"AZƏRBAYCANIN GƏLƏCƏKDƏ NATO-ya ÜZV OLMASI MƏSƏLƏSİ VAR"

Siyavuş Novruzov: "Biz bu işləri bəyanat vermədən həyata keçiririk"

Postsovet məkanına daxil olan ölkələr sırasında Azərbaycan NATO-nun proqramlarında iştirak edən ilk ölkələrdəndir. Keçmiş SSRİ ölkələri arasında NATO-nun proqramlarında ən çox iştirak edən ölkə də Azərbaycandır. Bunu APA-ya açıqlamasında Azərbaycanın NATO Parlament Assambleyasında nümayəndə heyətinin üzvü, millət vəkili Siyavuş Novruzov bildirib.

"Ölkəmiz təkcə bir il ərzində NATO-nun 300-dən artıq proqramına qatılacaq. Bu tədbirlər sırasına Sülh Naminə Tərəfdaşlıq Proqramı, Parlament Assambleyasının iclasları, "Rout Rouz" seminarları və s. daxildir" deyən S.Novruzov bildirib ki, 2007-ci ildən isə Azərbaycan ordusu, demək olar ki, bütövlükdə - həm tədris, həm təchizat baxımından NATO standartlarına keçib: "Münasibətlər hazırda yüksələn xətlə inkişaf edir".

Azərbaycanın NATO-ya üzv olması zəruriliyi ilə bağlı suala cavabında S.Novruzov qeyd edib: "NATO-nun özünün də müxtəlif standartları var və bu standartlara uyğun proqramlar həyata keçməlidir. Məsələn, bəzi ölkələr NATO-ya üzv olmaq istəyir və bununla bağlı rəsmi bəyanat da verir. Amma qurumun müəyyən komissiyaları işləyir və bu nəticəyə gəlir ki, bu ölkənin quruma daxil olması hələ tezdir. Tutaq ki, bir neçə il əvvəl Gürcüstan ilə Ukrayna belə bəyanat verdi və NATO-ya müraciət etdi. Lakin ABŞ-ın çox ciddi cəhdlərinə baxmayaraq, NATO ölkələri onları quruma qəbul etmədilər ki, bu dövlətlərin müəyyən standartlara uyğunlaşması lazımdır. Həmçinin NATO ölkələri istəmir ki, bu ölkələr daxili problemlərini NATO-ya daşısınlar. Orada belə bir şərt var ki, problemlər həll olunduqdan sonra bu quruma üzv olmaq mümkündür. Azərbaycan isə belə bəyanat və müraciət etməsə də, strukturları NATO-nun proqramına uyğun qurulub və bu davam edir. Bəyanat verib həyata keçirmək və bəyanat vermədən bu işləri həyata keçirmək məsələləri var. Biz bu işləri bəyanat vermədən həyata keçiririk. Hesab edirəm ki, gələcək perspektivdə Azərbaycanın bu quruma üzv olması məsələsi var".

Azərbaycanın NATO-ya üzvlüyünün Dağlıq Qarabağ probleminin həllində hansı perspektivləri vəd etməsi ilə bağlı suala cavabında S.Novruzov qeyd edib ki, soyuq müharibədən sonra NATO-nun qarşısına qoyduğu məqsədlər dəyişib.

"Əgər soyuq müharibə dövründə NATO və Varşava Müqaviləsi qarşı-qarşıya dayanmışdısa, soyuq müharibədən sonra NATO-nun funksiyası əsasən terrorizmə, etnik təmizləməyə, narkotiklərin qanunsuz dövriyyəsinə qarşı mübarizədir. NATO əvvəlki kimi təkcə hərbi qurum deyil, həm də hərbi-siyasi quruma çevrilib. Ona görə də Dağlıq Qarabağla bağlı məsələlərdə də bilavasitə bu funksiya əksini tapır. Yəni bu gün Dağlıq Qarabağ nəzarətsiz ərazidir, dünyada olan müəyyən qanunsuz silahlar, nəzarətsiz məhsullar həmin ərazidə toplanır və yayılır. Heç kim də deyə bilməz ki, həmin silahlardan Azərbaycanla yanaşı, Avropa və NATO üzvü olan ölkələrə qarşı da istifadə olunmayacaq. NATO-nun əsasnaməsinin beşinci müddəasında göstərilir ki, hər hansı NATO ölkəsinə qarşı hər hansı terror aktı baş verərsə, digər NATO dövlətləri də bu məsələyə qoşulmalıdır. Bu gün Dağlıq Qarabağa toplanan narkotik vasitələr bütün Avropaya yayılır. NATO-nun da əsas məqsədi bunlara qarşı mübarizə aparmaqdır. Bu baxımdan Dağlıq Qarabağ münaqişəsinin həllində NATO-nun rolu vacib olaraq qalır və bu olmalıdır", - deyə o qeyd edib.

C.MƏZAHİROĞLU

Ayna.-2009.-25 aprel.-S.2.