətçi harada yaşamağından asılı olmayaraq, əvvəlcə özünə məxsus bir səviyyə tutmalıdır. Sonra böyük konsertlər, planlar, səfərlər barədə danışmaq olar. Mənim bəxtim gətirdi ki, Azərbaycanda ifamı, sənətimi sevən auditoriya qazana bildim.

Amma xaricdən bura gəlib, daha sonra başqa bir ölkəyə gedib konsert vermək bir qədər riskli işdir. Çünki başqa ölkədə məni yaxşı tanımırlar" - bu sözləri əməkdar artist Yaqub Zurufçu deyir. Danışır ki, dəfələrlə ona xarici səhnədə çıxış etmək təklifləri olur. Amma o düşünür ki, konsertdən əvvəl həmin ifaçının piarı aparılmalı, gedəcəyi ölkədə onu tanımalıdırlar. O deyir ki, ən başlıcası, yerli telekanal müğənninin yaradıcılığını təbliğ etməlidir. Amma belə bir kampaniya olmadığı üçün risk etməyə dəyməz. O, "hələ ki məni tanıyan publika üçün oxuyuram" deyir. Oxuduğu mahnıların çoxunun bəstəkarı özü olan sənətçi Qarabağa da bir neçə kompozisiya həsr etdiyini bildirdi. Amma başqa sənətçilərə bu bəstədən pay düşmür. Musiqilərini "öz ifası üçün" bəstələdiyini və heç kimlə bölüşmək fikrində olmadığını sözünə əlavə etdi. Məşhur "Ayrılıq" mahnısını iki variantda səsləndirən Yaqub Zurufçu dedi ki, ikinci ifaçı Ququş ləqəbi ilə tanınan əslən azərbaycanlı Faiqə Atəşindir.

"Bu mahnını bir musiqiçi aranjiman etmişdi və o zaman ikimiz də məşhur xanəndə olduğumuza görə belə qərara gəldilər ki, bir dəfə o oxusun, bir dəfə mən. O zaman mənim yadıma gəlir ki, məşhur türk sənətçi Emel Sayın da Tehrana gəlmişdi, orda konsert verirdi. Bir variantı da o oxudu. Emel Sayının "Ayrılıq" mahnısını oxuduğu yazı məndə var və başqa bir sənətçi də var, o da oxumuşdu, adını çəkmək istəmirəm. Və elə oldu ki, Ququşla mənim ifamızı bəyəndilər və mən də Azərbaycanda məşhurlaşdım, gəldim bura. Özümü burada xoşbəxt hiss edirəm".

Xatırladaq ki, bir vaxtlar "Ayrılıq" mahnısının müəlliflərinin adı ətrafında mübahisə yaranmışdı. O zaman Yaqub Zurufçu açıqlama verdi ki, mahnının əsl müəllifləri Fərhad İbrahim və Əli Səlimidir. Müğənni təəssüflə qeyd edir ki, Güney Azərbaycandan şair söhbəti düşəndə təkcə Şəhriyarı xatırlayırlar. Sadalayır ki, Fərhad İbrahim, Səhənd kimi güclü ədiblər var. Sosial şəbəkələrdən istifadə edən Zurufçu deyir ki, tez-tez güney azərbaycanlı gənc yazarlardan məktublar alır, şeirlərini oxuyur. O, həmin istedadlı gənclərin də Azərbaycanda geniş auditoriyaya tanınmasını arzuladığını bildirdi.

Ailə üzvlərindən söz salan Yaqub Zurufçu övladlarının hələ də xaricdə yaşadıqlarını xatırlatdı:

"Mən ailəmlə yaşamaq üçün Azərbaycana gəldim. Amma təəssüflər ki, nə oğlum, nə qızım qala bilmədi burada, bir az çətinlik çəkdilər. 2 il əvvəl yenə qızım gəldi, burada ona gözəl şərait yaratdıq, işə düzəldi. Amma təəssüf, yenə qala bilmədiyini söylədi. Onlar Amerikada dünyaya gəliblər və oranın mühitinə alışıblar. Ona görə də burada yaşaya bilmədilər. Amma bir məqamı qeyd edim ki, Azərbaycanda yaşamasalar da, dili çox gözəl bilirlər, hətta bəzən məndən də yaxşı danışırlar. Eyni zamanda musiqini dərindən anlayır və sevirlər".

Sonda planlarından söz salan həmsöhbətim qeyd etdi ki, bu ilin oktyabrında Muğam Mərkəzində geniş konsert proqramı ilə çıxış edəcək. Yeni mahnılarını konsert repertuarına daxil edən sənətçi tamaşaçılara maraqlı gecə vəd edir. Bundan başqa, onun xaricdə yeni diski işıq üzü görəcək. Xatırlatdı ki, bu, onun xaricdə çıxaracağı 34-cü diski olacaq. Bunların əksəriyyətini hazırlamaqda şirkətlər özü maraq göstərib. Azərbaycanda isə onun cəmi 3 diski işıq üzü görüb.

"Bir də onu qeyd edim ki, o tayda yaşayan gənc ədiblərin sözlərinə silsilə mahnılar bəstələmək niyyətindəyəm. Bundan başqa, Vahid Əzizin sözlərinə yeni "Arkadaş" adlı mahnı bəstələmişəm. Bu il Şəhriyarın 105 yaşı tamam olur. Qərara gəlmişəm ki, onun sözlərindən ibarət mahnılar bəstələyib disk şəklində hazırlayım" - bu, Yaqub Zurufçunun başqa bir arzusudur.

Xatun

Ayna.- 2011.- 24 sentyabr.- S.20.