GAMAC sədri Qulamrza Səbri Təbrizi:

"Bizim bir millət olaraq buna haqqımız var!"

Güney Azərbaycanın müstəqilliyi uğrunda

mücadilənin yeni mərhələsi başlanır

Yanvarın 7-8-də Almaniyanın Köln şəhərinin "Youth Hostel" (Gənclər Evi) binasında Güney Azərbaycan Milli Azadlıq Cəbhəsinin (GAMAC) 2-ci qurultayı keçirildi. Qurultayda Amerika və Avropanın əksər dövlətlərindən Güney Azərbaycanın azadlığı uğrunda mübarizə aparan təşkilatları təmsil edən 70 təşkilatdan və toplam 200 nəfərlik nümayəndə qatılmışdı. Dr. Qulamrza Səbri Təbrizi, Əhməd Obalı, Maşallah Rəzmi, Behruz Həqqi, Sadiq İsabəyli, dr. Əyyub Qaneyi, Nadir Tarək, Əhməd Əlizadə, Fəraməz Quluzadə, dr. Araz Süleymani, Araz Muğanlı, Səttar İslami, Əli Məhəmmədidən ibarət 13 nəfərlik GAMAC İdarə Heyəti seçildi.

İndi Güney Azərbaycanla bağlı çoxlu sayda təşkilatlar yaranmışdır. GAMAC həmin qurumlardan nə ilə fərqlənir? Biz GAMAC sədri dr. Qulamrza Səbri Təbrizidən qurultay təəssüratlarını qəzetimizlə bölüşməsini istədik. GAMAC sədri dedi:

- Güney Azərbaycan Milli Azadlıq Cəbhəsi öz sıralarında Güney Azərbaycan uğrunda mübarizə aparan bütün təşkilatları və fərdləri birləşdirmək üçün yaranmışdır. 2007-ci ildən indiyə kimi bizim fəaliyyətlərimiz Güney Azərbaycanda, eləcə də bütün Avropa dövlətlərində çox böyük hərarətlə qarşılanmışdır. Məhz GAMAC-ın təşəbbüsləri sayəsində tarixdə ilk dəfə olaraq, Güney Azərbaycanla bağlı problemlər BMT-nin diqqət mərkəzində yer almağa başlamışdır. Biz hər hansı bir iqrçiliyə qarşıyıq.

GAMAC bir təşkilat olaraq, İran adlı ərazidə Loristan, Bəlucistan, Xuzistan, Xorasan uğrunda başlanılan və digər xalqların milli hərəkatlarını da fəal şəkildə müdafiə edir. 1925-ci ildən sonra paniranizm və panfarsizm siyasəti bütün xalqların varlığını inkar üzərində qurulmuşdur. Bu proses 1978-ci il 23 Bəhmən İnqilabından sonra daha da sərt xarakter almışdır. Xalqların öz ana dilində təhsil almaq, milli və mədəni təsisatlarını qurmaq hüquqları din pərdəsi altında tamamilə yasaq edilmişdir.

Bu gün milli hüquqlarını tələb edən, ana dilində təhsil almaq istəyənə Tehran rejimi ən azından 8 il həbs cəzası verir. Təbrizdəki həbsxanalarda 200 nəfərdən çox soydaşımız elə bu səbəbdən işgəncələr altında saxlanır. Urmu, Sulduz, Xoy, Zunuz, Soyuqbulaq, Savə, Həmədan, Zəngan, Ərdəbil, Meşkin, Əhər, Mərənd, Qəzvin, Məşhəd, Sayınqala, Culfa, Kərəc, Ələmdar və digər şəhərlərimizdə yüzlərcə milli fəalımız məhbəslərə atılmışlar. Bu insanlar heç zaman nə islam dini, nə də digər xalqların əleyhində olmamışlar, heç silahlı üsyanlara çağırışlara da qatılmamışlar. Onların bircə məqsədi öz milli hüquqlarını tələb etmələri olmuşdur.

GAMAC bir təşkilat olaraq, məhz bu milli iradəni müdafiə edir. Ötən müddət ərzində bizim çoxsaylı tədbirlərimiz, beynəlxalq təşkilatlarla səmərəli görüşlərimizin nəticəsində Güney Azərbaycan uğrunda mübarizə aparan digər qurumların da maraqlarına səbəb olmuşdur. Bizim təşkilatda lider anlayışı yoxdur. Bizim fikrimizcə, Güney Azərbaycanın bir lideri var, o da xalqın özüdür. 21 Azər Hərəkatı, onun bir zamanlar qurmuş olduğu Milli Hökumətin prinsiplərini biz xalqımızın tarixində mövcud olan ən layiqli bir örnək olaraq qəbul edirik. Əksər milli təşkilatlarımız da 21 Azər Hərəkatını və onun prinsiplərini müdafiə edirlər.

- Orta Şərq dövlətlərində baş vermiş son bir ilin hadisələri Güney Azərbaycandakı proseslərə təkan verə bilərmi?

- Biz xalqımızın öz coğrafi sərhədləri daxilində milli hüquqlarımızı tələb etməklə yanaşı, həm də Güney Azərbaycanın milli istiqlalı, özünün müstəqil dövlətini qurması uğrunda mübarizə aparırıq. Güney Azərbaycan torpaqları neft, qaz, uran, filiz, mis, molibden, sink və digər yataqları ilə zəngin olan bir ərazidir. İranın buğda, dənli bitki, bostan və meyvə ehtiyatlarının 80 faizi Güney Azərbaycanın hesabına başa gəlir. Ancaq 1925-ci ildən Türk Qacar xanədanlığını devirən və hakimiyyəti ələ alan pəhləvilər rejimi antitürk siyasəti aparan beynəlxalq qüvvələrin dəstəyilə Güney Azərbaycanın milli varlığını inkar etməklə yanaşı, bizim təbii sərvətlərimizi də talan etməklə, farsların çoxluqda yaşadığı Şiraz, İsfahan, Mazandaran, Yəzd və digər şəhərlərin çiçəklənməsinə, oralarda sənaye və iqtisadiyyatın güclənməsinə yönəltmişlər.

İranda farsların yaşadıqları ərazilərdə hər min nəfərdən 300 nəfəri yüksək ixtisaslı mütəxəssislər olmaqla yanaşı, həm də böyük məbləğdə maaşla təmin olunmuşlar. Bunun üçün onlara hər şərait yaradılmışdır. Belə imkanlar isə Güney Azərbaycanda yoxdur.

Farsların çoxluqda yaşadıqları ərazilərdə əhalinin yoxsul təbəqəsi anlayışı belə yoxdur. Burada yoxsul təbəqəyə malik insanlar ölkənin digər bölgələrindən ağır sosial-iqtisadi məhrumiyyətlərə və bir tikə çörəyə görə gələnlərdir. Bu estafet indi də mollakratiya rejimi tərəfindən 34 ildir davam etdirilir. Həm pəhləvilər, həm də molla hakimiyyətinin əsas məqsədi fars olmayan bütün toplumların assimilyasiya olunmasıdır. Onların yürütdüyü siyasətin mahiyyəti budur. Belə bir milli zülm və istibdadın bir sonu olmalıdır.

GAMAC bir milli təşkilat olaraq, bütün bunları dərindən təhlil edir və addımlarını atır. Biz Güneylə bağlı sosial, ictimai, iqtisadi və siyasi prosesləri təhlil edərək hərəkət edirik. Faktik olaraq, Güneydə baş verən proseslərdə milli fəallarımızı müdafiə etməklə, insan haqları uğrunda mübarizənin inkişafına dəstək olmaqla Milli Hərəkatımızın genişlənməsinə çalışırıq.

- GAMAC-ın qurultayında hansı qərarlar qəbul olundu?

- Bizim son qurultayımızda həbsdə olan milli fəallarımızın və siyasi məhbusların hüquqlarının beynəlxalq səviyyədə müdafiə olunması, Urmu gölünün qurudulması yönündə baş vermiş qlobal ekoloji böhranın dərhal həll edilməsi və Güney Azərbaycanda baş verən siyasi proseslərlə bağlı qərarlar qəbul edilmişdir. İndi biz bu qərarlarımızın gerçəkləşməsi üçün beynəlxalq səviyyədə hərəkətə keçməyi planlaşdırmışıq.

Bu gün Azərbaycan türklərinin milli qiyamından qorxan İran rejimi bu etirazları əngəlləmək və Milli Hərəkatın yüksəlişinin qarşısını almaq üçün hər növ tədbirləri tətbiq edir. Bölgənin bütün şəhərlərində elan olunmamış fövqəladə hərbi vəziyyət hökm sürməkdədir. Bütün tədbirlər - dinc aksiyalar, toplantılar, hətta qonaqlıqlar belə yasaqlanmış, siyasi-milli təşkilatların fəaliyyətləri yasaq olunmuş, sivil və mədəni təşkilatların fəaliyyəti qeyri-qanuni elan edilmişdir. Güney Azərbaycanın milli, müstəqil qəzet və dərgilərinin nəşri durdurulmuş, onların baş yazarları tutuqlanmış və ya sürgün edilmişlər.

İctimai və sosial şəbəkələrdə insanların əlaqələri nəzarət altında saxlanılmaqla internet üzərinə də senzura tətbiq olunmuş və peyk antenalarla yayımlanan telekanallardan yararlanmaq suç sayılır. Bütün bunlarla yanaşı, fars irqçi rejiminin təxribatçı siyasətinin nəticəsi kimi Güney Azərbaycanın ekoloji məkanı da beləcə məhv edilməkdədir. Güney Azərbaycanın əzəli sakinlərini öz torpaqlarından perikdirmək üçün Urmu gölünün məqsədyönlü olaraq qurudulması buna əyani sübutdur.

Güney Azərbaycanda əsaslı iqtisadi sərmayə yatırılmadığından ali və orta təhsilli gənclər ölkəni tərk etmək məcburiyyətində qalırlar.

GAMAC bütün siyasi məhbusların hüquqlarını müdafiə edir, onların ailələrinin yanında olduğunu bəyan edir və həbsdə olan bütün milli fəalların, o cümlədən Güney Azərbaycan Türk Millətinin milli haqlarının müdafiəçisi Səid Mətinpurun tezliklə qeydsiz-şərtsiz azadlığa buraxılmasını tələb edir. Biz bütün mütərəqqi təşkilatlardan, insan haqlarını müdafiə edən beynəlxalq qurumlardan və insansevər dünya şöhrətli insanlardan istəyirik ki, onlar Azərbaycan milli fəallarının tezliklə azadlığa buraxılmaları üçün öz səylərini artırsınlar və İran İslam Cümhuriyyətini insan haqlarını kobud surətdə pozduğu üçün məhkum etsinlər.

- Son aylarda beynəlxalq səviyyədə İran rejiminə qarşı sərt təpkilər göstərilir, bir sıra embarqolar qoyulmuşdur. GAMAC bu durumu necə qiymətləndirir?

- İran rejiminə qarşı dünyanın sülhsevər və demokratik güc mərkəzlərinin başlatmış olduğu təzyiqlər regionla bağlı acı gerçəyi əks etdirir. Hakim klerikal rejim özünü "məzlum xalqların müdafiəçisi" kimi təqdim etməyə çalışır. Bu necə tərəqqipərvər dövlət və rejimdir ki, öz daxilində türk, lor, gilək, türkmən, ərəb, kürd, bəluc və digər xalqların milli, sosial, iqtisadi, hüquqi azadlıqlarını 34 ildir boğmaqla məşğuldur? Din pərdəsi altında "paniranizm" və "panfarsizm" siyasəti yürüdür, bütün xalqların milli və mədəni varlığını inkar edir? Belə bir rejimin digər dövlətlərə və xalqlara örnək olması gülünc görünür.

İranda hakim olan rejim ölkə daxilində xalqlar həbsxanasını silah və ideoloji təlimlərin gücü ilə qorumağa ümid edir. Bütün bunlar azmış kimi, digər dövlətlərin daxili işlərinə müdaxilə etməklə, dünyaya meydan oxumaqla, regiondakı prosesləri daha da ağırlaşdırmaqdadır. Rejimin əsas məqsədi ölkədaxili problemləri bir kənara qoyaraq, cəmiyyətin diqqətini xarici faktorlara bağlamaqla vaxt qazanmaqdır. Tarixdə bütün diktator və totalitar rejimlər bu klassik avantüradan yararlanmaq istəmişlər. 1978-1988-ci illərdə baş vermiş İran-İraq savaşının tarixi buna örnək ola bilər. O dönəmdə inqilab yolu ilə hakimiyyətə gələn indiki mollakratlar milyonlarla insanı ölkədəki ağır iqtisadi, siyasi və sosial problemlərdən yayındırmaq üçün düz on il davam edən müharibə apardı. Bu cinayətkar rejim müharibəyə hətta 10-12 yaşlı uşaqları belə cəlb etmişdi.

İranın indiki rejimi Əfqanıstan, Pakistan, Azərbaycan, İraq, Suriya, Türkiyə, Fələstin, Bəhreyn, Küveyt, Livan, Tacikistan, Hindistan və digər dövlətlərdə radikal dini qruplar yaratmaqla onları maliyyələşdirməklə məşğuldur. Tehran rejimi 34 ildir bu kimi gizli qurumları dəstəkləməklə beynəlxalq səviyyədə terrorizmi dəstəkləyən bir rejim olduğunu çoxdan təsdiq etmişdir.

İndi dünya siyasətində qlobal baxışların əsas qayəsi bu rejimlərin tarix səhnəsindən silinməsini bir şərt olaraq görür. Misir, Tunis, Əlcəzair, Liviya, Suriya, Sudan, Yəmən və digər dövlətlərdə baş verən inqilablar sadəcə sosial xarakter daşımamışdır. İndi həmin ölkələrdə iqtidara gələn güclərin siyasi doktrinası demokratiya və sosial ədalət prinsipini özündə ehtiva edir. İran rejimi bu həqiqətləri dərk etsə də, onların geriyə yolu qalmamışdır.

- GAMAC-ın bir təşkilat olaraq nüfuzunun artması və fəaliyyətinin belə bir məqamda güclənməsi İran rejimini deyəsən narahat etməkdədir.

- Bəs necə?! Güney Azərbaycanın, onun paytaxtı Təbrizin inqilablar məskəni olmasını Tehranda çox yaxşı anlayırlar. Bir tərəfdən də İran adlanan ölkədəki siyasi rejim bütün sahələrdə ciddi böhranla üz-üzə qalmışdır. Bu böhranlar onu daxili və xarici siyasətində də çıxılmaz bir duruma salıb. Hakimiyyətdaxili çəkişmələr artıq hakimiyyət dairələrini zəif və cəmiyyət daxilində etibarsız duruma düşürüb. İstər içəridəki kütləvi etirazlar, istərsə də xaricdən ola biləcək hərbi müdaxilə qorxusu hakimiyyətdaxili bu çəkişmələri daha da artırıb.

Biz belə bir həssas məqamda qurultayımızı keçirməklə, bütün milli qüvvələrimizi səfərbər etməyi əsas strateji hədəf olaraq görürük. GAMAC-ın qəbul etdiyi nizamnamə və bəyanatların müddəaları Tehran rejimini qorxuya salmışdır. Çünki biz şəffaf şəkildə fəaliyyət göstəririk. Ona görə də sıralarımız genişlənməkdə, bizə dəstək verən ictimai təşkilatların, beynəlxalq birliyin gücü artmaqdadır. GAMAC-ın başlatdığı bu mübarizəni İranın digər xalqları da müdafiə edirlər. Çünki biz həmin xalqlara məxsus özgür haqlarını tanıyan ilk qərarımızı indidən elan etmişik.

GAMAC-ın bir təşkilat olaraq həm Güney Azərbaycanda, həm də dünya ictimaiyyəti tərəfindən dəstəklənməsi yönündə apardığımız mücadilənin durumu bizi qəne edir. Çünki Güney Azərbaycanda öncələr baş vermiş milli mübarizənin tarixi ənənələrinə köklənməklə biz xalqımızın dünyanın digər sülhsevər xalqları kimi müstəqil bir dövlət halında yaşamağını önəmli hesab edirik. Milli şairimiz ustad Şəhriyar bir zamanlar haqlı olaraq demişdi:

Ey İran qəsrini əlilə tikən,

İrandan həmişə bəlalar görən...

Güney Azərbaycan paniranizm və panfarsizm ideologiyasının buxovundan ancaq öz dövlət müstəqilliyinə nail olmaqla xilas ola bilər.

Ənvər Yusifoğlu

Ayna.- 2012.- 11 fevral.- S.6.