AZƏRİN TÜRKİYƏ TELEKANALLARINDA ÇIXIŞ EDİB

Müğənninin səfər proqramını Xocalı soyqırımının ildönümü ilə bağlı təbliğat kampaniyası təşkil edib

Azərbaycanın əməkdar artisti Azərin ötən gün Türkiyə səfərindən qayıdıb. Səfər proqramı barədə danışan müğənni bunun bir növ təbliğat xarakteri daşıdığını söylədi. Xəbəri təfərrüatı ilə "Ayna"ya çatdıran Azərin bunları dedi: "Əvvəlcə TRT telekanalının təşkil etdiyi "Sən türkülərini söylə" mahnı müsabiqəsində qonaq-münsif kimi təmsil olundum. Bu, təsadüfi dəvət deyildi. Ötən il TRT-nin Azərbaycandakı təmsilçiliyi ilə müsabiqəyə iştirakçı seçəndə biz Samir Piriyevin adı üzərində dayanmışdıq. Mən Samirə hər zaman mənəvi dəstək olacağımı bildirmişdim və bunu əməlimdə də göstərdim". Səfər proqramına uyğun olaraq müğənni sözügedən müsabiqənin canlı efirində vətənpərvər mahnılarını səsləndirib. Eyni zamanda, Heydər Əliyev Fondundan özü ilə apardığı "Qarabağ xanəndələri" adlı diski müsabiqənin münsiflər heyətinə təqdim edib. Azərin ona ayrılmış vaxtdan səmərəli istifadə edərək fondun Xocalı soyqırımı ilə bağlı çap etdirdiyi kitab haqqında efir izləyicilərini məlumatlandırıb. Müğənni eyni səpkili təbliğatın digər kanallarda da davam etdirildiyini söylədi: "Xocalı soyqırımının ildönümündən bir gün əvvəl Türkiyənin ATV telekanalında çıxışım olub. Eyni təbliğat kampaniyasını bu kanalda da sərgilədim. Həmçinin proqram boyu Azərbaycana həsr olunmuş mahnılar səsləndirdim". Öyrəndik ki, müğənninin səfər proqramı daha sonra Ankarada keçirilən Krım Tatarlarının Toplantısında davam etdirilib. Həmin toplantıda Azərin bir neçə dəqiqəlik çıxış edib. Müğənninin TRT-dəki çıxışları isə "Sən türkülərini söylə" müsabiqəsi ilə məhdudlaşmayıb. Növbəti günlərdə Azərin telekanalın başqa verilişlərində də qonaq olub.

ZƏMİNƏ

Ayna.-2009.-28 fevral.-S.20.