Kaliforniyada Türk Mədəniyyət və İncəsənət Festivalı keçirilib

Ölkəmiz burada uğurla təmsil olunub

Kaliforniyanın Monterey şəhərində Türk Mədəniyyət və İncəsənət Festivalı keçirilib. Festivalda Azərbaycan da uğurla təmsil olunub. Azərbaycanın Los- Anceles Baş Konsulluğundan APA-ya verilən məlumata görə, konsulluğun dəstəyi ilə quraşdırılmış Azərbaycan stendində ölkəmizə dair müxtəlif məlumat kitabçaları, turist xəritələri, suvenirlər və kiçik xalçalar sərgilənib.

Festivalda çıxış edən mahir kamança ustası İmamyar Həsənov ifa etdiyi Azərbaycan musiqi nümunələri ilə tamaşaçıları riqqətə gətirib. Daha sonra vaxtilə üç il Azərbaycanda yaşamış, hazırda Monterey şəhərində təhsil alan amerikalı tələbə Maykl Land çıxış edərək, Azərbaycanın nailiyyətləri, zəngin tarixi və mədəniyyəti, azərbaycanlıların yüksək qonaqpərvərlik və dözümlülük ənənələri barədə iştirakçılara məlumat verib.

İştirakçılar tərəfindən ən çox ziyarət olunan stenddə Azərbaycanın nar şirəsi qonaqlara təqdim olunub. Artıq bir müddətdən bəri Kaliforniyanın yüzlərlə dükanında uğurla satışı həyata keçirilən, birbaşa Azərbaycandan idxal edilən nar şirəsi festival iştirakçıları tərəfindən çox bəyənilib.

Monterey şəhəri 2011-ci ildən etibarən Azərbaycanın Lənkəran şəhəri ilə qardaşlaşmış şəhərdir. Ştatda isə çoxsaylı türk icması yaşamaqdadır.

Ayna.- 2012.- 1 sentyabr.- S.20.