53 idmançı, 10 medal və 30-cu yer

XXX London Yay Olimpiya Oyunları hələ ötən həftə başa çatsa da, yarışlarla bağlı məlumatlar, əldə olunan nəticələr idman mətbuatının gündəmindən düşmür.

London Oyunları Azərbaycan yığması üçün tarixi qələbə ilə yekunlaşdı. Belə ki, müstəqillik qazandıqdan sonra 5-ci Olimpiadada iştirak edən ölkəmiz iştirakçılarla yanaşı, medal sayını da artırdı. Yığmamız bu dəfə 53 idmançı ilə iştirak etdiyi Olimpiya oyunlarından Vətənə 10 medalla qayıtdı ki, bunların da 2-si qızıl, 2-si gümüş, 6-sı bürüncdür. Buna qədər ən yaxşı göstərici 2008-ci ildə Pekin Olimpiadasında olmuşdu - 7 medal. Qızıl medalın sayında Sidneydəki rekordun təkrarlanması da diqqət çəkir.

Sərbəst üsulla güləşən idmançılarımızdan Toğrul Əsgərov və Şərif Şərifov bütün rəqiblərini məğlub edərək, fəxri kürsünün ən yüksək pilləsinə qalxdılar. Bununla da onlar sərbəst güləş yarışlarının keçirildiyi "Exsel Arena"da 1 saata 2 dəfə Azərbaycanın himnini səsləndirdilər. Rövşən Bayramov (yunan-Roma güləşi) və Mariya Stadnik (qadın güləşi) komandamızın medal kolleksiyasına 2 gümüş medal əlavə etdilər. Yığmamızın üzvlərindən - Məhəmmədrəsul Məcidov və Teymur Məmmədov (hər ikisi boks), Valentin Xristov (ağırlıqqaldırma), Xetaq Qazyumov (sərbəst güləş), Emin Əhmədov (yunan-Roma güləşi) və Yuliya Ratkeviç (qadın güləşi) çıxışını bürünc medalla başa vurublar.

2012-ci il London Yay Olimpiya Oyunlarında komandaların medal sıralamasında da yekun cədvəl müəyyənləşib. ABŞ yığması (cəmi 104 medal - 46 qızıl, 46 gümüş və 29 bürünc) sona qədər vahid liderliyini davam etdirib və Londonda ən güclü olub. Onların ən yaxın izləyicisi Çin (87 medal - 38 qızıl, 27 gümüş və 22 bürünc) ikinci, Olimpiada sahibi Böyük Britaniya (64 medal - 29 qızıl, 17 gümüş və 19 bürünc) isə üçüncü olub. Azərbaycan yığmasına gəlincə, ölkəmiz bu Olimpiadanı 30-cu yerdə bitirib. Sərbəst güləş yığmamız London Olimpiadasının ən yaxşısı oldu

Sərbəst güləş üzrə Azərbaycan milli komandası London Yay Olimpiya Oyunlarının ən yaxşısı olub. Hesabına 2 qızıl və 1 bürünc medal yazan yığmamız bu idman növündə dünyanın bütün ölkələrini qabaqlayaraq, ABŞ-la birlikdə zirvədə qərarlaşıb. Sərbəst güləşdə sahibini tapan 7 dəst medala isə ümumilikdə 14 ölkə sahib çıxıb. Onlardan yalnız 5-i çempionluq sevinci yaşayıb. Ən gənc Olimpiya çempionu Azərbaycanlı Olimpiya çempionu Toğrul Əsgərov yeni rekordçu olub. London Olimpiadasının qızıl medalını 20 yaşı tamam olmamış qazanan sərbəst güləşçimiz bununla da ən gənc Olimpiya çempionumuz olub. Belə ki, o, 1992-ci il sentyabrın 17-də Gəncədə anadan olub və 20 illik yubileyinə 37 gün qalmış karyerasında ən böyük uğuruna imza atmaqla, özünə ən yaxşı hədiyyə edib.

Toğrul bunadək son Olimpiya çempionumuz olan cüdoçu, London-2012-də bayraqdarımız olan Elnur Məmmədlinin rekordunu təzələyib. 1988-ci il iyunun 29-da doğulmuş olan Elnur 2008-ci ildə Pekində qızıl medal qazananda 20 yaşı tamam olmuşdu. 111 rekord London Olimpiadasında 33 dünya, 78 olimpiya rekordu təzələnib.

Ən çox - 31 rekord ağırlıqqaldırma növündə qeydə alınıb. Bu göstəricidə sonrakı yerləri üzgüçülük (30), velosiped idmanı (18), atletika (15), atıcılıq (10), oxatma (5) və müasir çoxnövçülük (2) tutub.

Ayna.- 2012.- 18 avqust.- S.22.