İki azərbaycanlı rəssama "Vera" mükafatı verildi

Onlar Moskvada beynəlxalq festivalda seyrçi rəğbətini qazanıblar

Azərbaycanlı rəssamlar Məryəm Ələkbərli və Rəşad Mehdiyev Moskvada beynəlxalq incəsənət festivalında "Vera" mükafatına layiq görülüblər. Onlar bu festivalda uğurla çıxış edərək münsiflər heyətinin və sərgiyə qatılan seyrçilərin rəğbətini qazanıblar.

"Ənənə və müasirlik" adı altında keçən VI Moskva Beynəlxalq Sənət Festivalı iyulun 4-dən 10-dək davam etmişdir. Rusiya paytaxtının "Manej" Mərkəzi Sərgi Salonunda keçirilən bu nüfuzlu festivalda 30-dan çox ölkədən rəssamlar iştirak edirdilər. Bu festivalın təşkilatçısı Moskva İctimai Fondu və bir sıra digər qurumlar idi.

"Ənənə və müasirlik" adlı VI Moskva Beynəlxalq Sənət Festivalının yekun mərasimi "Et Setera" teatrında keçirilmişdir. Mərasimdə Moskva İctimai Fondunun prezidenti Vera Kiselyova münsiflər heyətinin ayrı-ayrı nominasiyalar üzrə 22 rəssamı qalib elan etdiklərini açıqlamışdır. Vera Kiselyova deyib:

"Bu festival müasir incəsənət aləmində yeni isimlərin tanınmasına səbəb olub. Bu gün mükafat alanlar yaxşıların ən yaxşısıdır".

Daha sonra mükafatlar təqdim olunub. Azərbaycanlı rəssamlar Məryəm Ələkbərli və Rəşad Mehdiyev təsviri incəsənət sahəsində "Vera" mükafatına layiq görülüblər.

Moskva İctimai Fondu, Rusiya Dövlət Dumasının Mədəniyyət Komitəsi, "World for Cultur and Peace" Beynəlxalq Fondu və Rusiya İncəsənət Akademiyasının təşkilatçılığı ilə keçirilən "Ənənə və müasirlik" adlı VI Moskva Beynəlxalq Sənət Festivalının qaliblərinə verilən "Vera" mükafatı təsviri incəsənət sahəsində verilən məşhur mükafatlardan sayılır

Ayna.-2012.-14 iyul.-S.20.