Ötən il "Microsoft-Azərbaycan" üçün uğurlarla yadda qaldı

Microsoft korporasiyası ötən ili müvəffəqiyyətlə başa vurub. Şirkətdən verilən xəbərə görə, 2010-cu ildə Microsoft ölkəmizdə yeni Windows 7 əməliyyat sistemini və azərbaycandilli versiyasını təqdim etdi. Windows 7-nin lokallaşdırılması nəticəsində Microsoft məhsullarında istifadə olunan əmr və sözlərdən ibarət Azərbaycan lüğəti (Glossary) yaradılmış, interfeys Azərbaycan dilinə lokallaşdırılmışdır (Language Interface Pack).

2010-cu ildə "Microsoft-Azərbaycan" şirkəti Təhsil Nazirliyi, Rabitə və İnformasiya Texnologiyaları Nazirliyi və HP şirkətilə birlikdə yerli tərəfdaşların - Bestcomp və ULTRA - dəstəyilə əhalinin müxtəlif təbəqələrinin yüksək keyfiyyətli kompüter və lisenziyalı proqramlarla təmin olunmasına istiqamətlənən "Xalq kompüteri" layihəsinin yeni mərhələsini başladı. Yeni mərhələdə güzəştli şərtlərlə kompüter almaq imkanından məktəb müəllimləri ilə yanaşı tələbə, şagird və ali məktəb müəllimləri də bəhrələnə biləcəklər.

2010-cu ildə Microsoft Azərbaycanın təhsil sistemi çərçivəsində informasiya-kommunikasiya texnologiyalarının tətbiqi sahəsindəki fəaliyyətini davam etdirdi. "Microsoft-Azərbaycan" şirkəti "2008-2012-ci illərdə Təhsil Sisteminin İnformasiyalaşdırılması üzrə Dövlət Proqramı"nın həyata keçirilməsində Təhsil Nazirliyinin fəal tərəfdaşlarından biridir. "Microsoft-Azərbaycan" və Təhsil Nazirliyinin tərəfdaşlığı bir neçə istiqamətlərdə inkişaf edir: orta təhsildə innovasiyaların tətbiqi, təhsil prosesində İT-alətlərinin istifadəsi üçün müəllimlərin peşəkar imkanlarının genişləndirilməsi və İnternetdə uşaqların təhlükəsizliyinin təmin edilməsi.

Bundan əlavə, Microsoft korporasiyasının Təhsil Nazirliyinə güzəştli şərtlərlə təqdim etdiyi lisenziyalı proqram təminatı Azərbaycanın bütün məktəblərini leqal proqram təminatlarının ən son versiyaları ilə təmin etməyə imkan verdi.

Səmərəli əməkdaşlıq çərçivəsində Microsoft şirkəti Azərbaycanda yerli innovativ müəllimlər müsabiqəsini keçirir. Müsabiqənin qalibləri ölkəni Avropa və dünya forumlarında təmsil edirlər. Ötən il İlhamə Əkbərova ilk dəfə olaraq Azərbaycanı CAR-da keçirilmiş Ümumdünya İnnovativ Müəllimlər Forumunda təmsil etdi.

Ümumiyyətlə, Microsoft korporasiyası ölkədə informasiya-kommunikasiya texnologiyalarının inkişaf səviyyəsini yüksək qiymətləndirir və bundan sonra da Azərbaycanla əməkdaşlığa davam edəcək.

Azərbaycan müəllimi.- 2011.- 14 yanvar.- S.13.