Şahin Növrəsli ilə caz söhbəti

Vaqif Mustafazadə ilə müqayisəni isə özünə fəxr bilir

Şahin Növrəslini dünya cazının yeni ulduzlarından biri adlandırırlar... Belə deyirlər ki, qısa müddət ərzində caz musiqisinin məğzini və onun çoxobrazlı imkanlarını o qədər dərindən mənimsəmiş ki, özünün Amerika və Avropada festivallarda çıxışı ilə ən mahir biliciləri və professionalları belə heyrətə salmışdır.

Məsələn, Rusiya paytaxtında çıxışı ərəfəsində Moskva cazmenləri onu bu kimi təmtəraqlı epitetlərlə qiymətləndiriblər. "Dahi həmvətəni Vaqif Mustafazadənin davamçısı", "Dünya caz səhnəsinin yeni ulduzu", "bu gün üçün Azərbaycan cazının vizit kartı"... Belə bir fikir yürüdülür ki, ona Azərbaycan muğam melodiyaları ilə ənənəvi caz ritmlərinin əlverişli sintezi müyəssər olub.

Hətta deyirlər ki, öz musiqisində iki böyük mədəniyyəti - Qərb və Şərq mədəniyyətini birləşdirə bilib. Ekzotik melodiyaların sakit-sakit fırlanaraq toxunuşu, iti harmoniya, şıltaq Şərq ritmləri və elə oradaca döngədə super sürətli qaynar amerikan cazı - bu, Şahin Növrəslinin musiqisidir.

Bioqrafiyasından bəllidir ki, Şahin Növrəsli 1977-ci ildə Bakıda doğulub. Musiqi ilə çox erkən yaşlarından məşğul olmağa başlayıb və hələ 11 yaşında ikən Azərbaycan Dövlət Filarmoniyasında sinfonik orkestrin solisti kimi çıxış edib. Müəllimlərin israrına görə öz təhsilini Bülbül adına orta ixtisas musiqi məktəbində davam etdirmiş və oxuduğu illərdə klassik musiqi ilə dərindən və ciddi məşğul olmuşdur. 18 yaşında Raxmaninovun İkinci Konserti ilə çıxış edib və münsiflər heyətinin ən yüksək qiymətinə layiq görülüb. Bakı Musiqi Akademiyasında oxuyarkən musiqiçi özünü tamamilə klassik və caz musiqisinə həsr edib. Elə o vaxtdan daimi qastrollar, turlar, beynəlxalq festivallar onun həyatının ayrılmaz hissəsi olub.

Səfərlərdən və konsertlərdən sonra nadir istirahət dəqiqələrində Şahin yeni layihələr üzərində işləyir. Caz triosu ilə xalq çalğı alətlərinin sintezi nəticəsində Neytn Pek, Aleksandr Masin, Nurlan və Arslan Növrəslilərin iştirakı ilə yaranan "Əbədi yol" adlı layihə belə ərsəyə gəlib. Daha bir proyekt isə caz solo proyekt və klassik solo proyekt "Slajamu"dur (proqram Mosart və Bax kimi klassik bəstəkarların əsərləri əsasında tərtib olunub).

Şahin Keni Viler, Uday Mazumdar, Alison Miler, Neytn Pek, Aleks Pek, Mat Zebroski, Cef Lederer, Con Vikan, Saşa Maşin və başqa tanınmış musiqiçilərlə çıxışlar edib və albomlar yazdırıb.

İndi Türkiyə, Fransa, Rusiya və Azərbaycanda, konsertlərlə çıxış etdiyi universitetlər və məktəblərdə ustad dərsləri verir. Son işlərindən söz açan cazmen bunları danışır:

- Bildiyiniz kimi, bir müddət əvvəl Avropa turnesindən qayıtmışam. Sonuncu konsert Londonda idi. Bizi çox gözəl qarşıladılar. Planda isə ABŞ-ın əsas ştatlarında, Nyu-York, Las-Veqas, Los-Anceles və s. şəhərlərdə 20 konsert proqramı ilə çıxış etmək var. Bu, ayyarımlıq turnedir. Proqrama gəlincə, yenə də öz əsərlərimi ifa edəcək və konsertlərdə bir xanəndə kimi iştirak edəcəyəm.

- Bəs muğamda, cazda ustadlarınız kimlər olub?

- Mən hər şeyi əsasən lent yazılarından öyrənmişəm. Muğamla Əbülfət Dərya ilə məşğul olmuşam. Və əlbəttə, Vaqif Mustafazadənin cazda qoyduğu muğam ocağından bəhrələnirəm və mən də bir yenilik yaratmağa can atıram. Vaqif Mustafazadənin elə əsərlərini ifa etmişəm, hansıların ki, heç notu olmayıb və ondan başqa bu əsərləri heç kəs ifa etməyib.

- Bəs sənətçilər sizə "Vaqif Mustafazadəni yamsılayırsan" iradını tutublar?

- Mən yalnız fəxr edə bilərəm, əgər məni belə bir sənətkarla müqayisə etsələr.

- Siz dörd qardaş, dördünüz də musiqiçi, verilişlərin birində qeyd etdiniz ki, gündə 14 saat royal arxasında məşq etdiyiniz hallar olub. Sizcə, sənətdə sizə bu qədər çalışqanlıq, yoxsa istedadınız kömək etdi?

- Sonuncu dəfə mən 14 saat hardasa bir 10 il əvvəl məşğul olmuşam, son illərdə isə mənə 2-3 saat məşq etmək kifayət edir. Çünki nə əldə edirsən, elə məktəb illərində əldə edirsən. Düşünürəm ki, hər bir musiqiçidə istedad 10% olur, qalanı zəhmətlə qazanılır.

- Sizə hansısa bir konsertdə, məclisdə iştirak etmək dəvəti gələndə onu o dəqiqə qəbul edirsiz, yoxsa seçim edirsiniz?

- Dəvətləri, əlbəttə, qəbul edirəm, böyük layihələrdə iştirak edirəm. Sadəcə, son zamanlar çıxışlarım, konsertlərim daha çox xaricdə olduğu üçün Bakıda çıxış etməyi çatdırmırdım. Artıq buna da nail olmuşam.

- Artıq yetərincə təcrübəniz var, bəs tələbələriniz necə, varmı?

- Hələ onun üçün hövsələm yoxdur, amma bəlkə biz az gec tələbələrim də oldu.

- Səhv etmirəmsə, baxmayaraq ki, oğlunuz balacadır, musiqiyə heç meyli var?

- Bəli, iki aylığından musiqiyə diqqət ayırır. Yoldaşım Natavan Növrəsli də vokalçıdır. Görünür, musiqiçi ailəsində böyümək onu indidən həvəsləndirib...

XATUN

Ayna.- 2012.- 4 avqust.- S.21.