Kino işçiləri öz bayramlarını qeyd edir

Rüstəm İbrahimbəyov birinci Respublikadan tarixi film çəkməyə hazırlaşır

Avqustun 2-də Milli Kino Günü qeyd olundu. Ölkəmizdə kinonun nə az, nə çox, 114 yaşı var. Bu münasibətlə Kinematoqrafçılar İttifaqında tədbir keçirildi, Rüstəm İbrahimbəyov kino işçilərini təbrik etdi. Kinorejissorlar Fikrət Əliyev, Asif Rüstəmov və xalq artisti Fəxrəddin Manafov təltif olundular. Elə bu gün münasibəti ilə də Azərbaycan Kinematoqrafçılar İttifaqının sədri, dramaturq, ssenarist, rejissor Rüstəm İbrahimbəyovdan söz dinləmək qərarına gəldik. Xüsusilə də son vaxtlar rəhbəri olduğu AKİ ətrafında yaşananları nəzərə alsaq, yəqin ki, müsahibə yerinə düşərdi.

Rüstəm bəy bizə öz gələcək planları barədə danışdı və böyük layihələrdən söz açdı. Rejissorun sözlərinə görə, Azərbaycan Cümhuriyyəti ilə bağlı tarixi bir film çəkməyi planlaşdırır. "Bu filmdə birinci Respublikanın taleyi ilə bağlı müəyyən nyüanslar açıqlanacaq", - deyə İbrahimbəyov bildirdi. Rejissorun sözlərinə görə, artıq bir neçə ildir bu filmi çəkmək üçün məlumatlar yığırlar. Deyir:

"Bu film geniş panoramada çəkiləcək. Bunun üçün külli miqdarda vəsaitə ehtiyac duyulur. Biz filmin çəkilişləri ilə bağlı maddi yardım üçün Azərbaycan Prezidentinə və Mədəniyyət və Turizm Nazirliyinə məktubla müraciət etdik. Lakin bizim məktubumuza cavab gəlmədiyi üçün biz filmi öz şəxsi sərmayəmiz hesabına çəkməyə hazırlaşırıq. Eyni zamanda Azərbaycanın tarixi ilə bağlı yeni bir serial çəkməyi də planlaşdırırıq".

Rüstəm İbrahimbəyov yenicə yazdığı "Ubejişe"("Sığınacaq") adlı fəlsəfi pyesindən danışaraq söylədi ki, bu əsərdəki hadisələr hazırda mövcud olan yeraltı bunkerlərdən, sığınacaqlardan bəhs edir:

"Bu pyes Bakıda tamaşaya qoyulacaq. Onu da bildirim ki, digər əsərlərim bir neçə xarici ölkədə, o cümlədən Rusiyanın mədəniyyət paytaxtı sayılan Sankt-Peterburqda artıq səhnələşdirilib".

O, Milli Kino Günü ilə bağlı Kino Evində keçiriləcək mərasimdə AKİ-nin yenicə təsis etdiyi mükafatın üç nominanta veriləcəyini söylədi:

"Qonaqlarımız isə xarici ölkələrin səfirləri, cəmiyyətdə öz mövqeyi olan bir sira ictimai-siyasi xadimlər olacaq.

Qarşıdakı illərdə AKİ-nin Azərbaycanda festivalı olacağı gözlənilir".

Rüstəm İbrahimbəyov öz vəsaiti ilə yaratdığı Kino Məktəbinin hazırda fəaliyyətini dayandırdığını, amma yaxın vaxtlarda yenidən tələbə qəbul edəcəyini söylədi. Rejissor dedi:

"Artıq on beş nəfər diplomlarını alıb. Biz cavanlara həmişə dəstək oluruq. Əgər gənclərdən kimsə bizim təşkilata yeni bir əsər, ssenari, povest gətirirsə, biz onları geri çevirmirik. Prespektivli gənclərə bizim ehtiyacımız var".

Xatırladaq ki, Rüstəm İbrahimbəyovun rəhbərlik etdiyi Azərbaycan Kinematoqrafçılar İttifaqı 1956-cı ildə yaranıb və təşkilatın hazırda 320-yə yaxın üzvü var. Rejissor eyni zamanda AKİ ətrafında gəzən söz-söhbətlərə aydınlıq gətirərək söylədi ki, təşkilat heç kimi məcburi saxlamır. Deyir:

"Mənim Azərbaycan Kinematoqrafçılar İttifaqını tərk edib yenicə yaranan Azərbaycan Respublikası Kinematoqrafçılar İttifaqına üzv olmaq istəyənlərin heç birinə qarşı etirazım yoxdur".

Lakin İbrahimbəyov bəzi kino xadimlərindən incidiyini də bildirdi:

"Cəmil Quliyev AKİ-ni tərk edib yeni ittifaqa üzv olduqdan sonra bizim haqqımızda yalan məlumatlar yayır. Artıq 10 ildən çoxdur ki, bizimlə işləyən bəzi katiblər də bizdən üzvlükdən çıxdıqdan sonra AKİ haqqında yersiz ifadələr işlədiblər".

Rüstəm İbrahimbəyovun sözlərinə görə, yeni yaranmış Azərbaycan Respublikası Kinematoqrafçılar İttifaqı hökumətin təklifi ilə yaranıb. "Buna baxmayaraq, bu yaxınlarda 16 nəfər bizim AKİ-yə üzv olmaq üçün müraciət edib və qəbul olunub. "Qeyd edim ki, onların arasında Ramiz Aslanov, Vaqif Səmədoğlu, Ziya Şıxlinski kimi məşhur incəsənət xadimləri də var".

Xatırladaq ki, bir müddət öncə Azərbaycan Kinematoqrafçılar İttifaqı ətrafında qalmaqal yaranmışdı. Bəzi informasiya agentliklərinin yaydığı məlumata görə, yeni təşkilata üzv olmaq istəyən bir qrup artist köhnə ittfaqı tərk etmək qərarına gəlib və buna görə AKİ tərəfindən təzyiqlərlə üzləşiblər.

Xəbəri dəqiqləşdirmək üçün AKİ-ni tərk edən artistlərdən bəziləri ilə əlaqə saxlamaq qərarına gəldik.

Aktyor Azad Şükürovun sözlərinə görə, verdiyi qərar özünə məxsusdur. "Mənim yalnız adım Azad deyil, mən özüm də azad insanam və qərarlarımı özüm verirəm. Heç kim mənim qərarlarıma nə qarışa, nə də təsir edə bilər. Ancaq təzyiqlərin olması barədə gedən məlumatlar yalandır. AKİ-də heç kim məni nə hədələyir, nə də təzyiq göstərməyə cəhd edir. Mənim qərarım hörmət və anlayışla qarşılanıb", - deyə aktyor bildirdi.

Azərbaycan Kinematoqrafçılar İttifaqının mətbuat katibi Əsəd Əsədov da bu məsələyə öz münasibətini bildirərək söylədi ki, ittifaqın üzvlüyündən çıxmaq istəyən heç bir artist təzyiqlə üzləşməyib.

"Çıxan hər bir artist yalnız öz istəyi ilə bizi tərk etdi. Bu da o deməkdir ki, biz onların nə getməsi, nə də qalması üçün bir tədbir görmüşük, belə bir fikrimiz də yoxdur", - deyə Ə. Əsədov bildirdi.

Z.Nuri

Ayna.- 2012.- 4 avqust.- S.20.