"İstanbulda royadayam"

Fərəcoğlunun bu şəhərdə 20-ci sərgisi açılıb

Azərbaycanlı avanqardist rəssam Əbülfəz Fərəcoğlu Bosfor üzərindəki bu gözəl şəhərdə sanki bir roya içərisindədir. Yaşamaq istədiyi, xəyal etdiyi həyatı burada tapıb. Heyranı olduğu və bizim də heyran olduğumuz bu şəhəri tablolara köçürür. 14 ildir bu şəhərdə yaşayır və buradan başqa bir yerə getmək fikrində də deyil - özü belə deyib.

İstanbulun Levent səmtindəki Alta Sənət Qalereyasında onun bu yanvar ayında açılmış fərdi rəsm sərgisi fevralın 4-dək fasiləsiz davam edəcək. Növbəti sərgisində rəssamın son illərdə yaratdığı yağlı boya tabloları nümayiş etdirilir. İstanbul mediası və sənətsevərlərin sərgiyə böyük maraq göstərdiyi qeyd olunur.

Əbülfəz Fərəcoğlu bildirib ki, bu onun qardaş ölkədə açılan 20-ci fərdi sərgisidir. Bunun özü özəl bədii zövqə malik, böyük sənət ənənəsi olan İstanbulda uğurlu rəssam sayıldığının bir göstəricisidir. Fərəcoğlunun fırçasından çıxmış tablolar bu gün Almaniya, Ukrayna, ABŞ, Yaponiya, İran, Bolqarıstan və daha neçə-neçə ölkələrdə şəxsi kolleksiyaları bəzəyir. Rəssam deyir:

"İstanbulda 14 illik yaradıcılığımın hər dönəminə aid tabloları burada nümayiş etdirirəm. Türkiyənin sənət bazarında mövqe əldə edə bilməyin bir sıra çətinlikləri var. Burda bəzən kənardan gələn rəssamlara qarşı süni əngəllər də yaradılır. Ancaq buna baxmayaraq, mən həm yaradıcılığıma, həm də pedaqoji fəaliyyətimə davam edirəm".

Naxçıvanda 1956-cı ildə doğulan Əbülfəz Fərəcoğlu Ə.Əzimzadə adına Bakı Rəssamlıq Məktəbinin məzunudur. İncəsənət İnstitutunu bitirib. Üç il Naxçıvanda Rəssamlıq Məktəbində dərs deyib. Ukraynanın Lvov şəhərində üç aylıq rəsm simpoziumunda iştirak edib və birinciliyi qazanıb. Rusiya şəhərlərində qarışıq sərgilərdə iştirak edib və sonra üzünü İstanbula tutub. İstanbulun Yeşilköy səmtində "Ekim" Sənət Məktəbini yaradıb, həvəskarlara və tələbələrə rəsm sənətinin sirlərini öyrətməklə və öz şəxsi yaradıcılığı ilə məşğuldur. Belə görünür, olduqca məhsuldar çalışır.

Sənətşünaslara görə, Əbülfəz Fərəcoğlu rəsmlərinə ümumilikdə fantastik bir yanaşma hakimdir. Sosializm realizmini qəbul etmir, impressionistləri də təqib etmir. Azərbaycan avanqardizminin öncülləri sayılan Cavad Mircavadov, Toğrul Nərimanbəyov və Rasim Babayev ruhən ona daha yaxındırlar. Bu üç rəssamın istanbullu Nahit Kabakçının şəxsi kolleksiyasında yer alan tablolarını izləmiş yerli sənətşünaslar belə bir fikrə gəliblər. Onların verdiyi qiymətə görə, Fərəcoğlunun tabloları rəngi və cizgiləri, seçilmiş kompozisiyaları ilə fərqlidir, bu rəssam daim bir yenilik axtarışındadır. Klassik formaları dəyişdirməsi, ənənələ qarşı bir üslub izləməsi bəzən sənətşünaslar tərəfindən tənqid olunsa da, onun öz yanaşma tərzi var. Onun tablolarında impressionizmdən başlayaraq modern sənətə qədər bütün cərəyanlara xas üslubları - kubizm, sürrealizm, fovizm və s. görənlər var.

Fəqət bircə şey aşkardır - onun üçün İstanbulun hər bucağı bir ilham qaynağı, sonsuz bir zənginlikdir. "Burada bir royadayam" deyir. Və əlavə edir: "İnsan başqa harada yaşaya bilər ki?"

İ.BALIOĞLU

Ayna.- 2011.- 22 yanvar.- S.19.